గ్లామరస్ పాత్రలతో తన గౌరవాన్ని తగ్గించారని తాప్సీ ఆవేదన వ్యక్తం చేశారు. దక్షిణాదిలో తొలుత తెలుగు చిత్ర పరిశ్రమలో పరిచయమై ఆపై తమిళ సినిమాల్లోకి వచ్చిన ఢిల్లీ బ్యూటీ తాప్సీ. ఇక్కడ ఆడుగళం తదితర చిత్రాల్లో నటించినా మంచి గుర్తింపు తెచ్చుకోలేకపోయారు. ఇప్పుడు తమిళంలో అసలు అవకాశాలు లేవు. తెలుగులో ఒక చిత్రం చేస్తున్నారు. అయితే హిందీలో రెండు భారీ చిత్రాల్లో నటిస్తూ బిజీగా ఉన్నారు. ఈ సందర్భంగా తాప్సీ తన మనోభావాన్ని పంచుకుంటూ తాను నటిగా రంగప్రవేశం చేసినప్పుడు సినీప్రపంచం గురించి ఎక్కువ తెలుసుకోలేకపోయానన్నారు. కథల ఎంపికలోనూ ప్రత్యేక శ్రద్ధ చూపలేదని పేర్కొన్నారు.
 
 దీంతో నటనకు ప్రాధాన్యం లేని చిత్రాలు చాలా చేశానని అన్నారు. అందులో చాలా చిత్రాల్లో తనను గ్లామరస్‌గా నటింపజేశారని వాపోయారు. ముఖ్యంగా తెలుగు చిత్రాల్లో అలాంటి అవకాశాలు ఇచ్చారని అన్నారు. తద్వారా తన గౌరవాన్ని తగ్గించి ఎక్కువగా అలాంటి అవకాశాలే ఇచ్చారన్నారు. అందుకే తనలోని నటనా ప్రతిభకు అవకాశం రాలేదనే అభిప్రాయాన్ని వ్యక్తం చేశారు. అయితే తాజాగా నటిస్తున్న హిందీ చిత్రాల్లో నటనకు అవకాశం ఉన్న పాత్రలు పోషిస్తున్నట్లు చెప్పారు.
 
 ఈ చిత్రాల ద్వారా నటిగా తానేమిటో నిరూపించుకుంటానని అన్నారు. బాలీవుడ్‌లో ప్రతిభావంతులైన నటీ మణులు చాలా మంది ఉన్నారని, వారితో పోటీ పడడం అంత సులభం కాదని అన్నారు. అయినా తనకంటూ ఒక స్థానాన్ని సంపాదించుకోవడానికి పోరాడతానని బాలీవుడ్‌లో మంచి నటిగా గుర్తింపు పొందిన తరువాతనే ఇతర భాషా చిత్రాల్లో నటిస్తానని తాప్సీ అంటున్నారు.


 హీరోయిన్లలో అందం, అభినయం ఎంత ఉన్నా అదృష్టం ఉండాలి. దాని కోసం పోరాడుతోంది నటి అక్షరగౌడ. ఈ కన్నడ భామ చాలా కాలం క్రితం గీత రచయిత స్నేహన్ హీరోగా నటించిన తురు 420 చిత్రం ద్వారా తమిళ చిత్ర పరిశ్రమకు పరిచయమైంది. ఆ చిత్రం పెద్దగా ఆడకపోవడంతో ఈ అమ్మడికి గుర్తింపు రాలేదు. ఆ తరువాత తుపాకీ, ఆరంభం చిత్రాల్లో చిన్న గ్లామరస్ పాత్రల్లో మెరిసి పోయింది. అవీ అక్షరగౌడకు కేరీర్‌కు ఉపయోగపడలేదు.అప్పటి నుంచి హీరోయిన్ అవకాశాల కోసం పోరాటం చేస్తూనే ఉంది. ఎట్టకేలకు ఇప్పటికి ఒక మంచి అవకాశాన్ని దక్కించుకుంది. వరుస విజయాలతో మంచి జోరు మీదున్న జయంరవితో రొమాన్స్ చేయనుంది.
 
 మిరుదన్ చిత్రం తరువాత జయంరవి నటిస్తున్న చిత్రం భోగం. ఇందులో హన్సిక ఒక హీరోయిన్‌గా నటిస్తున్నారు. ఇంతకు ముందు వీరిద్దరు కలిసి నటించిన రోమియోజూలియెట్ వంటి విజయవంతమైన చిత్రాన్ని తెరకెక్కించిన లక్ష్మణన్ ఈ తాజా చిత్రానికి దర్శకత్వం వహిస్తున్నారు. రోమియోజూలియెట్ చిత్రంలో జయంరవితో హన్సికతో పాటు మరో పాత్రలో నటి పూనంబాజ్వా నటించిన తరహాలో ఈ చిత్రంలో నటి అక్షరగౌడ నటిస్తోందట. ఇందులో తన అందాలారబోతకు కొరత ఉండదట.అయితే ఈ భోగం చిత్రంతో నైనా ఈ కన్నడ బ్యూటీకి కోలీవుడ్‌లో యోగం వస్తుందా? అన్నదే వేచి చూడాలి.