లాస్‌ఏంజెలెస్‌: లెజెండరీ గాయకుడు ఎల్విస్‌ ప్రెస్లీ ఏకైక కూతురు లీసా మేరీ ప్రెస్లీ(54) గురువారం చనిపోయారు. అస్వస్థతకు గురైన తన కూతురు లాస్‌ఏంజెలెస్‌లోని ఓ ఆస్పత్రిలో తుదిశ్వాస విడిచారని ఆమె తల్లి నటి, ప్రిసిల్లా ప్రెస్లీ వెల్లడించారు. తండ్రి రూపురేఖలు, గళంతో వృత్తిపరంగా ఆయన అడుగుజాడల్లోనే నడిచిన లీసా మేరీ..2000 సంవత్సరాల్లో తన సొంత రాక్‌ ఆల్బమ్‌లను విడుదల చేశారు. ఇన్‌ ది ఘెట్టో, డోన్ట్‌ క్రై డాడీ వంటి రికార్డుల్లో తండ్రి ఎల్విస్‌తోపాటు ఆమె పాడారు. మైకేల్‌ జాక్సన్, నికొలస్‌ కేజ్‌లతోపాటు నలుగురిని పెళ్లాడి, కొంతకాలానికే విడిపోయారు. ఈమెకు నలుగురు సంతానం         కలిగారు. 


 ఎల్విస్ ప్రెస్లీ (1935-1977) కీర్తికి కాలంతో పనిలేదు. దానికి ‘అవుట్ డేటెడ్’ అనే స్టిక్కరు కూడా లేదు. అందుకే...ఇప్పటికీ ‘ప్రెస్లీ’ అనే పేరు వినగానే  ఏదో పాట విన్నట్లుగా పాదాల్లో కదలిక వస్తుంది. గొంతులో రాగాల జల ఊరుతుంది. గతంలో ఎప్పుడూ  జరగని విధంగా... ఈ అమెరికన్ రాక్  ‘ఎన్’ రోల్ రారాజు వ్యక్తిగత వస్తువులతో ఒక భారీ ఎగ్జిబిషన్  లండన్‌లో  ప్రారంభం అయింది. ఇందులో ప్రెస్లీకి చెందిన రకరకాల వస్తువులు, వాహనాలు, దుస్తులు ఉన్నాయి.
 
 ఈ ప్రదర్శనలో  కారు లాంటి వాహనాలతో బాటు, గోల్డెన్ టెలిఫోన్,  1973లో మహ్మద్ ఆలి ప్రెస్లీకి అభిమానంగా బహూకరించిన గోల్డెన్ బాక్సింగ్ గ్లోవ్స్‌లాంటి విలువైన వస్తువులు,  కీ చైన్‌లాంటి చిన్న వస్తువులే కాదు, ప్రెస్లీ జూనియర్ స్కూల్ రిపోర్ట్‌లు కూడా  ఉన్నాయి.  ఈ ప్రదర్శన  తొమ్మిది నెలల పాటు కొనసాగుతుంది. వస్తువులను వస్తువులుగానే చూడనక్కర్లేదు...అందులో వ్యక్తిగత అభిరుచితో పాటు జీవితం కూడా ప్రతిఫలిస్తుంది. ఆ రకంగా ప్రెస్లీ  జీవితాన్ని విశ్లేషించడానికి అవసరమైన భారీ ముడి సరుకు  ప్రజలకు అందుబాటులోకి వచ్చినట్లే!