ముంబై : లైంగిక వేధింపుల నుంచి తప్పించుకునేందుకు ఓ బాలిక(12) నాలుగంతస్తుల భవనంపై నుంచి దూకింది. ఈ సంఘటన రెండు రోజుల క్రితం​ ముంబయిలోని పాల్‌ఘార్‌ జిల్లా ఆల్‌కాపూరి కాలనీలో చోటుచేసుకుంది. స్థానికుల వివరాల ప్రకారం.. ఓ వ్యక్తి ఇంటి వద్ద ఉన్న బాలిక దగ్గరకు వచ్చి కాగితం చూపించి చిరునామా అడిగాడు. అంతేకాక ఆ బాలికకు మాయ మాటలు చెప్పి అడ్రస్‌ చూపించమని తన వెంట తీసుకెళ్లాడు. ఆ వ్యక్తి ఓ భవనంపైకి తీసుకెళ్లి బాలికపై  లైంగిక దాడికి ప్రయత్నించాడు. తీవ్రంగా ప్రతిగటించిన బాలిక అతని నుంచి తప్పించుకోవటానికి భవనం నాలుగో అంతస్తు నుంచి కిందకు దూకేసింది. ఇది గమనించిన స్థానికులు తీవ్ర గాయాలైనా ఆ బాలికను నగరంలోని నాయర్‌ హాస్పిటల్‌కు తరలించారు. ఈ విషయాన్ని స్థానికులు పోలీసులకు తెలిపారు. సంఘటన స్థలానికి చేరుకున్న పోలీసులు కేసు నమోదు చేసి  నిందితుడి కోసం గాలింపు చర్యలు చేపట్టారు.


 న్యూఢిల్లీ: ఐఐటీ చదవడం ఇష్టం లేక ఓ విద్యార్థి తనువు చాలించేందుకు ప్రయత్నించాడు. పాఠశాల విద్యాభ్యాసం తర్వాత తనకు నచ్చిన కోర్సులో కాకుండా తల్లిదండ్రులు ఐఐటీలో చేర్పించారని, ఆ కారణంగా తాను చదవలేకపోతున్నానని తరుచూ స్నేహితులతో చెబుతుండే ఆ విద్యార్థి చివరకు ప్రాణాలు తీసుకునేందుకు నిర్ణయించుకున్నాడు. ఏకంగా తను చదువుకుంటున్నఐఐటీ ఢిల్లీ కాలేజీకి చెందిన హాస్టల్‌ నాలుగో అంతస్తు నుంచి దూకేశాడు. దీంతో అతడికి తీవ్ర గాయాలయ్యాయి.
 
 అతడి కాళ్లకు, తుంటి భాగం దెబ్బతిన్నదని పోలీసులు చెప్పారు. అయితే ప్రస్తుతం అతడి పరిస్ధితి నిలకడగా ఉందని చెప్పారు. ‘తీవ్ర ఒత్తిడి కారణంగా ఆత్మహత్యకు ప్రయత్నించాడని అతడి స్నేహితులు మాకు చెప్పారు’ అని పోలీసులు చెప్పారు. తొలుత ఓ స్నేహితుడితో కలిసి సాధారణ స్థితిలోనే మాట్లాడేందుకు కొద్ది దూరం బాల్కనీలో నడిచిన ఆ విద్యార్థి నాలుగో అంతస్తుకు చేరుకుంటుంగా ఒక్కసారిగా పరుగెత్తి దూకేసినట్లు వెల్లడించారు.