సీతారాం అనే వ్యక్తి తను నమ్మిన సిద్ధాంతాల గురించి ఏం చేశాడు? అతని జీవితంలో ఎలాంటి మార్పులు చోటుచేసుకున్నాయి? అనే కథాంశంతో వస్తున్న చిత్రం ‘హితుడు’. జగపతిబాబు, మీరా నందన్ జంటగా  కేఎస్వీ నిర్మిస్తున్న ఈ చిత్రానికి విప్లవ్ దర్శకుడు.  ఈ చిత్రం మోషన్ పోస్టర్‌ను  హైదరాబాద్‌లో విడుదల చేశారు. జగపతిబాబు మాట్లాడుతూ -‘‘మాస్టర్, నక్సలైట్ పాత్రల్లో కనిపిస్తాను. ఇవి నాకు చాలా చాలెంజింగ్ రోల్స్. ఓ మంచి సినిమా చూశామన్న సంతృప్తి ప్రేక్షకులకు కచ్చితంగా కలుగుతుంది’’ అని తెలిపారు. నిర్మాత మాట్లాడుతూ -‘‘హీరో  విప్లవ్ తొలి ప్రయత్నమైనా  చాలా బాగా తీశారు. ఓ సామాజిక అవసరాన్ని గుర్తు చేస్తూ ఈ చిత్రాన్ని రూపొందించాం’’ అని అన్నారు. ఈ కార్యక్రమంలో బెనర్జీ, సీవీ నరసింహరావు తదితరులు పాల్గొన్నారు.
  


  ‘‘సామాజికంగా మన బాధ్యతలను, ఆదర్శవంతమైన విలువలను చూపించడంలో ‘హితుడు’ సినిమా విజయం సాధించిందని, ఇలాంటి చిత్రాలను ప్రోత్సహించడం మన బాధ్యత’’ అని పాటల రచయిత అనంత శ్రీరామ్ అన్నారు. జగపతిబాబు, మీరానందన్ జంటగా, విప్లవ్ దర్శకత్వంలో సుంకర మధు మురళి నిర్మించిన ఈ చిత్రానికి మేధావులు, సినీ పరిశ్రమ నుంచి మంచి స్పందన లభిస్తోంది. సీనియర్ సంపాదకుడు ఏబీకె ప్రసాద్, తెలంగాణా ప్రెస్ అకాడమీ చైర్మన్ అల్లం నారాయణ, నమస్తే తెలంగాణ పత్రిక ఎడిటర్ కట్టా శేఖర్‌రెడ్డి ఈ చిత్రాన్ని చూసి, నిర్మాతను అభినందించారు.