విజయవాడ: కృష్ణా జిల్లా విజయవాడలో ఏపీ కేబినెట్ భేటీ ప్రారంభమైంది. ఉద్యోగాల భర్తీ, నిరుద్యోగుల వయో పరిమితి పెంపు, ఇసుక పాలసీ, కృష్ణా పుష్కరాలు, తాగునీటి సమస్య, ఇళ్ల ప్రారంభోత్సవాలు, పోలవరం ప్రాజెక్టు అంశాలపై కేబినెట్ భేటీలో మంత్రులతో సీఎం చంద్రబాబు నాయుడు చర్చించనున్నారు. రాష్ట్రానికి రావాల్సిన నిధులపై కేంద్రానికి లేఖ రాయాలని ఈ భేటీలో నిర్ణయం తీసుకోనున్నారు. కేబినెట్ భేటీ అనంతరం పార్టీకి చెందిన ముఖ్య నేతలతో సీఎం చంద్రబాబు సమావేశం కానున్నారు.


 హైదరాబాద్: తెలంగాణలో డ్రైపోర్టు, లాజిస్టిక్ హబ్ ఏర్పాటు చేయడానికి కేంద్రం ప్రయత్నాలు చేస్తుందని కేంద్ర వాణిజ్యశాఖ మంత్రి నిర్మలా సీతారామన్ తెలిపారు. హైదరాబాద్లో శనివారం మంత్రి విలేకరులతో మాట్లాడారు. ఏ రాష్ట్రాన్ని ప్రధాని నరేంద్ర మోదీ ప్రభుత్వం మోసం చేయదని ఆంధ్రప్రదేశ్, తెలంగాణ రాష్ట్రాలనుద్దేశించి ఈ సందర్భంగా ఆమె అన్నారు. ఆంధ్రప్రదేశ్కి నిధుల కేటాయింపులపై కసరత్తు జరుగుతుందని మంత్రి తెలిపారు. ఆర్థిక వ్యవస్థను తీర్చిదిద్దుతూ ఒక్కొక్క అడుగు ముందుకు వేస్తున్నామని మంత్రి నిర్మలా సీతారామన్ పేర్కొన్నారు.