ఐఐఎం-ఇండోర్ గ్రాడ్యుయేట్‌కు దక్కిన అదృష్టం
  ఇండోర్: సంవత్సరానికి ముప్పై రెండు లక్షల రూపాయలు... ఇండియన్ ఇన్‌స్టిట్యూట్ ఆఫ్ మేనేజ్‌మెంట్(ఐఐఎం)-ఇండోర్‌కు చెందిన విద్యార్థికి ఓ భారతీయ కంపెనీ ఆఫర్ చేసిన వార్షిక వేతనమిదీ. అయితే ఇది గతేడాది ఇదే సంస్థకు చెందిన విద్యార్థికి ఆఫర్ చేసిన మొత్తం కంటే రూ.రెండు లక్షలు తక్కువ కావడం గమనార్హం.
  
   ఐఐఎం-ఇండోర్‌లో నిర్వహించిన ప్లేస్‌మెంట్ కార్యక్రమంలో 2012-14 బ్యాచ్‌కు చెందిన ఓ విద్యార్థికి రూ.32 లక్షల వార్షిక వేతనాన్ని భారతీయ కంపెనీ ఒకటి ఆఫర్ చేసినట్టు సంస్థ ప్రతినిధి ఒకరు ఆదివారం తెలిపారు. సదరు కంపెనీ వివరాలను మాత్రం ఆయన వెల్లడించలేదు. 2012-14 బ్యాచ్‌కు చెందిన మొత్తం 475 మందికి కూడా తాజా ప్లేస్‌మెంట్ ప్రోగ్రాంలో ఉద్యోగాలు లభించినట్టు ఆయన తెలిపారు. ఈ కార్యక్రమంలో పాల్గొన్నవారికి దక్కిన సగటు వార్షిక ప్యాకేజీ రూ.12.13 లక్షలని వివరించారు.