శ్రీశైలం: కార్తీక మాసం సందర్భంగా శ్రీ భ్రమరాంబా మల్లికార్జున స్వామివార్ల సన్నిధిలో ఆదివారం రాత్రి  కోటి దీపార్చన మహోత్సవానికి తూర్పుగోదావరి జిల్లా తుని సచ్చిదానంద ఆశ్రమ పీఠాధిపతి సచ్చిదానంద సరస్వతి స్వామిజీ హాజరయ్యారు. ప్రధానాలయగోపురం వద్ద ఈఓ భరత్‌ గుప్త స్వామీజీకి బిల్వమాల ఇచ్చి ఆలయ మర్యాదలతో ఆహ్వానం పలికారు. స్వామి అమ్మవార్లను దర్శించుకున్న అనంతరం స్వామీజీ నాగులకట్ట వద్ద ఏర్పాటు చేసిన కోటి దీపోత్సవ మహోత్సవంలో పాల్గొని శాస్త్రోక్తపూజల అనంతరం దీపార్చనను ప్రారంభించారు. 
  


 ఆత్మకూరు : కార్తీక మాసాన్ని పురస్కరించుకుని ఆత్మకూరు మండలంలోని పంపనూరులో వెలసిన సుబ్రహ్మణ్యేశ్వర స్వామి ఆలయంలో ఆదివారం సాయంత్రం కోటి దీపార్చనను నేత్రపర్వంగా నిర్వహించారు. కార్యక్రమంలో జిల్లా వ్యాప్తంగా వచ్చిన భక్తులు పెద్ద సంఖ్యలో పాల్గొని దీపాలను వెలిగించారు. దీప కాంతులతో ఆలయ ప్రాంగణం దేదీప్యమానంగా వెలుగొందింది. కార్యక్రమాన్ని ప్రధాన అర్చకులు రాము, అన్నదాన కమిటీ చైర్మన్‌ సత్యరంగయ్య, ఆలయ కమిటీ చైర్మన్‌ తలుపూరు కృష్ణారెడ్డి, సర్పంచ్‌ పద్మావతి పర్యవేక్షించారు.