వాటి స్థానంలో రెండు కొత్త ఐపీఎల్ జట్లకు అవకాశం
  టైటిల్ స్పాన్సరర్‌గా వీవో మొబైల్స్
  నవంబర్ 9న ఏజీఎం
  బీసీసీఐ వర్కింగ్ కమిటీ నిర్ణయాలు
  
  ముంబై: స్పాట్ ఫిక్సింగ్, బెట్టింగ్ కుంభకోణంతో మసకబారిన ప్రతిష్టను పెంచుకునేందుకు భారత క్రికెట్ నియంత్రణ మండలి (బీసీసీఐ) నడుం బిగించింది. రెండేళ్ల పాటు సస్పెన్షన్‌కు గురైన చెన్నై సూపర్ కింగ్స్, రాజస్తాన్ రాయల్స్ ఫ్రాంచైజీలను పూర్తిగా రద్దు చేయకుండా... వాటి స్థానంలో మరో రెండు కొత్త జట్లను తీసుకోవాలని బీసీసీఐ నిర్ణయించింది. ఈమేరకు వచ్చే రెండు సీజన్ల కోసం రెండు కొత్త జట్లను ఎంపిక చేసేందుకు బిడ్స్‌ను ఆహ్వానించనుంది. దీంతో ఐపీఎల్‌ను ఎనిమిది జట్లతోనే జరుపుతామని బోర్డు స్పష్టం చేసినట్టయ్యింది. బీసీసీఐ నూతన అధ్యక్షుడు శశాంక్ మనోహర్ అధ్యక్షతన జరిగిన వర్కింగ్ కమిటీ సమావేశంలో సభ్యులు పలు కీలక నిర్ణయాలు తీసుకున్నారు.
  
  జస్టిస్ లోధా కమిటీ ఇచ్చిన తీర్పును యథాతథంగా అమలు చేయాలని సభ్యులు భావించారు. దీంతో 2016, 2017 సీజన్‌లకు చెన్నై, రాజస్తాన్ జట్లు దూరంగా ఉంటాయి. వీటి స్థానాలను మరో రెండు కొత్త జట్లు భర్తీ చేస్తాయి. అందరూ ఊహించినట్టుగానే ఈ మాజీ చాంపియన్లను రద్దు చేసేందుకు మెజారిటీ సభ్యుల నుంచి వ్యతిరేకత ఎదురైంది. దీంతో రెండేళ్ల అనంతరం... అంటే 2018 సీజన్ నుంచి ఇవి తిరిగి బరిలో ఉంటాయి.
  
  అయితే కొత్తగా చేరిన రెండు జట్లకు తోడు చెన్నై, రాజస్తాన్‌లను కలిపి 2018 సీజన్‌ను పది జట్లతో ఆడిస్తారా.. లేదా అనే విషయంలో బోర్డు స్పష్టత ఇవ్వలేదు. ‘ఐపీఎల్ వర్కింగ్ గ్రూప్ ఇచ్చిన నాలుగు ప్రతిపాదనల్లో ఒక్కదానికి మాత్రమే కమిటీ ఆమోదం తెలిపింది. ఖాళీ అయిన రెండు జట్ల స్థానంలో రెండేళ్ల కోసం బిడ్డింగ్‌ను ఆహ్వానిస్తాం. ఆ తర్వాతే ఐపీఎల్‌ను 10 జట్లతో కొనసాగించాలా? లేక 8 జట్లతోనే ఉంచాలా అని నిర్ణయిస్తాం’ అని లీగ్ చైర్మన్ రాజీవ్ శుక్లా తెలిపారు.
  
  ఐపీఎల్ టైటిల్ స్పాన్సర్‌షిప్ నుంచి రెండేళ్లు ముందుగానే వైదొలిగిన పెప్సీకో స్థానంలో చైనాకు చెందిన వీవో మొబైల్ కంపెనీ హక్కులు దక్కించుకుంది.బోర్డు వార్షిక సాధారణ సర్వసభ్య సమావేశం (ఏజీఎం) నవంబర్ 9న జరుగుతుంది.
  


 ఐపీఎల్ చెన్నై సూపర్ కింగ్స్ ఫ్రాంచైజీని రద్దుచేయాలని సుప్రీంకోర్టు ఆదేశించింది. దోషులుగా తేలినవారిపై చర్యలకు ఎక్స్టెర్నల్ కమిషన్ వేయాలని తెలిపింది. ఐపీఎల్ స్పాట్ ఫిక్సింగ్ కేసుపై విచారణ జరిపిన సుప్రీంకోర్టు ఈ విషయంలో చాలా ఘాటైన వ్యాఖ్యలు చేసింది. బీసీసీఐ ఎన్నికలను షెడ్యూలు ప్రకారమే జరుపుకోవచ్చు గానీ, ముద్గల్ నివేదికలో పేర్లున్నవాళ్లు మాత్రం బీసీసీఐ ఎన్నికల్లో పాల్గొనడానికి వీల్లేదని స్పష్టం చేసింది.
 
 ఇక బీసీసీఐ మాజీ చీఫ్ శ్రీనివాసన్ను సుప్రీం ప్రశ్నలతో ఉక్కిరిబిక్కిరి చేసింది. చెన్నై సూపర్ కింగ్స్ ఫ్రాంచైజీలో వాటాదారుల వివరాలు ఇవ్వాలని తెలిపింది. ఇండియా సిమెంట్స్ యాజమాన్యంలోని సీఎస్కే ఎవరి నియంత్రణలో ఉందని ప్రశ్నించింది. సీఎస్కే కెప్టెన్ ధోనీ ఇండియా సిమెంట్స్లో పనిచేయడంపై కూడా సుప్రీంకోర్టు ఆరా తీసింది. అన్ని రకాల వివాదాలకు తెరదించాలని బీసీసీఐని సర్వోన్నత న్యాయస్థానం ఆదేశించింది.
 
 (చదవండి - చెన్నై సూపర్ కింగ్స్ను రద్దుచేసే అవకాశం)