బుద్ధ జయంతిని పురస్కరించుకొని దేశవ్యాప్తంగా 44 మంది చిత్రకారులు గీసిన బుద్ధుడి చిత్రాలను ‘ఎటర్నల్ ఎన్‌లైట్‌మెంట్’ అనే పేరుతో ఎగ్జిబిషన్ బాగ్‌లింగంపల్లిలోని ఐలమ్మ ఆర్ట్ గ్యాలరీలో సోమవారం నుంచి ప్రారంభం కానుంది. తెలంగాణతో పాటు వివిధ రాష్ట్రాలకు చెందిన ఆర్టిస్టులు గీసిన చిత్రాలు ఇందులో ప్రదర్శనకు ఉంచనున్నారు. ఈ నెల 20 వరకు జరగనున్న ఈ ప్రదర్శనను మధ్యాహ్నం 12 గంటల నుంచి రాత్రి 8 గంటల వరకు సందర్శకులు వీక్షించవచ్చు.
  
  


 అమరావతి (గుంటూరు): ప్రసిద్ధ పుణ్యక్షేత్రం అమరావతిలో సోమవారం రాత్రి రాష్ట్ర ప్రభుత్వం బుద్ధ జయంతి వేడుకలను ఘనంగా నిర్వహించింది. ఈ సందర్భంగా ధ్యాన బుద్ధ విగ్రహాన్ని విద్యుత్ దీపాలతో సుందరంగా అలంకరించారు. ధ్యానబుద్ధ రూపశిల్పి రేగుళ్ల మల్లికార్జునరావు అధ్యక్షతన జరిగిన కార్యక్రమంలో స్థానిక ఎమ్మెల్యే కొమ్మాలపాటి శ్రీధర్ ముఖ్య అతిథిగా పాల్గొన్నారు. అమరావతి అభివృద్ధికి బుద్ధ జయంతి వేడుకలు నాంది కావాలని ఆయన ఆకాంక్షించారు.
 
 
 ఆంధ్రప్రదేశ్‌కు లోటు బడ్జెట్ ఉన్నా అమరావతిని అభివృద్ధి చేస్తామన్నారు. జిల్లా కలెక్టర్ కాంతిలాల్‌దండే, మాజీ మంత్రి పుష్పరాజ్, ఎమ్మెల్సీ రామకృష్ణ, మాజీ ఎమ్మెల్సీ నన్నపనేని రాజకుమారి తదితరులు పాల్గొన్నారు. తొలుత బౌద్ధ భిక్షువుల నేతృత్వంలో ప్రార్థనలు జరిపి సభను ప్రారంభించారు.