చెన్నై: పవర్ స్టార్ పవన్ కల్యాణ్‌, దర్శకుడు ఎస్‌జే సూర్య కాంబినేషన్‌లో గతవారం ప్రారంభమైన కొత్త సినిమా.. ఓ తమిళ చిత్రానికి రీమేకా అంటే అవుననే వినిపిస్తున్నది. సూపర్‌స్టార్ అజిత్ హీరోగా వచ్చిన తమిళ్ బ్లాక్‌ బస్టర్‌ 'వీరమ్‌' రీమేక్‌గా ఈ సినిమా తెరకెక్కుతున్నట్టు తెలుస్తున్నది.
 
 'కొన్ని నెలల కిందటే ఈ సినిమా రీమేక్‌ హక్కుల్ని చిత్రబృందం సొంతం చేసుకుంది. తెలుగు నెటివిటీకి అనుగుణంగా ఈ కథను మార్చేందుకు ప్రస్తుతం కసరత్తు చేస్తున్నారు' అని చిత్రయూనిట్ సన్నిహిత వర్గాలు తెలిపాయి. 'వీరమ్‌' సినిమా మక్కీమక్కీగా తెలుగులో రీమేక్ చేయబోరని, పవన్ అభిమానులను, తెలుగు ప్రేక్షకులను దృష్టిలో పెట్టుకొని.. మూలకథ దెబ్బతినకుండా మార్పులు చేస్తున్నట్టు చిత్రవర్గాలు తెలిపాయి. యాక్షన్ లవ్ స్టోరీగా తెరకెక్కిన 'వీరమ్‌'లో అజిత్ పాత్రను పవన్ కల్యాణ్‌ చేయబోతున్నారు.
 
 
 పవర్‌స్టార్ పవన్ కల్యాణ్, దర్శకుడు ఎస్‌జె సూర్య కాంబినేషన్‌లో  వచ్చిన 'ఖుషి' బ్లాక్ బస్టర్ హిట్ కావడంతో వీరిద్దరి కలయికలో తాజా సినిమాకు క్రేజ్‌ ఏర్పడిన సంగతి తెలిసిందే. 2001 ఏప్రిల్ 27న 'ఖుషి' విడుదలైంది. ఇప్పుడు సరిగ్గా పదిహేనేళ్ల తర్వాత, 'ఖుషి' విడుదలైన రోజునే గతవారం ఈ సినిమా షూటింగ్ ప్రారంభమైంది. నార్త్‌స్టార్ ఎంటర్‌టైన్‌మెంట్స్ పతాకంపై శరత్ మరార్ ఈ చిత్రం నిర్మిస్తున్నారు.


  పవర్‌స్టార్ పవన్ కల్యాణ్, దర్శకుడు ఎస్‌జె సూర్య కాంబినేషన్‌లో వచ్చిన ‘ఖుషి’ ఎంతటి ఘనవిజయం సాధించిందో ప్రత్యేకంగా చెప్పనక్కర్లేదు. ఆ తర్వాత వీరిద్దరి కలయికలో ‘కొమరం పులి’ వంటి డిఫరెంట్ చిత్రం వచ్చింది. 2001 ఏప్రిల్ 27న ‘ఖుషి’ విడుదలైంది. ఇప్పుడు సరిగ్గా పదిహేనేళ్ల తర్వాత, ‘ఖుషి’ విడుదలైన రోజునే వీరి కాంబినేషన్‌లో మూడో సినిమా ప్రారంభమైంది. నార్త్‌స్టార్ ఎంటర్‌టైన్‌మెంట్స్ పతాకంపై శరత్ మరార్ ఈ చిత్రం నిర్మిస్తున్నారు.
  
  ఎలాంటి హంగూ, ఆర్భాటం లేకుండా హైదరాబాద్‌లోని నార్త్‌స్టార్ ఎంటర్‌టైన్‌మెంట్స్ కార్యాలయంలో బుధవారం ఈ చిత్ర ప్రారంభోత్సవం జరిపారు. ముహూర్తపు సన్నివేశానికి ఎడిటర్ గౌతమ్‌రాజు కెమేరా స్విచ్చాన్ చేయగా, నిర్మాత ఎన్. సుధాకర్ రెడ్డి క్లాప్ ఇచ్చారు. చిత్ర దర్శకుడు ఎస్‌జె సూర్య గౌరవ దర్శకత్వం వహించారు. ఆకుల శివ ఈ చిత్రానికి కథ, మాటలు అందిస్తున్నారు.
  
  నాలుగు నెలలుగా వర్క్ చేసి స్క్రిప్ట్ సిద్ధం చేశారాయన. ఈ సినిమాకు అనూప్ రూబెన్స్ సంగీతం అందిస్తున్నారు. ఇప్పటికే రెండు పాటల రికార్డింగ్ కూడా పూర్తి చేశారు. ‘బిల్లా’, ‘బెంగాల్ టైగర్’ చిత్రాలకు పనిచేసిన సౌందర్ రాజన్ ఈ చిత్రానికి ఫొటోగ్రఫీ అందిస్తున్నారు. నిర్మాత మాట్లాడుతూ- ‘‘ఫ్యాక్షన్ లీడర్ లవ్‌స్టోరీ కథాంశంతో ఈ సినిమా తెరకెక్కనుంది. ప్రస్తుతం ప్రీ ప్రొడక్షన్ వర్క్ జరుగుతోంది. ఈ చిత్రం తొలి షెడ్యూల్ జూన్‌లో ప్రారంభించనున్నాం. హీరోయిన్, చిత్రం టైటిల్ వివరాలు త్వరలోనే వెల్లడిస్తాం’’ అని తెలిపారు.