సాక్షి, హైదరాబాద్‌: నల్లగొండ ఎంపీ ఉత్తమ్‌కుమార్‌రెడ్డిపై సొంత పార్టీకి చెందిన మాజీ ఎంపీ, సీనియర్‌ నేత వి. హనుమంతరావు ధ్వజమెత్తారు. తాను అంబర్‌పేట నియో జకవర్గం నుంచే గతంలో గెలిచి మంత్రిని అయ్యానని, ఆ నియోజకవర్గం అభివృద్ధి కోసం పాటుపడ్డానని, తాను అక్కడ లక్ష్మణ్‌యాదవ్‌కు టికెట్‌ అడుగుతుంటే ఉత్తమ్‌ కుమార్‌రెడ్డి జోక్యం చేసుకుంటున్నారని ఆదివారం హైదరాబాద్‌లోని తన నివా సంలో విలేకరులతో మాట్లాడుతూ వెల్లడించారు. శ్రీకాంత్‌గౌడ్‌ అనే వ్యక్తి తనపై ఎస్సీ, ఎస్టీ అట్రాసిటీ కేసు పెట్టాడని, ఆయన్ని ప్రోత్సహిస్తూ తనపై ఉత్తమ్‌ దుష్ప్రచారం చేస్తున్నారని చెప్పారు. సూర్యాపేటలో బీసీ గర్జన సభ పెడతానని అంటే ఉత్తమ్‌ పెట్టనీయలేదని, ఆయనకు బీసీ ఓట్లు కావాలి కానీ, బీసీల మీటింగ్‌ వద్దా అని ప్రశ్నించారు. తన మనుషులైన మహేశ్వర్‌రెడ్డి, గూడూరు నారాయణరెడ్డిలను పార్టీ నుంచి బయటకు పంపింది ఉత్తమేనని ఆరోపించారు. పార్టీ మారుతున్నానని ప్రచారం చేసుకుని, బ్లాక్‌మెయిల్‌ చేసి ఉత్తమ్‌ స్క్రీనింగ్‌ కమిటీ లాంటి పదవులు తెచ్చుకున్నాడని విమర్శించారు. అంబర్‌పేట సీటు జోలికొస్తే ఉత్తమ్‌ వెంటపడుతానని హెచ్చరించారు. పార్టీ నుంచి చాలా మందిని బయటకు వెళ్లేలా చేసిన ఉత్తమ్‌ తనను కూడా పంపాలని కుట్ర పన్నుతున్నాడని, తాను గాంధీ కుటుంబానికి విధేయుడినని వీహెచ్‌ స్పష్టం చేశారు.


 జవహర్‌నగర్ (హైదరాబాద్): మాస్క్‌లు ధరించిన ఇద్దరు దుండగులు పట్టపగలే ఓ ఇంట్లోకి చొరబడ్డారు. ఒంటరిగా ఉన్న మహిళను కత్తులతో బెదిరించి 8 తులాల బంగారం అపహరించుకుపోయారు. ఈ సంఘటన జవహర్‌నగర్ పోలీస్‌స్టేషన్ పరిధిలో బుధవారం చోటుచేసుకుంది. క్రైం ఎస్‌ఐ రవి, బాధితులు తెలిపిన వివరాల ప్రకారం.. కాప్రా సర్కిల్ పరిధిలోని వంపుగూడలో కావలి లక్ష్మణ్‌యాదవ్, కల్పన(38) దంపతులు నివాసముంటున్నారు. వీరికి ఓ కుమార్తె ,ఒక కుమారుడు ఉన్నారు. లక్ష్మణ్‌యాదవ్ సెంట్రింగ్ పనిచేస్తుండగా పిల్లలు ప్రైవేట్ ఉద్యోగాలు చేస్తున్నారు.
 
 బుధవారం ఉదయం పనిమీద అందరు బయటికి వెళ్లగా కల్పన ఒంటరిగా ఇంట్లో ఉంది. మధ్యాహ్నం 12 గంటల సమయంలో ఇంటి వెనకభాగంలోని ప్రహరీ దూకిన ఇద్దరు దుండగులు ముఖాలకు మాస్క్‌లు ధరించారు. డోర్ బాదడంతో కల్పన తలుపులు తీసింది. ఇంట్లోకి చొరబడిన దుండగులు కత్తులతో చంపుతామని ఆమెను బెదిరించారు. కల్పన మెడలో ఉన్న మూడు తులాల రెండు గొలుసులను లాక్కున్నారు. అనంతరం ఆమెతో బీరువా తెరిపించారు. అందులో ఉన్న మరో ఐదు తులాల బంగారం తీసుకొని ఉడాయించారు. సమాచారం అందుకున్న జవహర్‌నగర్ క్రైం ఎస్‌ఐ రవి సంఘటనా స్థలానికి చేరుకొని బాధితురాలితో మాట్లాడారు. డాగ్‌స్క్వాడ్‌ను రప్పించి వివరాలు సేకరించారు. దుండగులు హిందీ భాషలో మాట్లాడారని బాధితురాలు తెలిపింది.