ఖమ్మంక్రైం : పోలీస్‌ శాఖలో కోర్టు కానిస్టేబుళ్ల పాత్ర చాలా కీలకమైందని సీపీ తఫ్సీర్‌ ఇక్బాల్‌ అన్నారు. కమిషనరేట్‌ పరిధిలోని కోర్టు కానిస్టేబుళ్లకు ఒకరోజు కోర్టు మానిటర్‌ సిస్టం శిక్షణ శిబిరం సిటీ పోలీస్‌శిక్షణ కేంద్రంలో నిర్వహించారు. కార్యక్రమానికి ముఖ్య అతిథిగా హాజరైన సీపీ మాట్లాడుతూ నేరాలకు పాల్పడిన నిందుతులకు శిక్ష పడినప్పుడే నిజమైన బాధితులకు న్యాయం జరుగుతుందన్నారు. కేవలం సాక్షులను సకాలంలో న్యా యస్థానంలో హాజరు పరుస్తూ కోర్టు కానిస్టేబుళ్లు తీసుకోవాల్సిన చొరవే అతి ముఖ్యమైనదని పేర్కొన్నారు. రాష్ట్ర డీజీపీ ఆదేశాల మేరకు కోర్టు కానిస్టేబుళ్లకు ఐపాడ్‌ ట్యాప్స్‌ ఇచ్చామని, వాటిని ప్రతిఒక్కరూ సద్వినియోగం చేసుకోవాలని సూ చించారు. నేరస్తులకు వారెంట్లు, సమన్లు సత్వరమే అందేవిధంగా చర్యలు తీసుకోవాలని కాని స్టేబుళ్లకు సూచించారు.  కోర్టు సమాచారం ప్రాసిక్యూషన్‌కు సంబంధించిన సమాచారం ఎప్పటికప్పుడు సంబంధిత స్టేషన్‌ హౌస్‌ ఆఫీసర్‌కు తెలియపర్చాలని సూచించారు. కోర్టు క్యాలెండర్‌ ఎప్పటికప్పుడు పొందు పర్చడం చేయాలని, కేసు ట్రయల్స్‌ సమయంలో పబ్లిక్‌ ప్రాసిక్యూటర్ల సలహాలు, సూచనలు స్వీకరించాలని కోర్టు కానిస్టేబుళ్లను సీపీ ఆదేశించారు. కోర్టు పెండింగ్‌ ట్రయల్‌ కేసులు, వారెంట్లు, సమన్లు, సీసీటీఎస్‌ఎస్‌లో సీఎంఎస్‌ (కోర్టు మానిటర్‌ సిస్టమ్‌)లో డేటా ఎంటర్‌ చేయాలని సూచించారు. ఈ డేటాను టీఎస్‌ కాప్‌కు అనుసంధానం చేస్తామని వివరిం చారు. దీని ద్వారా ప్రతిరోజు కోర్టులో ప్రక్రియ ఎలా ఉంటుందనేది ఆన్‌లైన్‌లో వెంటనే తెలుస్తుందని, కోర్టు కానిస్టేబుళ్ల పని సులభతరం అవుతుందని పేర్కొన్నారు. ప్రతిరోజు కోర్టులో ట్రయ ల్‌ జరిగిన కేసులు ఎంటర్‌ చేసినట్లయితే పెండింగ్‌ లేకుండా ఉంటుందని పేర్కొన్నారు. మారుతున్న కాలానికి అనుగుణంగా శాస్త్ర సాంకేతిక రంగాల్లో ముందుకు సాగుతూ అత్యాధునిక టెక్నాలజీ ఉపయోగిస్తూ మరింత పరిజ్ఞానంతో పోలీసుల పని సులభరతం చేస్తున్నామన్నారు. కోర్టు విధుల్లో చక్కని ప్రతిభ కనబర్చిన కేసుల్లో శిక్షలు పడేవిధంగా పనిచేసే సిబ్బందికి ప్రతినెల రివార్డులు అందజేస్తామని, ఇప్పటివరకు గత నెలలో జైలు శిక్షపడిన కేసుల్లో కోర్టు సిబ్బంది ఆరుగురికి రివా ర్డు ఇచ్చామని సీపీ తెలిపారు. కాగా, ఐటీ కోర్‌ సిబ్బంది కోర్టు మానిటర్‌ సిస్టం గురించి పవర్‌ పాయింట్‌ ప్రజెంటేషన్‌ ద్వారా అవగాహన కల్పించారు. ఈ సందర్భంగా ప్రతిభ కనబర్చినవారిలో ఎం.వెంకయ్య (ఎన్కూర్‌ పీఎస్‌), ఎం.భార్గవ్‌ (ముదిగొండ), శ్రీనివాసరెడ్డి(ఖమ్మం అర్బన్‌), ఆర్‌.నాగేశ్వరరావు (ఖమ్మం త్రీటౌన్‌), ప్రభాకర్‌ ఏఎస్‌ఐ ఉన్నారు. కార్యక్రమంలో అడిషనల్‌ డీసీపీ సురేశ్‌కుమార్, ఖమ్మం ఏసీపీ వెంకట్రావు, సీసీఆర్‌బీ ఏసీపీ రామానుజం, డిప్యూటీ ఆఫ్‌ ప్రాసిక్యూషన్‌ రామారావు, సీఐలు శివసాంబిరెడ్డి, సురేశ్, ఎస్‌ఐ జానీపాషా, ఆర్‌ఎస్‌ఐ మీరా తదితరులు పాల్గొన్నారు.


 ♦ కేసు వస్తే సంపాదనే సంపాదన
 ♦ జరిమానా గోరంత.. వసూలు కొండంత
 ♦ ఏళ్ల తరబడి పాతుకుపోయిన వైనం
 
 తిరుపతి క్రైం : తెలిసో తెలియకో తప్పులు చేసిన వారికి కోర్టు వేసే జరిమానా కన్నా కోర్టు కానిస్టేబుళ్లకే ఎక్కువగా ఖర్చు అవుతోందని బాధితులు వాపోతున్నారు. ఈ విషయం చిన్నదైనా జిల్లా వ్యాప్తంగా జరుగుతున్న వ్యాపారంలో రోజూ వేల రూపాయలు అక్రమార్కులు జేబుల్లోకి వెళుతున్నట్టు సమాచారం. అడిగినంత ఇవ్వకపోతే ఉదయం నుంచి సాయంత్రం వరకు కోర్టు వద్ద పడిగాపులు కాయాల్సిందేనని ఆయా కానిస్టేబుళ్లు బెదిరిస్తున్నారని బాధితులు ఆరోపిస్తున్నారు. అలాగే కోర్టుకు వచ్చే కేసులను తమకు అనుకూలమైన న్యాయవాదులకు అప్పగిస్తున్నారని,  సంబంధిత న్యాయవాదులు నిందితుల నుంచి అత్యధికంగా డబ్బు తీసుకుని కానిస్టేబుళ్లకు కమీషన్‌ ఇస్తున్నారనే విమర్శలు వినిపిస్తున్నాయి. ఈ వ్యవహారం కోర్టు బయట జరుగుతుండడంతో వీరిపై ఎవరూ చర్యలు తీసుకోవడం లేదు. దీంతో ఆయా కానిస్టేబుళ్లు ఆడిందే ఆటగా.. పాడింది పాటగా మారింది.
 
 పిట్టీ కేసులతోనే ఎక్కువ కాసులు
 చిన్న పాటి నేరాలు చేసి చిక్కిన వారిపై పోలీసులు పిట్టీ కేసులు నమోదు చేస్తారు. తర్వాత నిందితులను కోర్టు కానిస్టేబుల్‌ ద్వారా కోర్టుకు పంపుతారు. న్యాయమూర్తి వీరికి కొంతమేర జరిమానా విధిస్తారు. ఆ జరిమానాను కోర్టు కానిస్టేబుల్‌ అక్కడే కోర్టులోనే కట్టిస్తాడు. అనంతరం ఖర్చుల పేరుతో జరిమానాకు రెట్టింపు వసూలు చేస్తున్నారని బా«ధితులు వాపోతున్నారు. ముఖ్యంగా ఆటో డ్రైవర్లు, పేకాట రాయళ్లు, డ్రంక్‌ అండ్‌ డ్రైవ్‌ కేసుల్లో నిందితులే ఆదాయ వనరులుగా మారుతున్నారు. ఇలాంటి కేసులు జిల్లా వ్యాప్తంగా ప్రతి స్టేషన్‌ నుంచి రోజుకు 10 నుంచి 20 కేసులు కోర్టుకు వస్తుంటాయి. నిందితుల నుంచి రూ.3 వేల నుంచి రూ.5 వేల వరకు వసూలు చేస్తున్నారనే ఆరోపణలు వినిపిస్తున్నాయి. ఆదాయ వనరులుగా మారిన ఈ కొలువు నుంచి వేరొక చోటికి వెళ్లేందుకు సంబంధిత కానిస్టేబుళ్లు ఇష్టపడడం లేదనే విమర్శలు ఉన్నాయి.  
 
 న్యాయవాదులతో ఒప్పందం
 కోర్టు కానిస్టేబుళ్లు కొందరు న్యాయవాదులతో ఒప్పం దం కుదుర్చుకుని కేసులను అప్పగిస్తున్నారనే ఆరోపణలు ఉన్నాయి. ముఖ్యంగా రోడ్డు ప్రమాదాలకు కారణమైన బయట ప్రాంతాల వారికి స్థానిక కోర్టుల్లో న్యాయవాదుల గురించి అంతగా తెలియదు. వారు మధ్యవర్తి అవతారం ఎత్తి ఫలానా న్యాయవాది మీకు తొందరగా బెయిల్‌ ఇప్పిస్తారని, కేసు గెలుస్తారని చెప్పి తమకు అనుకూలమైన వారి వద్దకు తీసుకెళుతున్నారు. తద్వారా వారి నుంచి భారీగా ముడుపులు తీసుకుంటున్నట్టు సమాచారం. కొందరు జూనియర్లకు కేసులు అప్పగించి వారికి కొద్దోగొప్పో ఇచ్చి మిగిలిందంతా దోచుకుంటున్నారని సీనియర్‌ న్యాయవాదులు ఆరోపిస్తున్నారు.
 
 కోర్టు కానిస్టేబుల్‌ విధులు ఇవే..
 జిల్లా వ్యాప్తంగా ప్రతి పోలీసు స్టేషన్‌కు ఒక కోర్టు కానిస్టేబుల్‌ ఉంటాడు. కోర్టులో నమోదయ్యే కేసులను, సంబంధిత వివరాలను కోర్టుకు సమర్పించడం, వాయిదాలకు హాజరుకావడం, చార్జిషీట్లను అప్పగించడం, పిట్టీ కేసుల్లో నిందితులను కోర్టుకు తీసుకెళ్లడం, వారి నుంచి జరిమానా కట్టించడం వారి పనులు. ఆదాయం ఎక్కువగా ఉండడంతో ఈ పోస్టులకు తీవ్రమైన పోటీ ఉంటోంది. స్టేషన్‌ అధికారి ఇష్టమైన వారికే ఈ పోస్టులు కట్టబెడుతుంటారు. ఎట్టి పరిస్థితుల్లోనూ కొత్తవారికి ఈ పని అప్పగించరు. పాతవారినే కొనసాగిస్తుండడంతో అవినీతి పెరిగిపోతోందని పోలీసులు, న్యాయవాదులు చెబుతున్నారు. తరచూ కానిస్టేబుళ్లను మార్చడం ద్వారా అవినీతిని అరికట్టవచ్చని సూచిస్తున్నారు.