న్యూఢిల్లీ: రష్యాను విశ్వసనీయ మిత్ర దేశంగా ప్రధాని నరేంద్ర మోడీ అభివర్ణించారు. అన్ని కష్టకాలాల్లోనూ భారత్‌కు ఆ దేశం అండగా నిలిచిందని కొనియాడారు. భారత్-రష్యాల మధ్య బంధాన్ని కొత్త శిఖరాలకు చేరాలని అభిలషించారు. ఈ మేరకు గురువారం తనను కలసిన రష్యా ఉప ప్రధాని దిమిత్రీ రోగోజిన్‌కు తన మనసులోని మాట చెప్పారు. ఈ సందర్భంగా రష్యా అధ్యక్షుడు వ్లాదిమిర్ పుతిన్ పంపిన సందేశాన్ని మోడీకి రోగోజిన్ తెలియజేశారు. పుతిన్ భారత్‌తో ప్రత్యేక వ్యూహాత్మక భాగస్వామ్యాన్ని కోరుకుంటున్నట్లు పేర్కొన్నారు.