హైదరాబాద్‌: టాలీవుడ్‌ లెజెండరీ సంగీత దర్శకుడు ఘంటసాల మనవరాలు, డబ్బింగ్‌ ఆర్టిస్ట్‌ వీణా ఘంటసాల నిశ్చితార్థం చేసేసుకుంది. క్షణం చిత్ర దర్శకుడు రవికాంత్‌ పెరెపుతో కాబోయే వరుడు కావటం విశేషం. ఆగష్టు 12న చెన్నైలో కొంత మంది కుటుంబ సభ్యుల సమక్షంలోనే ఈ కార్యక్రమం జరిగినట్లు సమాచారం.
  
 ఘంటసాల తనయుడు, సీనియర్‌ డబ్బింగ్‌ ఆర్టిస్ట్‌ కమ్‌ నటుడు అయిన ఘంటసాల రత్నకుమార్‌ కూతురే వీణ.  ఆమె కూడా పలు చిత్రాలకు డబ్బింగ్‌ ఆర్టిస్ట్‌గా పని చేసింది. క్షణం సినిమాలో ఆదాశర్మకు డబ్బింగ్‌ చెప్పింది కూడా . ఆ సమయంలోనే రవికాంత్‌-వీణ మధ్య ప్రేమ చిగురించింది. తర్వాత పెద్దలను ఒప్పించి వీరు ఎట్టకేలకు నిశ్చితార్థం చేసేసుకున్నారు. నవంబర్‌ 11న వీరి వివాహం ఘనంగా జరగనుంది.
  
 ప్రస్తుతం తన రెండో చిత్రం కోసం స్క్రిప్ట్‌​ రెడీ చేసే పనిలో రవికాంత్‌ పెరెపు బిజీగా ఉన్నాడు. రానా హీరోగా నటించే అవకాశం ఉన్నట్లు తెలుస్తోంది.