చెన్నై: దేశంలోకి పెద్ద మొత్తంలో నకిలీ నోట్లు వచ్చాయన్న సమాచారం మేరకు కస్టమ్స్‌, రెవెన్యూ ఇంటలిజెన్స్‌ అధికారులు అన్ని పోర్టుల్లో తనిఖీలు చేపట్టారు. రెండు రోజులుగా తాము అన్ని పోర్టుల్లోకి వచ్చిన కంటెయినర్లను సోదా చేస్తున్నట్లు ఒక ఉన్నతాధికారి వెల్లడించారు. శ్రీలంక, పాకిస్తాన్‌ దేశాల నుంచి వచ్చిన నౌకల ద్వారా వచ్చిన కంటెయినర్లను మాత్రమే చూస్తున్నారా అన్న విలేకరుల ప్రశ‍్నకు ఆ అధికారి నేరుగా సమాధానం చెప్పలేదు. గత రెండు రోజులుగా తనిఖీలు కొనసాగుతున్నాయని బదులిచ్చారు. నకిలీ రూ. 2000 నోట్లను ఇటీవల పశ్చిమ బెంగాల్‌లో జరిపిన సోదాల్లో పెద్ద మొత్తంలో బయటపడిన నేపథ్యంలో అధికారులు ఈ మేరకు సోదాలు చేపట్టినట్లు సమాచారం.


 శంషాబాద్‌: శంషాబాద్‌లోని రాజీవ్‌గాంధీ అంతర్జాతీయ విమానాశ్రయంలో సోమవారం కస్టమ్స్‌ అధికారులు తనిఖీలు చేపట్టారు. ఈ సోదాల్లో ఓ ప్రయాణికుడి వద్ద నుంచి 376 గ్రాముల బంగారాన్ని స్వాధీనం చేసుకున్నారు. దుబాయ్‌ నుంచి వచ్చిన ప్రయాణికుడి వద్ద నుంచి 376 గ్రాముల బంగారం పట్టుబడింది. బంగారానికి సంబంధించిన ఎలాంటి పత్రాలు లేకపోవడంతో అధికారులు అతనిని అదుపులోకి తీసుకున్నారు. స్వాధీనం చేసుకున్న బంగారం రూ. 11 లక్షలు ఉంటుందని అంచనా వేస్తున్నారు. బంగారం తరలిస్తున్న వ్యక్తి హైదరాబాద్‌కు చెందిన వాడిగా గుర్తించారు.