న్యూఢిల్లీ: అమెరికాకు చెందిన ఈమైలేజ్ కార్పొరేషన్‌లో మైనారిటీ వాటాను సాఫ్ట్‌వేర్ దిగ్గజం విప్రో కొనుగోలు చేసింది. రిస్క్ అసెస్‌మెంట్ సంబంధిత, మోసాలను అరికట్టే సొల్యూషన్లనందించే ఈ కంపెనీలో వాటాను విప్రో వెంచర్స్ ద్వారా కొనుగోలు చేశామని కంపెనీ పేర్కొంది. 5 శాతం కంటే తక్కువ వాటానే కొనుగోలు చేశామని పేర్కొన్న విప్రో  ఎంత మొత్తానికి కొనుగోలు చేసినదీ  వెల్లడించలేదు. చిన్న చిన్న స్టార్టప్‌ల్లో పెట్టుబడులు పెట్టడానికి విప్రో సంస్థ విప్రో వెంచర్స్‌ను ఏర్పాటు చేసింది. ఓపెన్ సోర్స్, బిగ్ డేటా, అనలిటిక్స్, ఆర్టిఫిషియల్ ఇంటెలిజెన్స్, డిజిటల్, ఇంటర్నెట్ ఆఫ్ థింగ్స్, సెక్యూరిటీ వంటి అంశాల్లో కార్యకలాపాలు నిర్వహిస్తోన్న స్టార్టప్‌ల్లో విప్రో వెంచర్స్ పెట్టుబడులు పెడుతోంది.