కాళోజీసెంటర్‌/విద్యారణ్యపురి: అన్ని ప్రభుత్వ పాఠశాలల్లోని విద్యార్థులతో శుక్రవారం ప్రధాన మంత్రి నరేంద్ర మోదీ ముఖాముఖి కార్యక్రమం జరగనుంది. ఉదయం 10.45గంటల నుంచి 11.45గంటల వరకు మాట్లాడనున్నారు. ఈమేరకు అవసరమైన ఎల్‌ఈడీ టీవీ, ప్రొజెక్టర్లును విద్యాశాఖ ఏర్పాటు చేసింది. వీడియో కాన్ఫరెన్స్‌ తరహాలో ప్రధాని విద్యార్థులతో మాట్లాడి చదువుపై విద్యార్థుల శ్రద్ధ, పాఠశాలల్లో సమస్యలు, విద్యాబోధన తదితర అంశాలను తెలుసుకోనున్నారు. ప్రధానోపాధ్యాయులతోనూ మాట్లాడుతారని వరంగల్‌ రూరల్‌ డీఈఓ కంకటి నారాయణరెడ్డి తెలిపారు. తొలిసారిగా ప్రధాని విద్యార్థులతో ముఖాముఖిగా మాట్లాడనున్నందున వారిలో ఆనందం వెల్లివిరుస్తోంది. నేటి టెన్త్‌ ప్రీఫైనల్‌ పరీక్ష మధ్యాహ్నం విద్యారణ్యపురి: అన్ని ఉన్నత పాఠశాలల్లో గురువారం పదో తరగతి ప్రీ ఫైనల్‌ పరీక్షలు మధ్యాహ్నం 2గంటల నుంచి 4.45 గంటల వరకు నిర్వహించాలని వరంగల్‌ అర్బన్‌ డీఈఓ కె.నారాయణరెడ్డి ఓ ప్రకటనలో హెచ్‌ఎంలను ఆదేశించారు. ఉదయం 11.45 గంటలకు ప్రధాని మోదీ విద్యార్థులతో ముఖాముఖి కార్యక్రమం ఉన్నందున ఈ నిర్ణయం తీసుకున్నట్లు పేర్కొన్నారు.


 భారతదేశ భావికలలన్నీ మోస్తున్న పిల్లలతో మాట్లాడే అవకాశం లభించినందుకు గర్విస్తున్నానని ప్రధాని నరేంద్రమోడీ అన్నారు. గురుపూజోత్సవం సందర్భంగా ఆయన ఢిల్లీ మానెక్షా ఆడిటోరియంలో విద్యార్థులతో ముఖాముఖిలో మాట్లాడారు. ఒక్క పశ్చిమ బెంగాల్ తప్ప మిగిలిన దేశంలోని 18 లక్షల పాఠశాలల్లో ఈ ప్రసంగాన్ని ప్రత్యక్ష ప్రసారం చేశారు.
 
 ''ఎప్పటికప్పుడు మారుతుండాలి. ఎలా మారాలో అందరూ ఆలోచించాలి. చాలా సమర్థులైన విద్యార్థులు ఎందుకు ఉపాధ్యాయులు కావాలనుకోవడం లేదో అంతా చూడాలి. మంచి టీచర్లకు చాలా డిమాండ్ ఉంది. భారత్ యువదేశం. మన దేశం నుంచి మంచి టీచర్లను ఎగుమతి చేయగలమన్న విశ్వాసం మనం ఇవ్వలేమా? నేను కూడా మంచి ఉపాధ్యాయుడినయ్యి.. దేశానికి సేవ చేయగలనన్న భావన విద్యార్థులలో నెలకొల్పలేమా? సర్వేపల్లి రాధాకృష్ణన్ దేశానికి మంచి సేవ చేశారు. ఆయన తన జయంతి చేయొద్దని, ఉపాధ్యాయ దినోత్సవం చేయాలని దేశానికి చెప్పారు. గొప్పవాళ్లందరి జీవితాలను తీర్చిదిద్దడంలో తల్లి, గురువులే ప్రధానపాత్ర పోషిస్తారు. చిన్న గ్రామంలో ఎవరికైనా మంచి గౌరవం ఉందంటే.. అది కేవలం ఉపాధ్యాయుడికే. ఇంట్లో అమ్మానాన్నలకు చెప్పుకోలేని విషయాలు కూడా ఉపాధ్యాయులకు చెప్పుకోగలం. టీచర్లంటే విద్యార్థుల పాలిట హీరోలు.
 
 మీరు ఎంత పెద్ద స్థానంలో ఉన్నా, ఏ పని చేస్తున్నా కూడా.. వారంలో ఒక్క రోజు.. ఒక్క గంట పాటు వెళ్లి ఏదో ఒక పాఠశాలలో పాఠాలు బోధించండి. అన్ని రకాల శక్తులు కలిసి విద్యార్థులకు తమ విజ్ఞనాన్ని అందిస్తే మంచిది. మంచి లక్ష్యాలు ఉంటే.. పరిస్థితులు ఏ ఒక్కరినీ ఆపలేవు. భారతదేశంలో పిల్లలకు కావల్సినంత సామర్థ్యం ఉంది. మీలో ఎంతమందికి ప్రతిరోజూ చెమట పడుతుంది? ఒక్కళ్లకు కూడా లేదు కదూ.. ఆటపాటలు లేకపోతే జీవితం అసంపూర్ణమే. ఈ వయసులో కనీసం రోజుకు నాలుగైదు సార్లు ఒంటినిండా చెమట పట్టాలి. అస్తమాను పుస్తకాలు చదవడం, టీవీలు, కంప్యూటర్లు చూడటం.. ఇదే జీవితం కాదు.. దీనికంటే చాలా ఉంది. తరగతి పుస్తకాలు కాకుండా ఇతర పుస్తకాలు చదివేవాళ్లు ఎంతమంది ఉన్నారు? జీవిత చరిత్రలు ఎంతమంది చదువుతారు... ఇది చాలా తక్కువే. ఇప్పుడు పనులన్నీ గూగుల్ గురువే చేస్తారు. ఏ సమస్య ఉన్నా గూగుల్ గురువే చెబుతుంది. అది సరికాదు. గురుముఖతః నేర్చుకుంటే మంచిది'' అని ఆయన చెప్పారు.