న్యూఢిల్లీ: భారత ఆర్థిక వృద్ధి, ఉపాధి కల్పనలో రత్నాలు, ఆభరణాల రంగం కీలక పాత్ర పోషిస్తోందని కేంద్ర మంత్రి నితిన్‌ గడ్కరీ బుధవారం అన్నారు. అఖిల భారత రత్నాలు, ఆభరణాల దేశీయ మండలి (జీజేసీ) నిర్వహించిన కార్యక్రమంలో ఆయన ప్రసంగిస్తూ రత్నాలు, ఆభరణాల ఎగుమతులను పెంచాల్సిన అవసరం ఉందన్నారు. ‘‘రత్నాలు– ఆభరణాల రంగం ప్రభుత్వానికి వస్తు సేవల పన్ను (జీఎస్‌టీ) చెల్లిస్తుంది. ఉద్యోగ అవకాశాలను కూడా సృష్టిస్తుంది’’ అని రోడ్డు రవాణా, రహదారుల మంత్రి పేర్కొన్నారు. భారత్‌ ఆభరణాల తయారీదారులు అంతర్జాతీయ మార్కెట్లలో సమస్యలను ఎదుర్కొంటున్నారని గడ్కరీ ఈ సందర్భంగా పేర్కొన్నారు. అయితే తమ ఆభరణాల రూపకల్పనను మెరుగుపరచడం ద్వారా తయారీదారులు, వ్యాపారులు ప్రపంచ వజ్రాభరణాల వ్యాపారంలో ఆధిపత్యం చెలాయించగలరన్న విశ్వాసాన్ని గడ్కరీ వ్యక్తం చేశారు.   15–22 తేదీల్లో షాపింగ్‌ ఫెస్టివల్‌ కాగా, ఆభరణాల తయారీదారులు, హోల్‌సేలర్లు, రిటైలర్లు, ఎగుమతిదారుల అత్యున్నత స్థాయి మండలి– జీజేసీ అక్టోబర్‌ 15 నుంచి 22వ తేదీ వరకూ  దేశవ్యాప్తంగా 300 నగరాల్లో జ్యువెలరీ షాపింగ్‌ ఫెస్టివల్‌ను ప్రారంభించనున్నట్లు ప్రకటించింది.


 బంగారు నగల వర్తకుల  బంద్‌తో తగ్గిన ‘పెళ్లి సందడి’
 
 ఎక్సైజ్ డ్యూటీ విధింపును నిరసిస్తూ  14 రోజులుగా కొనసాగుతున్న బంద్
 రూ.25వేల కోట్ల మేరకు నష్టం
 కేంద్రం నిర్ణయం వెనక్కు తీసుకొనే వరకు బంద్ కొనసాగుతుందంటున్న  వ్యాపారులు
  
 బెంగళూరు: జువెలరీ రంగాన్ని ఎక్సైజ్ పరిధిలోకి చేర్చడంతో పాటు ఆభరణాల అమ్మకాలపై 1శాతం పన్నును విధిస్తూ కేంద్ర ప్రభుత్వం తీసుకున్న నిర్ణయాన్ని వెనక్కు తీసుకోవాలనే డిమాండ్‌తో రాష్ట్ర వ్యాప్తంగా ఉన్న ఆభరణాల వ్యాపారులు నిర్వహిస్తున్న నిరవధిక బంద్ బుధవారానికి 14 రోజుకు చేరుకుంది. బంద్ నేపథ్యంలో నగరంలో జువెలరీ షాపులు అధికంగా కనిపించే అవెన్యూ రోడ్, డికెసన్ రోడ్, ఎం.జీ.రోడ్, రిచ్‌మండ్ రోడ్, రాజామార్కెట్ తదితర ప్రాంతాలన్నీ ఖాళీగా కనిపిస్తున్నాయి. ప్రస్తుతం పెళ్లిళ్ల సీజన్ అయినప్పటికీ ఆభరణాల వర్తకుల బంద్ నేపథ్యంలో రాష్ట్ర వ్యాప్తంగా పెళ్లి సందడి తగ్గిపోయింది. గతంలోనే పెళ్లి ముహూర్తాలను నిశ్చయించుకున్న వారు ప్రస్తుతం పెళ్లికి అవసరమైన నగలను కొనుగోలుచేసేందుకు అవకాశం లేక ఇబ్బందులు పడుతున్నారు. అన్ని నగలు కాకపోయినా కనీసం మంగళసూత్రాన్ని కొనుగోలు చేయాలన్నా ఆభరణాల షాపుల బంద్ కారణంగా వీలు కావడం లేదని వాపోతున్నారు. ఇదిలా ఉంటే మరికొంత మంది ఏకంగా పెళ్లిళ్లనే వాయిదా వేసుకుంటున్నారు. కాగా, 2012లో అప్పట్లో కేంద్రంలో అధికారంలో ఉన్న యూపీఏ ప్రభుత్వం ఇదే విధంగా ఎక్సైజ్ సుంకాన్ని విధించాలని నిర్ణయించగా 23 రోజుల పాటు దేశ వ్యాప్తంగా జువెలరీ వ్యాపారులు బంద్ పాటించి తమ నిరసనను తెలియజేడంతో  తన నిర్ణయాన్ని వెనక్కు తీసుకుంది.
 
 రోజుకు రూ.250 కోట్ల లావాదేవీలు.....
 కర్ణాటక వ్యాప్తంగా మొత్తం 25వేల బంగారు దుకాణాలు ఉండగా, ఇందులో సేల్స్‌మన్లు, గోల్డ్‌స్మిత్‌లు ఇలా వివిధ విభాగాల్లోని కార్మికులు మొత్తం ఐదు లక్షల మంది ఉంటారని కర్ణాటక జువెలర్స్ అసోషియేషన్ అధ్యక్షుడు టి.ఎ.శరవణ చెబుతున్నారు. రాష్ట్ర వ్యాప్తంగా ఉన్న జువెలరీ షాపుల్లో రోజుకు రూ.250 కోట్ల మేరకు లావాదేవీలు జరిగేవని, ఇందులో 40శాతం వరకు బెంగళూరులోని దుకాణాల నుంచే జరుగుతున్నాయని శరవణ చెబుతున్నారు. పదమూడు రోజులుగా ఆభరణాల వ్యాపారులు చేస్తున్న బంద్ కారణంగా జువెలరీ రంగానికి దాదాపు రూ.25వేల కోట్ల మేరకు నష్టం వాటిల్లిందని తెలిపారు. కేంద్ర ప్రభుత్వ నిర్ణయం కారణంగా జువెలరీ రంగంలోని రాష్ట్రానికి చెందిన ఐదు లక్షల మంది కార్మికులతో పాటు దేశ వ్యాప్తంగా ఈ రంగంలో ఉన్న కార్మికులు రోడ్డున పడాల్సి వస్తోందని ఆవేదన వ్యక్తం చేశారు.
  
 ఈనెల 17న ‘ఢిల్లీ చలో’......
 కేంద్ర ప్రభుత్వ నిర్ణయాన్ని తక్షణం వెనక్కు తీసుకోవాలనే డిమాండ్‌తో ఈనెల 17న ‘ఢిల్లీ చలో’ కార్యక్రమాన్ని నిర్వహించనున్నట్లు శరవణ చెబుతున్నారు. ‘ఇప్పటికే ఈ విషయంపై ఎంపీలు దేవేగౌడ, మల్లికార్జున ఖర్గే, కుపేంద్రరెడ్డిలను కలిసి వినతి పత్రాలను అందజేశాం. మా నిరసనను నేరుగా కేంద్ర ప్రభుత్వ దృష్టికి తీసుకొచ్చేందుకు ఈనెల 17న ఢిల్లీ చలో కార్యక్రమాన్ని నిర్వహించనున్నాం. ఢిల్లీలోని రామ్‌లీలా మైదానంలో దేశ వ్యాప్తంగా ఉన్న దాదాపు పది లక్షల మంది జువెలరీ వ్యాపారులు ఒకే చోట చేరి మా నిరసనను తెలియజేయనున్నాం. కేంద్ర ప్రభుత్వం తన నిర్ణయాన్ని వెనక్కు తీసుకునే వరకు బంద్ కొనసాగిస్తాం’. అని శరవణ వెల్లడించారు.