న్యూఢిల్లీ: ప్రొ రెజ్లింగ్‌ లీగ్‌–2లో జైపూర్‌ నింజాస్‌ జట్టు తొలి పరాజయాన్ని చవిచూసింది. డిఫెండింగ్‌ చాంపియన్‌ ముంబై మహారథి జట్టుతో సోమవారం జరిగిన మ్యాచ్‌లో జైపూర్‌ 3–4 పాయింట్ల తేడాతో ఓడిపోయింది. టోర్నీ ఆరంభంలో రెండు వరుస పరాజయాలను మూటగట్టుకున్న ముంబై... ఆ తర్వాత జరిగిన రెండు మ్యాచ్‌ల్లో గెలిచి ఫామ్‌లోకి వచ్చింది. ముంబై మహారథి జట్టు తరఫున హసనోవ్‌ (74 కేజీలు), వికాస్‌ (65 కేజీలు), రాహుల్‌ అవారే (57 కేజీలు), ఎరీకా వీబ్‌ (75 కేజీలు) విజయం సాధించారు. జైపూర్‌ జట్టులో రీతూ ఫోగట్‌ (48 కేజీలు), బెట్జబెత్‌ (53 కేజీలు), ఎలిజ్బర్‌ (97 కేజీలు) గెలిచారు. మంగళవారం జరిగే మ్యాచ్‌లో ఎన్‌సీఆర్‌ పంజాబ్‌ రాయల్స్‌ జట్టు, యూపీ దంగల్‌తో తలపడుతుంది. 


 న్యూఢిల్లీ: ప్రొ రెజ్లింగ్‌ లీగ్‌–2లో జైపూర్‌ నింజాస్‌ శుభారంభం చేసింది. మంగళవారం జరిగిన లీగ్‌ మ్యాచ్‌లో జైపూర్‌ నింజాస్‌ 5–2తో పంజాబ్‌ రాయల్స్‌ జట్టును ఓడించింది. జైపూర్‌ తరఫున జాకబ్‌ మకరష్‌విలి (74 కేజీలు), పూజా ధండా (58 కేజీలు), జెన్నీ ఫ్రాన్సన్‌ (75 కేజీలు), వినోద్‌ కుమార్‌ ఓంప్రకాశ్‌ (70 కేజీలు), ఎలిజ్‌బార్‌ ఒలికద్జే (97 కేజీలు) తమ బౌట్‌లలో గెలుపొందారు.
 
 పంజాబ్‌ జట్టుకు ప్రస్తుత ఒలింపిక్‌ చాంపియన్‌ వ్లాదిమిర్‌ ఖిన్‌చెగష్‌విలి (57 కేజీలు), ఒడునాయో అడెకురోయె (53 కేజీలు) విజయాలను అందించారు. బుధవారం జరిగే మ్యాచ్‌లో యూపీ దంగల్‌తో హరియాణా హ్యామర్స్‌ తలపడుతుంది.