పాతికేళ్లు నిండిన ఎవరినైనా టాలీవుడ్‌లో నలుగురు హీరోల పేర్లు చెప్పమంటే వచ్చే సమాధానం చిరంజీవి, బాలకృష్ణ, నాగార్జున, వెంకటేశ్. మూడు దశాబ్దాలుగా తెలుగు సినిమాపై ముద్ర వేసిన ఈ నలుగురు హీరోలతో సినిమాలు చేయడానికి ఒకప్పుడు హీరోయిన్లు పోటీ పడేవారు. ఒక్క చాన్స్ కోసం వెయ్యికళ్లతో ఎదురు చూసేవారు. సీనియర్ హీరోలుగా ఉన్నప్పుడు కూడా నిండా ఇరవై నిండని అమ్మాయిలు హీరోయిన్లుగా వీళ్లతో ఆడి పాడేవారు. కానీ ఇప్పుడు ఆ నలుగురు హీరోలు సీనియర్స్ కేటగిరీని కూడా దాటిపోయారు. వాళ్ల సినిమాలకు మెగాఫోన్ పట్టడానికి ఇప్పటికీ డెరైక్టర్లు పోటీ పడుతున్నారన్నది నిజమే కానీ... జోడీ కట్టడానికి మాత్రం హీరోయిన్లు కరువైపోతున్నారు.
 
 చిరు, బాలయ్య, నాగ్, వెంకీలతో జతకట్టడానికి యంగ్ హీరోయిన్స్ వెనకడుగు వేస్తున్నారు. ఆ మాటకొస్తే కొత్త హీరోయిన్స్‌ను ఈ సూపర్ సీనియర్లకు మ్యాచ్ చేయడం డెరైక్టర్లకు కూడా ఇబ్బందిగా మారుతోంది. ఈ పరిస్థితిపై పూర్తి కథనం ఈ రోజు మధ్యాహ్నం 12.30 ని.లకు సాక్షి టీవీలో ప్రసారమయ్యే ‘హీరోయిన్ కావలెను’ స్పెషల్ డ్రైవ్‌లో చూడొచ్చు.


 తాను సినిమా చేయడానికి నిర్మాత, దర్శకుడు, కథ.. అన్నీ సిద్ధమైపోయినా మూడు నెలల పాటు హీరోయిన్ దొరకలేదని సంచలన హీరో సంపూర్ణేష్ బాబు తెలిపాడు. 'సాక్షి' కార్యాలయానికి వచ్చిన ఆయన ఈ సందర్భంగా మాట్లాడినప్పుడు.. హృదయ కాలేయం సినిమా ఆలస్యం కావడానికి, దాదాపు ఏడాది పాటు బయటకు రాకపోవడానికి కారణమేంటని ప్రశ్నించినప్పుడు ఈ విషయం బయటపెట్టాడు. నిజానికి తన పక్కన హీరోయిన్గా నటించడానికి ఎవరూ ముందుకు రాలేదని, మూడు నెలల పాటు వెతికి వెతికి, చివరకు తప్పనిసరైతే ఎవరైనా అబ్బాయికే అమ్మాయి వేషం వేయించి అయినా హీరోయిన్గా పెట్టేద్దామని అనుకుంటుండగా ఈ హీరోయిన్ దొరికిందని, దాంతో ఇక అప్పటినుంచి ప్రాజెక్టు వేగం పుంజుకుందని చెప్పాడు.
 
 ప్రేక్షకుల నుంచి ఇంత ఆదరణ లభిస్తుందని తాను అస్సలు ఊహించలేదని, కానీ స్వదేశంతో పాటు విదేశాల్లో కూడా ప్రేక్షక దేవుళ్లు విపరీతంగా ఆదరించారని తెలిపాడు. అమెరికాలో 20 స్క్రీన్లలో ఈ సినిమా విడుదల చేయగా, అక్కడ కూడా ప్రేక్షకులు ఈలలు వేసి, చప్పట్లు కొట్టినట్లు తెలిసిందని, వాళ్ల అభిమానానికి తాను ఎంతగానో రుణపడి ఉంటానని అన్నాడు. రాబోయే సినిమా 'కొబ్బరిమట్ట'ను కూడా ప్రేక్షకులు ఇదే స్థాయిలో ఆదరిస్తారని ఆశిస్తున్నట్లు తెలిపాడు.