సాక్షి, ప్రకాశం: బాలినేని శ్రీనివాసరెడ్డి పెద్ద కమల్‌హాసన్‌.. ఆయనతో సినిమా తీయొచ్చు అంటూ దర్శి వైఎస్సార్‌సీపీ ఎమ్మెల్యే బూచేపల్లి శివప్రసాద్ రెడ్డి ఆగ్రహం వ్యక్తం చేశారు. రాజకీయ లబ్ధి కోసం జనసేనలో చేరి ఎక్కువగా మాట్లాడుతున్నారంటూ హెచ్చరించారు. బాలినేని బ్రతుకు ప్రకాశం జిల్లా ప్రజలకు బాగా తెలుసు అని వ్యాఖ్యలు చేశారు.దర్శి ఎమ్మెల్యే బూచేపల్లి శివప్రసాద్ రెడ్డి తాజాగా మీడియాతో మాట్లాడుతూ.. బాలినేని.. నీ గురించి అందరకీ తెలుసు. జిల్లాలో ప్రతీ ఒక్కరినీ వేధించి వారి వద్ద దోచుకున్నావ్‌. నీ బాధితుడు కానీ వాడు ప్రకాశం జిల్లాలో ఒక్కడు కూడా లేడు. బాలినేని పార్టీ మారిన తర్వాత జిల్లాలో వైఎస్సార్‌సీపీ కార్యకర్తలు సంతోషించారు. నటనలో బాలినేని.. కమల్‌హాసన్‌ను మించిపోయారు. ఆయనతో ఒక సినిమా తీయవచ్చు. టీడీపీలో చేరేందుకు నువ్వు ప్రయత్నిస్తే.. రిజక్ట్‌ చేస్తే.. ఆస్తుల కోసం జనసేనలో చేరావు. జడ్పీ చైర్‌పర్సన్‌ని మార్చేస్తానని చాలెంజ్‌ చేస్తున్నావు. నీలాగా అమ్ముడుపోయే జడ్పీటీసీలు జిల్లాలో లేరు. నీలాగా వెన్నుపోటు పొడిచే వారు పార్టీకి అవసరం లేదు అంటూ ఘాటు విమర్శలు చేశారు.

సాక్షి, ప్రకాశం జిల్లా: ఒంగోలులో పోలింగ్‌ సజావుగా జరగకుండా టీడీపీ కుట్ర పన్నుతోందని ఎస్పీకి బాలినేని శ్రీనివాస్‌రెడ్డి, చెవిరెడ్డి భాస్కర్‌రెడ్డి ఫిర్యాదు చేశారు. టీడీపీ గొడవలకు ప్లాన్‌ చేస్తోంది. మాకు ఉన్న సమాచారంతో ఎస్పీకి ఫిర్యాదు చేశాం. టీడీపీ ‘‘వుయ్‌’’ యాప్‌లో ఓటర్ల డేటా తీసుకొని మహిళలకు భద్రత లేకుండా చేస్తున్నారు. ‘వుయ్‌’ యాప్‌పై పోలీసులు చర్యలు తీసుకోవాలని బాలినేని శ్రీనివాస్‌రెడ్డి కోరారు.

సాక్షి, తిరుపతి(చిత్తూరు): తుఫాను ప్రభావంతో చిత్తూరు, కడప, కర్నూలు, అనంతపురం, నెల్లూరు జిల్లాల్లో భారీ వర్షాల నేపథ్యంలో విద్యుత్ శాఖ అధికారులు, సిబ్బంది అప్రమత్తంగా ఉండాలని ఆ సంస్థ ఛైర్మన్ & మేనేజింగ్ డైరెక్టర్ హెచ్. హరనాథ రావు ఆదేశించారు. తుఫాను నేపథ్యంలో ముందు జాగ్రత్త చర్యల్లో భాగంగా గురువారం ఉదయం సీఎండి హరనాథ రావు 5 జిల్లాల సూపరింటెండింగ్ ఇంజనీర్లు, ఎగ్జిక్యూటివ్ ఇంజనీర్లు, సీనియర్ అకౌంట్స్ ఆఫీసర్‌లతో అత్యవసరంగా టెలికాన్ఫరెన్స్ నిర్వహించారు. అంతకుముందు రాష్ట్ర ఇంధన శాఖా మంత్రి బాలినేని శ్రీనివాస రెడ్డి భారీ వర్షాల నేపథ్యంలో ఏపీఎస్పీడీసీఎల్‌  చేపడుతున్న ముందు జాగ్రత్త చర్యలపై సమీక్షించినట్లు సీఎండీ తెలిపారు. చదవండి: రిజిస్ట్రేషన్‌ ప్రక్రియలో పారదర్శకత పాటించాలి: సీఎం జగన్‌ వర్షాల కారణంగా వినియోగదారులకు ఎటువంటి ఇబ్బందులు ఎదుర్కోకుండా చర్యలు చేపట్టాలని మంత్రి బాలినేని శ్రీనివాసరెడ్డి సూచించినట్లు తెలియజేశారు. టెలికాన్ఫరెన్స్ సందర్భంగా సీఎండీ హరనాథ రావు మాట్లాడుతూ..తుఫాను కారణంగా ఎదురయ్యే విద్యుత్ సమస్యలను పరిష్కరించేందుకు ప్రత్యేక కంట్రోల్ రూమ్‌లను ఏర్పాటు చేశామని తెలిపారు. చిత్తూరు జిల్లా పరిధిలోని వినియోగదారులు మొబైల్ నెంబరు: 94408 17412, కడప: 94408 17440, కర్నూలు: 73826 14308, అనంతపురం: 94910 67446, నెల్లూరు జిల్లా పరిధిలోని వినియోగదారులు మొబైల్ నెంబరు: 9440817468లకు కాల్ చేసి విద్యుత్ ప్రమాదాలు, సమస్యలపై సమాచారాన్ని అందించవచ్చని తెలిపారు. చదవండి: Heavy Rains: ఆ జిల్లాల కలెక్టర్లు అప్రమత్తంగా ఉండాలి: సీఎం జగన్‌ తుఫాను దృష్ట్యా విద్యుత్ శాఖ అధికారులు, సిబ్బందికి సెలవులు రద్దు చేస్తున్నట్లు తెలియజేశారు. వినియోగదారుల సమస్యలపై తక్షణం స్పందించేందుకు వీలుగా ప్రతి సబ్ స్టేషన్ పరిధిలో ఐదుగురు సిబ్బంది నిత్యం అందుబాటులో ఉండే విధంగా చర్యలు చేపట్టాలని అధికారులను ఆదేశించారు. విద్యుత్ స్తంభాలు ఒదిగిపోవడం తదితర ప్రమాదాలు సంభవించినట్లు అయితే వాటిని ఎదుర్కొనేందుకు వీలుగా డ్రిల్లింగ్ యంత్రాలు, సామాగ్రిని, వాకిటాకీలను, సిబ్బందిని అందుబాటులో ఉంచుకోవాలని సూచించారు. బలమైన గాలి, వర్షం ఉన్న సందర్భాల్లో ప్రజలు విద్యుత్ లైన్లకు దూరంగా ఉండాలని, ఎక్కడైనా విద్యుత్ స్తంభాలు పడిపోవడం, లైన్లు తెగిపోవడం జరిగినట్లయితే తక్షణమే కంట్రోల్ రూమ్ లకు గానీ, సమీపంలోని విద్యుత్ శాఖ అధికారులు గానీ లేదా టోల్ ఫ్రీ నెంబరు; 1912కు ఫోన్ చేసి సమాచారం అందించాలని వినియోగదారులకు విజ్ఞప్తి చేశారు.


 ఏం పాపం చేశారని కార్మికుల పట్ల క్రూరంగా వ్యవహరిస్తున్నారు
 2001లోను ఇదే తీరు
 ఎమ్మెల్యేగా ఉండి...లాఠీ దెబ్బలు తగిలినా ఆర్టీసీ కార్మికులకే అండగా ఉన్నా
 నేడు కూడా అందుకు సిద్ధమే.. ఆర్టీసీ కార్మికులకు న్యాయం జరిగే వరకు అండగా ఉంటాం
 వైఎస్సార్ సీపీ రాష్ట్ర ప్రధాన కార్యదర్శి, మాజీ మంత్రి బాలినేని శ్రీనివాసరెడ్డి
  
 ఒంగోలు : ‘మోసం చేయడం బాబు నైజమని ఆనాడే వైఎస్ చెప్పారు. బాబు నిజం చెబితే అతని తల వెయ్యి వక్కలవుతుందని మునిశాపం ఉందని వైఎస్సార్ అనేవారు. నేడు అదే నిజమవుతోంది. ఎన్నికల సమయంలో ఆల్‌ఫ్రీ అన్న బాబు ఇప్పుడు రాష్ట్రం పరిస్థితి బాగాలేదు అని మాట్లాడటం చూస్తుంటే కేవలం ఓట్ల కోసం ప్రజలను వినియోగించుకున్నారని అర్థమవుతోందని’ వైఎస్సార్ సీపీ రాష్ట్ర ప్రధాన కార్యదర్శి, మాజీ మంత్రి బాలినేని శ్రీనివాసరెడ్డి పేర్కొన్నారు. స్థానిక ఆర్టీసీ బస్టాండ్ ఆవరణలో జాయింట్ యాక్షన్ కమిటీ ఆధ్వర్యంలో ఆదివారం ఆర్టీసీ కార్మికులు చేస్తున్న 5వ రోజు సమ్మె శిబిరంలో ఆయన ముఖ్య అతిథిగా మాట్లాడారు.
 
 ఆర్టీసీ కార్మికుల సమస్యలు పరిష్కరించకుండా వారిపై ఎస్మా ప్రయోగిస్తామని రాష్ట్ర రవాణా మంత్రి పేర్కొనడం బాధాకరమన్నారు. ‘2001లో కూడా చంద్రబాబు ముఖ్యమంత్రిగా ఉండగానే ఆర్టీసీ కార్మికులు 24 రోజులపాటు సమ్మె చేశారు. ఆరోజు తాను ఎమ్మెల్యేగా ఉన్నా పోలీసులు లాఠీలతో దాడిచేసి సమ్మెను నిర్వీర్యం చేయాలని చూశారు. కానీ చివరకు ఆర్టీసీ కార్మికులదే విజయం. ఈసారి విజయం కూడా ఆర్టీసీ కార్మికులదే. అందుకే భేషజాలకు పోకుండా ఆర్టీసీ కార్మికులు, ఉద్యోగులపై ఒత్తిడి మానుకొని వారి న్యాయబద్ధమైన కోర్కెలు పరిష్కరించాలని’ బాలినేని డిమాండ్ చేశారు.
 
 ఆర్టీసీలో అధికారుల జీతాలకు, కార్మికుల జీతాలకు మధ్య ఉన్న వ్యత్యాసాన్ని పరిశీలిస్తే ఎంత శ్రమ దోపిడీ జరుగుతోందో అర్థమవుతోందని వైఎస్సార్ సీపీ కొండపి నియోజకవర్గ ఇన్‌చార్జ్ వరికూటి అశోక్‌బాబు అన్నారు. ఆర్టీసీ కార్మికుల సమస్యల పరిష్కారానికి పూర్తిస్థాయిలో అండగా ఉంటామని చెప్పారు. బాబు మారాడు అంటే జనం ఓట్లేశారని, కానీ ఆయన మారలేదు అనడానికి ఆర్టీసీ కార్మికుల పట్ల చంద్రబాబు వ్యవహరిస్తున్న తీరే అర్థమవుతోందని వైఎస్సార్ సీపీ రాష్ట్ర అధికార ప్రతినిధి బత్తుల బ్రహ్మానందరెడ్డి అన్నారు. 
 
 కార్యక్రమంలో ఆర్టీసీ ఎంప్లాయీస్ యూనియన్ రీజనల్ కార్యదర్శి వాకా రమేష్, ఎస్‌డబ్ల్యూఎఫ్ రీజనల్ కార్యదర్శి ఎం.అయ్యపురెడ్డి, వైఎస్సార్‌సీపీ కనిగిరి నియోజకవర్గ ఇన్‌చార్జి బుర్రా మధుసూదన్‌యాదవ్, నగర అధ్యక్షుడు కుప్పం ప్రసాద్, యువజన విభాగం జిల్లా అధ్యక్షుడు కేవీ రమణారెడ్డి, వై.వెంకటేశ్వరరావు, ట్రేడ్ యూనియన్ జిల్లా అధ్యక్షుడు కేవీ ప్రసాద్, ఉపాధ్యక్షుడు గోవర్థన్‌రెడ్డి, బీసీ విభాగం జిల్లా అధ్యక్షుడు కఠారి శంకర్, బొగ్గుల శ్రీనివాసరెడ్డి, గొర్రెపాటి శ్రీనివాసరావు, చుండూరి రవి, సింగరాజు వెంకట్రావు తదితరులు ఆర్టీసీ కార్మికుల సమ్మెకు సంఘీభావం ప్రకటించారు.
 బాబు చర్యలే ఆర్టీసీ నష్టాలకు కారణం: ఎమ్మెల్యే డాక్టర్ ఆదిమూలపు సురేష్
 ఆర్టీసీ గిన్నిస్‌బుక్‌లో స్థానం సంపాదించుకుందంటే అది ఆర్టీసీ కార్మికుల వల్లే సాధ్యమైంది తప్ప అధికారుల గొప్పతనం కాదు. కేవలం భద్రతాపరంగా ఆర్టీసీ అనుసరిస్తున్న విధానాలే అందుకు కారణంగా నిలిచాయి. కానీ నేడు సమ్మె సమయంలో ప్రయాణికుల భద్రత పూర్తిగా గాలికి వదిలి ఆర్టీసీ కార్మికుల సమ్మెను విచ్ఛిన్నం చేయాలనే ఉద్దేశంతో బస్సులను నిరుద్యోగులకు అప్పగించడం బాధాకరం.
 
 తెలంగాణ లో టీడీపీ సీనియర్ నాయకుడు ఎర్రబెల్లి దయాకరరావు ఆర్టీసీ కార్మికులకు సంఘీభావంగా ఉంటూ కార్మికుల పక్షాన కార్యక్రమాల్లో పాల్గొంటారు...కానీ ఏపీలో మాత్రం అదే పార్టీ అధికారంలో ఉన్నా ఆర్టీసీ కార్మికులపై ఎస్మా ప్రయోగిస్తామంటూ ఉక్కుపాదం మోపుతుంటుంది. ఇదే బాబు రెండు కళ్ల సిద్దాంతానికి నిదర్శనం. వైఎస్సార్ కాలంలో లాభాల బాటలో ఉన్న సంస్థ నేడు బాబు పాలనలో అప్పుల ఊబిలో కూరుకుపోతోంది.
 
 
 మీ ఉసురు ఊరికే పోదు:          ఎమ్మెల్యే పాలపర్తి డేవిడ్‌రాజు
 టీడీపీ ఎన్నికల మ్యానిఫెస్టోలో ఆర్టీసీ కార్మికులకు ప్రభుత్వ ఉద్యోగులతో సమానంగా వేతన సవరణ చేస్తామన్నారు.  ఆర్టీసీని ప్రభుత్వంలో విలీనం చేస్తామన్నారు. కానీ నేడు అందుకు భిన్నంగా వ్యవహరిస్తున్నారు. రాష్ట్రంలో బాబు చర్యల కారణంగా మోసపోని వ్యక్తి  ఒక్కరూ ఉండరని అర్థమవుతోంది. అంగన్‌వాడీలు, గృహ నిర్మాణశాఖలో పనిచేస్తున్న అవుట్ సోర్సింగ్, విద్యుత్‌శాఖలో పనిచేస్తున్న కాంట్రాక్టు కార్మికులు ఇలా ఎంతోమంది భవితను సైతం బాబు దెబ్బతీస్తున్నారు.  మీ ఉద్యమాన్ని అణిచేందుకు ప్రభుత్వం చేస్తున్న కుట్రలన్నీ కలిసి మీ ఉసురు ఊరకపోదు. తప్పకుండా ప్రభుత్వం తగిన మూల్యం చెల్లిస్తుంది.