అలంపూర్‌రూరల్‌ : ఐదోశక్తిపీఠం అలంపూర్‌ జోగుళాంబ ఆలయంలో మంగళవారం సామూహిక చండీహోమాలు జరిగాయి. గురుపౌర్ణమి కావడంతో భక్తులు పెద్ద ఎత్తున హోమాలకు తరలివచ్చారు. ప్రతి పౌర్ణమి, అమావాస్య నాడు చండీహోమాలను నిర్వహిస్తుంటారు. సుదూర ప్రాంతాలనుంచి తరలివచ్చిన భక్తులకు దేవస్థానం వారు బ్రహ్మేశ్వర నిత్యాన్నదాన సత్రంలో భోజనవసతి కల్పించారు. చండీహోమాలకు భక్తుల నుంచి మంచి స్పందన లభిస్తోంది.
  


 నల్లకుంట : హైదరాబాద్ నల్లకుంటలోని శంకరమఠం సోమవారం భక్తులతో పోటెత్తింది. పౌర్ణమిని పురస్కరించుకొని మఠంలోని శక్తి గణపతి, శంకరభగవత్పాదులు, చంద్రమౌళీశ్వరుడు, లోకమాత శారదాంబలకు ప్రత్యేక పూజలు నిర్వహించారు. అలాగే ఆలయ ప్రాంగణంలోని యాగశాలలో వేద పండితులు వేద మంత్రోచ్ఛారణల నడుమ శత చంఢీ హోమం నిర్వహించారు. ప్రాంగణంలో మహిళా భక్తులచే కైలాస గౌరీ వ్రతం నిర్వహించి ముత్తైదువులకు పసుపు కుంకుమ అందజేశారు. మధ్యాహ్నం దాదాపు 300 మంది భక్తులకు తీర్థ ప్రసాదాలు అందజేసి అన్నదానం నిర్వహించారు. సాయంత్రం శ్రీలలితా ప్రచార సేవక్ ఆధ్వర్యంలో శంకరమఠం ప్రాంగణంలో కొనసాగుతున్న శ్రీ లలితా అనుగ్రహ భాషణంపై ప్రవచనాలు భక్తులను విశేషంగా ఆకట్టుకుంటున్నాయి. సాయంత్రం శ్రీ లలితా స్వరూపులు భగవాన్ శ్రీవత్స శ్రీ గురుదేవులు అనుగ్రహ భాషణలు ఇచ్చారు.