తాడిపత్రి టౌన్: ఒంటరిగా ఉన్న వృద్ధురాలి నోట్లో కొందరు దుండగులు గుడ్డలు కుక్కి చోరీకి పాల్పడ్డారు. ఈ సంఘటన తాడిపత్రి భగత్సింగ్‌నగర్‌లో మంగళవారం మధ్యాహ్నం పట్ట పగలు జరగడంతో ఆ ప్రాంత వాసులు తీవ్ర భయభ్రాంతులకు గురయ్యారు. కాలనీకి చెందిన రజాక్‌వలి తన వృద్ధ తల్లిని ఇంటి వద్ద కాపలాగా ఉంచి, భార్యా పిల్లలతో కలసి బంధువుల ఊరికి వెళ్లారు. ఈ విషయాన్ని పసిగట్టిన దొంగలు ఇంట్లోకి జొరబడ్డారు. ఆమె అరవకుండా నోట్లోకి గుడ్డలు కుక్కి పది తులాల బంగారు నగలను ఎత్తుకెళ్లారు. విషయం తెలుసుకున్న బాధితుడు వెంటనే తాడిపత్రి చేరుకున్నారు. జరిగిన ఘటనపై పోలీసులకు ఫిర్యాదు చేయగా, వారు దర్యాప్తు చేస్తున్నారు.