గాంధీనగర్‌(విజయవాడసెంట్రల్‌): చెట్ల నుంచి రాలిన ఆకులు వాడిపోయి ఎండిపోతాయి. కొన్నాళ్లకు కుళ్లిపోతాయి. ప్రకృతిలో నిత్యం మనం చూసే తంతే. కానీ..లీఫ్‌ ఆర్టిస్ట్‌ శ్రావణ్‌ చేతిలో ఆ ఎండిన ఆకులే జీవం పోసుకుంటాయి. కళాఖండాలై చిగురిస్తాయి. నిత్య నూతనత్వాన్ని సంతరించుకుంటాయి. శాశ్వతమై నిలిచిపోతాయి. రావి చెట్టు ఆకుల అస్థిపంజరాల (లీఫ్‌ స్కెలిటన్‌పై) చూడచక్కని బొమ్మలు గీస్తూ అరుదైన ఈ కళ (లీఫ్‌ఆర్ట్‌)ను పోషిస్తున్నాడు విజయవాడ నగరానికి చెందిన శ్రావణ్‌.    లీఫ్‌ ఆర్ట్‌..   రావి చెట్టు పచ్చి ఆకులను సేకరించాలి. వాటిని కొద్దిరోజులపాటు నీటిలో నానబెట్టాలి. బాగా నాని కుళ్లిన తర్వాత ఆకు ఈనెలపై ఉండే గుజ్జును సున్నితంగా బ్రష్‌తో తొలగించాలి. ఆకుపై గుజ్జును పూర్తిగా తొలగించిన తర్వాత అది స్కెలిటన్‌గా (అస్థిపంజరం) మారుతుంది. దానిని పేపర్ల మధ్య పెట్టి డ్రై చేయాలి. అలా డ్రై చేసిన తరువాత ఏర్పడే ‘లీఫ్‌ స్కెలిటన్‌’ ఉల్లిపొరలా పలుచగా తయారవుతుంది. వాటిపై అందమైన బొమ్మలను గీయడం ‘లీఫ్‌ ఆర్ట్‌. రావి చెట్టు ఆకు స్కెలిటన్‌పై డాక్టర్‌ బీఆర్‌ అంబేడ్కర్‌ చిత్రం  ఆకు స్కెలిటన్‌పై మహాత్మాగాం«ధీ, స్వామి  వివేకానంద, డాక్టర్‌ బీఆర్‌ అంబేడ్కర్, మదర్‌థెరిసా, ఛత్రపతి శివాజీ, పొట్టి శ్రీరాములు, ఏపీజే అబ్దుల్‌ కలాం, మహానేత వైఎస్సార్, సీఎం వైఎస్‌ జగన్‌ చిత్రాలు గీశాడు శ్రావణ్‌. రాజకీయ నాయకులు, దేవతలు, సినీ తారలే కాకుండా వ్యక్తులు కూడా తమ బొమ్మలను ఆకులపై గీయించుకుని ఫ్రేమ్‌ తయారు చేయించి భద్రపరుచుకుంటున్నారు. స్కూల్‌ విద్యార్థులకు శిక్షణ ఇస్తా..    ఆకులను పుస్తకాల మధ్యలో పెట్టి కొన్నాళ్ల తర్వాత తీస్తే వాటిలో పత్రహరితం పోయి ఎండిపోయి కనిపించేవి. అలా ఓ చిన్న పాప చేయడం చూసి వీటిపై బొమ్మలు గీస్తే ఎలా ఉంటుంది? అనే ఆలోచన వచ్చింది. అప్పటి నుంచి బొమ్మలు గీయడం స్టార్ట్‌ చేశాను. లీఫ్‌ స్కెలిటన్‌ ఆర్ట్‌ చేస్తే బాగుంటుందని భావించి ఇలా చేస్తున్నా. నాకు తెలిసిన ఈ కళను మళ్లీ ప్రాచుర్యంలోకి తేవాలని పట్టుదలతో పనిచేస్తున్నా. తెలిసిన కళను చిన్నారులకు నేర్పిస్తున్నా. ఆసక్తి ఉన్న పిల్లలకు ప్రస్తుతం ఉచితంగా శిక్షణనిస్తున్నా. ఈ కళలో అద్భుతాలు సృష్టించి ఆర్ట్‌ గ్యాలరీ ఏర్పాటు చేయలనేది నా కల.   – ఇట్టా శ్రావణ్, లీఫ్‌ ఆర్టిస్ట్‌  పర్యావరణ హితం..  లీఫ్‌ ఆర్ట్‌ చేయాలంటే ఎంతో ఓపిక కావాలి. అంతకంటే ఎక్కువ నైపుణ్యం ఉండాలి. ఉల్లిపొరలా పలుచగా, సున్నితంగా తయారైన లీఫ్‌ స్కెలిటన్‌ను జాగ్రత్తగా హ్యాండిల్‌ చేయాలి. ఏ మాత్రం అటుఇటైనా ఆకు చిరిగిపోతుంది. పైగా పెన్నుతో ఆర్ట్‌ వేయాల్సి ఉంటుంది. బొమ్మ వేయడం ప్రారంభం నుంచి పూర్తయ్యే వరకు ఏకాగ్రత ఉండాలి.  ఈ కళలో శ్రావణ్‌ అద్భుతాలు సృష్టిస్తున్నాడు.  – శ్రీనివాస్, స్ఫూర్తి క్రియేటివ్‌ ఆర్ట్స్‌ 


 పచ్చదనం నుంచి పసుపు వర్ణం పులుముకున్న ఆకులు కొన్ని... సింధూరం రంగు నింపుకున్న పత్రరాజాలు మరికొన్ని. నారింజలా నయనాలకు కనువిందుచేసే దళాలు ఇంకొన్ని. పచ్చగా ఉన్నప్పుడే కాదు, వాడిపోయి, వడలిపోయి, ఎండిపోయిన విభిన్న రకాల ఆకులను సేకరించి ఇంటి అలంకరణలో ఉపయోగించడమంటే ప్రకృతికి మనసులో పెద్ద పీట వేసినట్టే! తక్కువ ఖర్చుతో అద్భుతమైన పర్యావరణ సౌందర్యాన్ని ఇంట్లో ప్రతిష్ఠించాలంటే ఆకులను మించిన అలంకరణ మరేదీ లేదని ఈ కింది చిత్తరువులను చూస్తే మీరూ ఏకీభవిస్తారు.
  
  ఉడెన్ ఫ్రేమ్ ఉన్న పాత అద్దాల కిటికీ తలుపును తీసుకొని, ఆకులను అతికించే వైపు బూడిదరంగు పెయింట్‌ను పై భాగాన, ఆకుపచ్చని పెయింట్‌ను కింది భాగాన స్ప్రే చేయాలి. ఫ్రేమ్ భాగంలో ఆకుల కాడలను టేపుతో అతికించాలి. ఆకులు అద్దంలో నుంచి వేలాడుతున్నట్టుగా కనిపించేలా అమర్చితే చూడముచ్చటైన వాల్ ఫ్రేమ్ రెడీ అయినట్టే! (ఫొటోలో చూపిన విధంగా)
  
  రాలి, వాడిపోయిన కాడలున్న ఆకులను తీసి, బరువైన పెద్ద పుస్తకం మధ్యలో ఉంచాలి. మూడు రోజుల తర్వాత ఆ ఆకులను తీయాలి. ఎండిన ఆకులకు నచ్చిన పెయింట్ వేసి, శాటిన్ రిబ్బన్‌కు (తోరణంలా) అతికించాలి. ఆకుల తోరణాన్ని డోర్, విండో భాగాన అమర్చితే అందంగా కనిపిస్తుంది.
  
  రెండు సన్నని పొడవైన కర్రపుల్లలను ప్లస్ (+) ఆకారంలో పెట్టి, మధ్యలో దారంతో కట్టాలి. రంగురంగుల ఎండిన ఆకులను గుచ్చి, కిందిభాగంలో పూసలు లేదా గంటలు కట్టి, వేలాడదీయాలి. ఈ హ్యాంగర్‌ని కిటికీ దగ్గర వేలాడదీస్తే గాలికి కదులుతూ చూపరులను ఆకట్టుకుంటుంది.
    
  ఆకు డిజైన్ల కోసం ఓ కొత్త ఆలోచన. పాత మ్యాగజీన్ గ్లాసీ పేపర్‌పైన లేదా అందమైన మందపు వస్త్రం పైన ఆకును పెట్టి ఆ షేప్ వచ్చేలా కత్తిరించుకోవాలి. ఆ తర్వాత నచ్చిన రీతిలో ఆ కృత్రిమ ఆకును మరికొన్ని ఆకులతో కలిపి అలంకరించుకోవచ్చు.
    
  పార్టిషన్ కోసం ఈ రోజుల్లో పెద్ద మిర్రర్స్‌ని వాడుతున్నారు. ప్లెయిన్‌గా ఉండే అద్దాలు అలంకరణప్రాయంగా ఉండవు. అందుకని ఎండిన రకరకాల ఆకులను పార్టిషన్ మిర్రర్‌కు (ఫొటోలో చూపిన విధంగా) అతికిస్తే ఆర్టిస్టిక్‌గా ఉంటుంది.