సినిమా కన్నా ముందు.. ‘భాగమతి’ మూవీ పోస్టర్లు విడుదలైనప్పుడు, చాలామందికి మొదట అర్థం కాలేదు.. అనుష్క ముక్కుపై ఉన్నదేమిటో!! ఎవరో పుడక అన్నారు. ఇంకెవరో, పురుగై ఉండొచ్చు అనుకున్నారు. పురుగెలా అవుతుందని ఇంకొందరు. క్యారెక్టర్‌ని బట్టి పుడకో, పురుగో అయి ఉంటుందిలెమ్మని సరిపెట్టుకున్నారు అప్పటికి. సినిమా రిలీజ్‌ అయింది. అనుష్క ముక్కుపై ఉన్నది పుడక అని తేలిపోయింది. పోస్టర్‌ని దీక్షగా చూసినవాళ్లు రిలీజ్‌కంటే ముందే అది పుడక అని గుర్తించే ఉంటారు. అయినా పురుగులను ఆభరణాలుగా ధరించేవారు ఎక్కడైనా ఉంటారా? ఉంటారు. ఇప్పుడు ఉన్నారో లేదో కానీ, ఒకప్పుడు ఉండేవారు. ఈజిప్షియన్‌లు యుద్ధానికి వెళ్లే ముందు జీరంగి పురుగులను మెడలో ధరించి వెళ్లేవాళ్లు. అలా చేస్తే అతీంద్రియ శక్తులు ఆవహించి విజయం లభిస్తుందని వారి నమ్మకం. జీరంగికి నొప్పి కలక్కుండా ఒడుపుగా మెడలోని హారానికి దానిని తగిలించేవారట. ఈ ఆచారం ప్రాచీన మెక్సికన్‌లలో కూడా ఉండేది. అయితే వాళ్లు బొద్దింకలను ధరించేవారు. మయన్‌ కల్చర్‌లో బంగారు ఆభరణాలకు జీవంతో ఉన్న పురుగుల్ని కలిపి ధరించడం అనే సంప్రదాయం ఉన్నట్లు చరిత్రలో ఉంది. అదృష్టం కలిసిరావడానికి, దుష్టశక్తులు దూరంగా వెళ్లడానికి ఇలా చేసేవారట.   


 నిజమే... అనుష్క ప్రేమలో పడ్డారు! మరి, పెళ్లి ఎప్పుడనేగా మీ డౌట్? వచ్చే ఏడాది ఉంటుందేమో! అనుష్క ఇంట్లో ఒప్పుకున్నారా? లాంటి ప్రశ్నలు అడగొద్దు. ఎందుకంటే, ఇది సినిమా పెళ్లేనండీ! అనుష్క ముఖ్యతారగా ‘పిల్ల జమిందార్’ ఫేమ్ జి. అశోక్ దర్శకత్వంలో యూవీ క్రియేషన్స్ సంస్థ నిర్మిస్తోన్న సినిమా ‘భాగమతి’. ఇందులో అనుష్క కలెక్టర్‌గా నటిస్తున్నారు. ఎటువంటి సమస్యనైనా పరిష్కరించే సామర్థ్యం ఉన్న ప్రభుత్వాధికారిగా కనిపించనున్నారట. ప్రభుత్వం, అధికారి.. అనగానే సమస్యలు వాటి పరిష్కారంతో సినిమా ఉంటుందేమో అనుకుంటున్నారా? ఇందులో ఓ చక్కని ప్రేమకథ కూడా ఉందండోయ్! అంటున్నారు యూనిట్ సన్నిహిత వర్గాలు.
 
 ‘జనతా గ్యారేజ్’లో మోహన్‌లాల్ కుమారుడిగా నటించిన ఉన్ని ముకుందన్ ఇందులో సోషల్ యాక్టివిస్ట్‌గా నటిస్తున్నారు. ఆది పినిశెట్టి కూడా కీలక పాత్ర చేస్తున్నారు. ఈ ఇద్దరిలో అనుష్క ఎవరితో ప్రేమలో పడతారో.. ఎవర్ని పెళ్లి చేసుకుంటారో సినిమా చూసి తెలుసుకోవాల్సిందేనట. ప్రస్తుతం ఈ సినిమా షూటింగ్ చివరి దశలో ఉంది. కొత్త సంవత్సరంలో ఈ సినిమా విడుదల కానుంది. అన్నట్లు, ఇటీవల నిజ జీవితంలో బెంగుళూరులో ఒక బిజినెస్‌మ్యాన్‌తో అనుష్క ప్రేమ, పెళ్లి గురించి కూడా పలు వార్తలు వినిపిస్తున్నాయి. వాటికి ఎప్పుడు సమాధానం చెబుతారో! వెయిట్ అండ్ సీ!!


 ‘అదేనండీ.. భాగ్యనగరంలోనే ఉన్నా’ అంటున్నారు అనుష్క. ‘భాగమతి’ని ప్రశ్నిస్తే.. ఈవిడ సమాధానం చెబుతున్నారేంటి అనుకుంటున్నారా! ‘బాహుబలి’, ‘రుద్రమదేవి’, ‘సైజ్ జీరో’ సినిమాల తర్వాత అనుష్క నటిస్తున్న లేడీ ఓరియెంటెడ్ సినిమా ‘భాగమతి’. ‘పిల్ల జమిందార్’ ఫేమ్ అశోక్ దర్శకత్వం వహిస్తున్నారు. తెలుగులో యూవీ క్రియేషన్స్ పతాకంపై వంశీ, ప్రమోద్.. తమిళంలో జ్ఞానవేల్ రాజా నిర్మిస్తున్నారు.
 
 ఈ రెండు భాషల్లోనూ ఏకకాలంలో రూపొందుతున్న ఈ సినిమా ఏప్రిల్‌లో ప్రారంభమైంది. చడీ చప్పుడూ లేకుండా 25 రోజుల పాటు షూటింగ్ చేసేశారు. రెండో షెడ్యూల్ దసరా తర్వాత ప్రారంభం కానుంది. ‘‘హైదరాబాద్‌లోని ప్రముఖ స్టూడియోలో ‘భాగమతి’ కోసం భారీ సెట్ వేస్తున్నారు. దసరా తర్వాత ఆ సెట్‌లో షూటింగ్ షూరూ చేస్తారు. సినిమా మొత్తం పూర్తయ్యే వరకూ గ్యాప్ లేకుండా షూటింగ్ జరుగుతుంది’’ అని యూనిట్ సన్నిహిత వర్గాలు వెల్లడించాయి.
 
 ఏ మాటకు ఆ మాటే చెప్పుకోవాలి, ఈ సినిమాలో అనుష్క చాలా అందంగా ఉంటుందంటున్నారు యూనిట్ సభ్యులు. ‘సైజ్ జీరో’ కోసం అనుష్క చాలా లావయ్యారు. ఈ సినిమాలో మునుపటిలా నాజూకైన శరీరాకృతిలో కనిపిస్తారు. సామాజికాంశాలతో కూడిన ప్రేమకథగా ఈ చిత్రం తెరకెక్కుతోంది. ఈ ఏడాది ఆఖరున విడుదల చేయాలనుకుంటున్నారట!