టైటిల్‌ : హంట్‌ నటీనటులు: సుధీర్‌బాబు, శ్రీకాంత్‌, భరత్‌, చిత్ర శుక్లా తదితరులు నిర్మాణ సంస్థ: భవ్య క్రియేషన్స్‌ నిర్మాత: వీ ఆనంద్‌ ప్రసాద్‌ దర్శకుడు: మహేశ్‌ సంగీతం: జిబ్రాన్‌ సినిమాటోగ్రఫి: అరుల్ విన్సెంట్‌ ఎడిటర్ : ప్రవీణ్ పూడి విడుదల తేది: జనవరి 26, 2023 కథేంటంటే.. ముగ్గురు ఐపీఎస్‌ అధికారులు అర్జున్‌ ప్రసాద్‌(సుధీర్‌ బాబు), మోహన్‌ భార్గవ్‌(శ్రీకాంత్‌), ఆర్యన్‌దేవ్‌(భరత్‌)ల చుట్టు ఈ కథ సాగుతుంది. ఈ ముగ్గురు మంచి స్నేహితులు. ఏ కేసునైనా ఇట్టే సాల్వ్‌ చేస్తారు. వీరిలో ఆర్యన్‌ దేవ్‌ దారుణ హత్యకు గురవుతాడు. ఈ కేసును అర్జున్‌ ప్రసాద్‌ విచారిస్తాడు. తన స్నేహితుడిని చంపిదెవరో తెలుసుకునే క్రమంలో అర్జున్‌కు యాక్సిడెంట్‌ అవుతుంది. ఈ ప్రమాదం కారణంగా ఆయన గతం మర్చిపోతాడు. ఈ విషయాన్ని దాచి మళ్లీ ఆ కేసును విచారించే బాధ్యతను అర్జున్‌కే అప్పగిస్తాడు కమిషనర్‌ మోహన్‌ భార్గవ్‌. గతం మర్చిపోయిన అర్జున్‌ ఈ కేసును ఎలా చేధించాడు? ఈక్రమంలో ఆయనకు ఎదురైన ఇబ్బందులేంటి? ఇంతకి ఆర్యన్‌ దేవ్‌ని హత్యచేసిందెవరు? ఎందుకు చేశారు? చివరకు చివరకు అర్జున్ ఏం చేశాడు? అనేదే మిగతా కథ.  ఎలా ఉందంటే.. హంట్‌  ఓ ఇన్విస్టిగేషన్ థ్రిల్లర్ మూవీ. గతం మర్చిపోయిన ఓ పోలీస్ ఆఫీసర్‌..తన గతం తెలుసుకొని ఓ మర్డర్‌ కేసును ఎలా ఛేదించాడు అనేదే ఈ సినిమా కథ. క్లైమాక్స్‌లో వచ్చే ఒక ట్విస్ట్‌.. అందరికి షాకివ్వడమే కాకుండా అప్పటి వరకు సినిమాపై ఉన్న ఒపీనియన్‌ని మార్చేస్తుంది. ఆ ఒక్క పాయింట్‌ మాత్రమే కొత్తగా ఉంటుంది. ఆ పాయింట్‌కి ఒప్పుకొని సినిమాను తీసిన సుధీర్‌ బాబుని కచ్చితంగా అభినందించాల్సిందే. కానీ ఈ సినిమా కథనం మాత్రం ఆసక్తికరంగా సాగదు. మర్డర్‌ కేసు ఇన్వెస్టిగేషన్‌ నెమ్మదిగా సాగడం సినిమాకు మైనస్‌. సినిమా ప్రారంభం అయిన కొన్ని క్షణాలకే అసలు కథలోకి తీసుకెళ్లాడు దర్శకుడు. స్టార్టింగ్‌ కాస్త ఇంట్రెస్టింగ్‌గా కథనం సాగుతుంది. కానీ ఓ 15 నిమిషాల తర్వాత రొటీన్‌ సన్నివేశాలు..స్లో నెరేషన్‌ ప్రేక్షకుల సహనానికి పరీక్షలా మారుతుంది. దర్శకత్వం లోపం వల్ల కొన్ని థ్రిల్లింగ్‌ సీన్స్‌ మిస్‌ అయ్యాయి. అలాగే నేపథ్య సంగీతం కూడా అంతగా ఆకట్టుకోలేకపోయింది. సెకండాఫ్‌లో కథలో వేగం పుంజుకుంటుంది. ఇంటర్వెల్‌ తర్వాత వచ్చే ట్విస్టులు ఆకట్టుకుంటాయి. ముఖ్యంగా క్లైమాక్స్‌లో వచ్చే ట్విస్ట్‌ మాత్రం ఆడియన్స్‌కి గట్టి షాకిస్తుంది.   ఎవరెలా చేశారంటే..  అర్జున్ ప్రసాద్ పాత్రలో సుధీర్ బాబు ఒదిగిపోయాడు. గతం మర్చిపోయిన పోలీసు అధికారిగా ఆయన ఇచ్చే ఎక్స్‌ప్రెషన్స్‌, యాక్షన్‌ సీన్‌ ఆకట్టుకుంటాయి. క్లైమాక్స్‌లో సుధీర్ బాబు నటన అందరినీ మెప్పిస్తుంది. మోహన్‌ భార్గవ్‌ పాత్రకి శ్రీకాంత్‌ న్యాయం చేశాడు. కాస్త సీరియస్‌గా ఉండే పాత్ర తనది. భరత్‌ చాలా గ్యాప్‌ తర్వాత తెలుగు తెరపై మెరిశాడు. ఏసీపీ ఆర్యన్‌ దేవ్‌గా ఆయన ఉన్నంతలో చక్కగా నటించారు. కథంతా అతని పాత్ర చుట్టే తిరుగుతుంది. మైమ్ గోపీ, కబీర్ సింగ్ దుల్హన్, మంజుల, సంజయ్ తదితరులు తమ పాత్రల పరిధిమేర నటించారు. సాకేంతిక విషయాలకొస్తే.. జిబ్రాన్‌ నేపథ్య సంగీతం ఆకట్టుకోలేకపోయింది.  అరుల్ విన్సెంట్‌ సినిమాటోగ్రఫీ బాగుంది. నిర్మాణ విలువలు సినిమా స్థాయికి తగ్గట్లు ఉన్నతంగా ఉన్నాయి.


 ‘‘రియల్ ఎస్టేట్ నుంచి రీల్ ఎస్టేట్‌కొచ్చా. నేను ఏ రంగంలో అడుగుపెట్టినా అదృష్టాన్ని కాకుండా కృషినే నమ్ముకుంటాను. అందుకే ఈ స్థాయికి చేరుకున్నా’’ అని నిర్మాత వి. ఆనంద్‌ప్రసాద్ చెప్పారు. భవ్య క్రియేషన్స్ పతాకంపై ‘అమ్మాయే నవ్వితే, మనసుతో, శౌర్యం, అమరావతి, లౌక్యం’ తదితర చిత్రాలు నిర్మించిన ఆయన తాజాగా నిర్మించిన ‘సౌఖ్యం’ ఈ నెల 24న విడుదల కానుంది. ఈ సందర్భంగా ఆనంద్‌ప్రసాద్ మాట్లాడుతూ - ‘‘గోపీచంద్ నాకిష్టమైన హీరో. ఓ రకంగా అతనికిది సొంత సంస్థ లాంటిది.
 
 రవికుమార్ చౌదరి మా సంస్థలోనే దర్శకుడయ్యాడు. వాళ్లిద్దరి కాంబినేషన్‌లో ‘యజ్ఞం’ తర్వాత వస్తున్న సినిమా ఇదే. ఇంతకు ముందు మేం గోపీచంద్‌తో తీసిన ‘లౌక్యం’ను మించి ఈ సినిమా హిట్టవుతుంది’’ అని తెలిపారు. భవిష్యత్ ప్రణాళికల గురించి చెబుతూ - ‘‘త్వరలో ఓ పెద్ద హీరోతో సినిమా ఉంటుంది. అలాగే రచయిత శ్రీధర్ సీపాన దర్శకత్వంలో ఓ సినిమా చేస్తాం. మా ఎగ్జిక్యూటివ్ నిర్మాత అన్నే రవి ప్లానింగ్ మా సంస్థకు మెయిన్ ఎస్సెట్’’ అని చెప్పారు.


 ‘‘నేను ఎవరితోనూ పెట్టుకోను. పెట్టుకుంటే వేరే పని పెట్టుకోను’’ అని విలన్లను హెచ్చరిస్తాడతను. అదే మనిషి ప్రియురాలి దగ్గరకొచ్చేసరికి బోల్డంత చిలిపితనం కురిపిస్తాడు. ‘‘రైల్వే డిపార్ట్‌మెంట్ నాకో సూపర్ ఫిగర్‌తో పెళ్లి చూపులు ఎరేంజ్ చేసింది’’ అని ట్రైన్‌లో తన ఎదురుగా కూర్చున్న ప్రియురాల్ని ఉద్దేశించి చిలిపిగా అంటాడు. ‘సౌఖ్యం’ చిత్రంలో గోపీచంద్ పాత్ర ఎంత సీరియస్‌గా ఉంటుందో, అంతే చిలిపిగా ఉంటుందని అర్థం కావడానికి ఈ రెండు డైలాగ్స్ చాలు.
 
 భవ్య క్రియేషన్స్ పతాకంపై ఏయస్ రవికుమార్ చౌదరి దర్శకత్వంలో వి.ఆనంద్‌ప్రసాద్ ఈ చిత్రాన్ని నిర్మించారు. రెజీనా కథానాయిక. క్రిస్మస్ సందర్భంగా ఈ నెల 25న ఈ చిత్రాన్ని విడుదల చేయాలనుకుంటున్నారు. నిర్మాత మాట్లాడుతూ- ‘‘ఇప్పటికే విడుదలైన ఈ సినిమా టీజర్‌కు మంచి స్పందన లభిస్తోంది. ఈ నెల 13న ఒంగోలులో భారీ ఎత్తున పాటల వేడుక చేయనున్నాం’’ అని చెప్పారు.
 
 ‘‘ఇటీవలే హీరో ఇంట్రడక్షన్ సాంగ్‌ను చిత్రీకరించాం. దీంతో ఈ సినిమా షూటింగ్ పూర్తయింది. పోరాట ఘట్టాలు ఈ చిత్రానికి హైలైట్‌గా నిలుస్తాయి. ఫ్యామిలీ ఎంటర్‌టైనర్‌గా ఈ చిత్రాన్ని రూపొందించాం’’ అని దర్శకుడు చెప్పారు. ఈ చిత్రానికి కథ, మాటలు: శ్రీధర్ సీపాన, సంగీతం: అనూప్ రూబెన్స్, స్క్రీన్‌ప్లే: కోనవెంకట్-గోపీమోహన్.


 ఎవరికి వారే యమునా తీరే అన్నట్లుగా ఉండటం ప్రెజెంట్ ట్రెండ్. కానీ, ఆ యువకుడు మాత్రం డిఫరెంట్. నలుగురి సౌఖ్యం కోరుకునే వ్యక్తి. ఆత్మీయుల పెదాలపై చిరునవ్వు చూడటానికి... ఎంటర్‌టైన్ చేయడానికైనా, యాక్షన్ చేయడానికైనా రెడీ అంటాడు. నలుగురి మంచి కోరుకునే వ్యక్తిగా గోపీచంద్, ఆయన సరసన  రెజీనా కథానాయికగా భవ్య క్రియేషన్స్ పతాకంపై ఎ.ఎస్.రవికుమార్ చౌదరి దర్శకత్వంలో వి. ఆనందప్రసాద్ నిర్మిస్తున్న చిత్రం ‘సౌఖ్యం’.
 
 ఆనందప్రసాద్ మాట్లాడుతూ- ‘‘ఇటీవల స్విట్జర్లాండ్‌లో ‘ఓనా సిండ్రెల్లా... ముద్దొచ్చే ఏంజెల్లా...’, ‘నాకేం తోచదే నాకేం తోచదే...’, ‘ఆ ఇవ్వమ్మ ఇవ్వమ్మ హని హని స్వీటీ స్వీటీ..’ అనే  మూడు పాటలను చిత్రీకరించాం. మిగతా రెండు పాటలను ఈ నెలాఖరులోపు చిత్రీకరిస్తాం. క్రిస్‌మస్ కానుకగా డిసెంబర్ 25న విడుదల చేయనున్నాం’’ అని చెప్పారు.
 
 ‘‘ ‘యజ్ఞం’ తర్వాత మళ్లీ పదేళ్లకు గోపీచంద్‌తో వర్క్ చేయడం చాలా ఆనందంగా ఉంది. గోపీచంద్, రెజీనా మధ్య కెమిస్ట్రీ ప్రేక్షకులను ఆకట్టుకుంటుంది’’ అని దర్శకుడు తెలిపారు. ఈ చిత్రానికి కథ, మాటలు: శ్రీధర్ సీపాన, స్క్రీన్‌ప్లే: కోన వెంకట్, గోపీమోహన్.