న్యూఢిల్లీ: వాహన విక్రయానంతర విడిభాగాల మార్కెట్‌ దేశీయంగా 2028 నాటికి రూ.1,16,200 కోట్లకు చేరుకుంటుందని ఒక నివేదిక వెల్లడించింది. వాహన విక్రయాల్లో భారీ వృద్ధి ఇందుకు కారణమని తెలిపింది. 2023లో ఇది రూ.83,000 కోట్లు ఉంది. ఎర్నెస్ట్‌ అండ్‌ యంగ్‌ భాగస్వామ్యంతో ఆటోమోటివ్‌ కంపోనెంట్‌ మాన్యుఫ్యాక్చరర్స్‌ అసోసియేషన్‌ ఆఫ్‌ ఇండియా (ఏసీఎంఏ) ఈ నివేదిక రూపొందించింది. ‘ప్రస్తుతం భారతీయ రోడ్లపై 34 కోట్ల వాహనాలు పరుగెడుతున్నాయి. ఈ సంఖ్య వచ్చే అయిదేళ్లలో ఏటా వార్షిక సగటు వృద్ధి 8 శాతం నమోదు కానుంది. 2028 నాటికి ద్విచక్ర వాహనాలు 25.7 కోట్ల నుంచి 36.5 కోట్లకు, ప్యాసింజర్‌ వాహనాలు 4.7 కోట్ల నుంచి 7.2 కోట్లకు చేరనున్నాయి. ప్రీ–ఓన్డ్‌ కార్ల విక్రయాల సగటు వృద్ధి 2027–28 నాటికి ఏటా 17.5 శాతం ఉంటుంది. వాణిజ్య వాహనాల సంఖ్య 1.3 కోట్ల నుంచి 1.9 కోట్లను తాకనుంది. ట్రాక్టర్లు 1.4 కోట్ల నుంచి 1.9 కోట్లకు చేరనున్నాయి. ఇక్కడి కంపెనీలకు టాప్‌–10 అంతర్జాతీయ మార్కెట్లకు రూ.2,90,500 కోట్ల విలువైన ఎగుమతి అవకాశాలు లభిస్తాయి. ఇంజన్, సస్పెన్షన్, బ్రేకింగ్, ట్రాన్స్‌మిషన్‌ పార్ట్స్, రబ్బర్‌ విడిభాగాలు, కూలింగ్‌ సిస్టమ్స్, ఫిల్టర్స్‌కు ప్రధానంగా డిమాండ్‌ ఉంటుంది’ అని నివేదిక వివరించింది. టైర్లు, లూబ్రికెంట్స్, కూలెంట్స్, బ్యాటరీలను నివేదికలో పొందుపర్చలేదు.  

న్యూఢిల్లీ: ప్రైవేటు రుణాల విషయంలో రాబడులు 12 శాతం వరకూ ఉండే అవకాశం ఉన్న నేపథ్యంలో ఈ విభాగంపై నాన్‌ బ్యాంకింగ్‌ ఫైనాన్స్‌ కంపెనీలు (ఎన్‌బీఎఫ్‌సీలు), క్రెడిట్‌ ఫండ్స్‌ దృష్టి సారించే అవకాశం ఉందని కన్సల్టెన్సీ సంస్థ ఎర్నెస్ట్‌ అండ్‌ యంగ్‌ (ఈవై) విశ్లేషించింది. ఈ నేపథ్యంలో రానున్న ఐదేళ్లలో ఈ విభాగంలోకి 89 బిలియన్‌ డాలర్ల(రూ.6,67,500 కోట్లు) వరకూ పెట్టుబడులు పెట్టే అవకాశం ఉందని వివరించింది. ఈ మేరకు వెలువడిన నివేదికలో కొన్ని ముఖ్యాంశాలు... ► వచ్చే ఐదేళ్లలో ఒత్తిడిలో ఉన్న ఆస్తులపై పెట్టుబడి అవకాశాలు, ఎన్‌పీఏల కొనుగోళ్లు, తాజా క్రెడిట్‌ డిఫాల్ట్‌లు అన్నీ పరిశీలిస్తే ప్రైవేటు రుణ అవకాశాల విలువ దాదాపు 25 బిలియన్‌ డాలర్లు.   ► ప్రైవేట్‌ క్రెడిట్‌ పెట్టుబడిదారులకు భారత్‌  చక్కటి వ్యవస్థాగత అవకాశాన్ని అందిస్తుంది. మొండి బకాయిల సమస్య నేపథ్యంలో ఇబ్బందికరమైన పెట్టుబడులకు రుణ దాతలు దూరంగా ఉన్నారు. ► ఎన్‌బీఎఫ్‌సీలు 2018లో వాటిని చుట్టుముట్టిన లిక్విడిటీ సంక్షోభం నుండి ప్రస్తుతం కోలుకుంటున్నాయి.   ► ప్రైవేట్‌ క్రెడిట్‌ వార్షికంగా సంవత్సరానికి 12–18 శాతం మధ్య అంతర్గత రాబడిని అందజేస్తుందని అంచనా. వచ్చే ఐదేళ్లలో ప్రైవేటు రుణ పెట్టుబడి 39–89 బిలియన్‌ డాలర్ల శ్రేణిలో ఉండే అవకాశం ఉంది.   ► ఒత్తిడితో కూడిన రుణ విభాగంపై సైతం ప్రైవేటు ఇన్వెస్టర్లు ఆసక్తి చూపిస్తున్నారు. రాబడులు 18–24 శాతం వరకు ఉంటాయని భావించడమే దీనికి కారణం.   ► స్థిర కరెన్సీ, అధిక ఆర్థిక వృద్ధి వంటి అంశాలు పెట్టుబడిదారు విశ్వాసాన్ని పెంపొందిస్తున్నాయి. ఈ పరిస్థితుల్లో దీర్ఘకాలికంగా పెట్టుబడులపై 12 శాతం నుంచి 24 శాతం వరకూ రాబడి లభిస్తుందని అంచనా.   ► వడ్డీరేట్లు మున్ముందు పెరిగే అవకాశం ఉందన్న అభిప్రాయం ప్రైవేటు రుణ ఇన్వెస్టర్లలో ఉంది. ఇంకా తగ్గించలేని కనిష్ట స్థాయిలో వడ్డీరేట్లు, కమోడిటీ ధరలు పుంజుకోవడం, ద్రవ్యోల్బణం ఆందోళనలు, రుణదాత హక్కుల అమల్లో జాప్యం నివారణకు ఇటీవలి చర్యలు వంటి అంశాలు దీనికి కారణం.   ► అయితే ప్రైవేట్‌ క్రెడిట్‌ మార్కెట్‌ కొన్ని సవాళ్లనూ ఎదుర్కొంటోంది. అధికారిక దివాలా ప్రక్రియలో జాప్యం, నేషనల్‌ కంపెనీ లా ట్రిబ్యునల్‌ ఫ్రేమ్‌వర్క్‌ వెలుపల తీర్మానాలలో జాప్యం, కార్పొరేట్‌ పాలన సమస్యలు, సర్ఫేసీ చట్టం వాస్తవ అమల్లో అడ్డంకులు వంటి అంశాలు ఇక్కడ ప్రస్తావించదగినవి. ► ప్రైవేట్‌ క్రెడిట్‌ గొడుగు కింద జరిగే అనేక ఒప్పందాలు చోటుచేసుకుంటున్నాయి. దివాలా చట్టాల కింద ఒత్తిడికి గురైన వ్యాపారాన్ని కొనుగోలు చేయడం, వన్‌–టైమ్‌ సెటిల్‌మెంట్, అవకాశాలకు అనుగుణంగా లేదా ప్రత్యేక పరిస్థితుల లావాదేవీల వంటివి ఇందులో ఉన్నాయి.   ► విదేశీ ప్రత్యక్ష పెట్టుబడులు, ఫారిన్‌ పోర్ట్‌ఫోలియో ఇన్వెస్ట్‌మెంట్‌ వంటి ఆఫ్‌షోర్‌ మార్గంలో లేదా ఏఐఎఫ్, ఎన్‌బీఎఫ్‌సీ, అసెట్‌ రీకన్‌స్ట్రక్షన్‌ కంపెనీ ఏర్పాటు ద్వారా ఆన్‌షోర్‌ పెట్టుబడులు ద్వారా ప్రైవేటు రుణ మార్కెట్‌ మరింత విస్తరించే వీలుంది.


 - అవినీతి విధానాలకు పాల్పడతాయ్
 - ఎర్నస్ట్ అండ్ యంగ్ సర్వే
 న్యూఢిల్లీ: అధిక వృద్ధిని కనపర్చాల్సిన ఒత్తిడి కారణంగా చాలా మటుకు కంపెనీలు లాభాలు పెంచి చూపడం, అవినీతి విధానాలకు పాల్పడటం వంటివి చేస్తున్నాయని దేశీయంగా అత్యధిక సంఖ్యలో ఉద్యోగులు భావిస్తున్నారు. అలాగే, వ్యాపారాలకు సంబంధించి లంచాలివ్వడం, అవినీతికి పాల్పడటం మొదలైనవి సర్వసాధారణమని వారు అభిప్రాయపడుతున్నారు.
 
 అంతర్జాతీయ అకౌంటెన్సీ సంస్థ ఈవై(ఎర్నస్ట్ అండ్ యంగ్)నిర్వహించిన సర్వేలో పాల్గొన్న వారిలో 80% మంది ఈ విధమైన అభిప్రాయాలు వెల్లడించారు. కంపెనీలు తమ పనితీరును ఉన్నదానికంటే ఎక్కువగా చూపిస్తుంటాయని, ఇందుకోసం అవి ఆర్థిక ఫలితాల్లో అవకతవకలకు పాల్పడుతుంటాయని 40% మంది భావిస్తున్నట్లు ఈవై పేర్కొంది. అనేక సవాళ్లతో కూడిన పరిస్థితుల నడుమ కంపెనీలు నడుస్తున్నాయని, వ్యాపారంలో వృద్ధి కనపర్చేందుకు కొంగొత్త ఆదాయ మార్గాలు అన్వేషించడం కోసం యాజమాన్యంపై తీవ్ర ఒత్తిడి ఉంటోందని వివరించింది.
  
 నైతికతపై పెరుగుతున్న అవగాహన ..
 వ్యాపారాల్లో నైతిక విలువల గురించి అవగాహన పెరుగుతోన్నట్లు సర్వే ద్వారా వెల్లడైందని ఈవై  పార్ట్‌నర్ అర్పిందర్ సింగ్ తెలిపారు. నియంత్రణ సంస్థలు మరింత క్రియాశీలకంగా వ్యవహరిస్తుండటంతో పరిస్థితులు మారుతున్నాయని, ఇది భారతీయ వ్యాపారాలపై సానుకూల ప్రభావం చూపుతోందని ఆయన పేర్కొన్నారు. సర్వే ప్రకారం.. భారత్ ఊహించిన దానికంటే తక్కువ ఆర్థిక వృద్ధి సాధిస్తోందని 67 శాతం మంది భావిస్తున్నారు.
 
 ఆర్థిక పరిస్థితులు సంక్లిష్టంగా ఉన్నాయని, ఇలాంటి పరిస్థితుల్లో కంపెనీలు నైతిక నియమావళికి కట్టుబడి ఉండాలంటే మరింత కసరత్తు చేయాల్సి ఉంటుందని వారు అభిప్రాయపడ్డారు. కొంగొత్త ఆదాయ అవకాశాలను అన్వేషించాలంటూ మేనేజర్లపై తీవ్ర ఒత్తిడి ఉంటోందని 81 శాతం మంది తెలిపారు. అధిక రిస్కులున్న మార్కెట్లలోకి ప్రవేశించాలంటూ ఒత్తిడి పెరుగుతోందని 66 శాతం మంది పేర్కొన్నారు.
 
 కంపెనీలు వ్యక్తిగత బహుమతులు, నగదు చెల్లింపులు ఇవ్వడం లేదా వినోద కార్యక్రమాలు ఏర్పాటు చేయడం సాధారణమేనని 59 శాతం మంది ఉద్యోగులు చెప్పారు. భారత్‌తో పాటు యూరప్, మధ్యప్రాచ్యం, ఆఫ్రికాలోని మొత్తం 38 దేశాల్లో ఈవై ఈ సర్వే నిర్వహించింది. సుమారు 3,800 మంది ఉద్యోగులు ఇందులో పాల్గొన్నారు.