న్యూఢిల్లీ: సాంకేతిక సహాయం, ఇతరత్రా సర్వీసుల ద్వారా అల్పాదాయ సభ్య దేశాలకు ఆర్థిక వనరులు అందుబాటులో ఉండేలా తోడ్పాటు అందించాలని ఏషియన్‌ ఇన్‌ఫ్రాస్ట్రక్చర్‌ ఇన్వెస్ట్‌మెంట్‌ బ్యాంక్‌కి (ఏఐఐబీ) కేంద్ర ఆర్థిక మంత్రి నిర్మలా సీతారామన్‌ సూచించారు. క్లయింట్‌ అవసరాలకు అనుగుణంగా సేవలు అందించే విధానాన్ని మరింత పటిష్టం చేసుకోవాలని పేర్కొన్నారు. ఉజ్బెకిస్తాన్‌లో ఏఐఐబీ బోర్డు గవర్నర్ల 9వ వార్షిక సమావేశం జరగనున్న నేపథ్యంలో బ్యాంక్‌ ప్రెసిడెంట్‌ జిన్‌ లికున్‌తో భేటీ సందర్భంగా ఆమె ఈ విషయాలు తెలిపినట్లు కేంద్ర ఆర్థిక శాఖ మైక్రో బ్లాగింగ్‌ సైటు ఎక్స్‌లో పోస్ట్‌ చేసింది. తొమ్మిదేళ్ల స్వల్ప వ్యవధిలోనే రుణ కార్యకలాపాలను ఏఐఐబీ వేగవంతంగా విస్తరించిందని మంత్రి ప్రశంసించారు. అలాగే సంస్థ గవర్నెన్స్‌ ప్రమాణాలు పాటించడంలోను, వృద్ధి సాధనలోను భారత్‌ కీలకపాత్ర పోషిస్తోందని బ్యాంకు తెలిపింది. మరోవైపు, ఖతార్‌ ఆర్థిక మంత్రి అలీ బిన్‌ అహ్మద్‌ అల్‌ కువారీతో కూడా సీతారామన్‌ భేటీ అయ్యారు. ద్వైపాక్షిక వాణిజ్యం, పెట్టుబడులు తదితర అంశాలపై చర్చించారు. ఏఐఐబీలో భారత్‌ రెండో అతి పెద్ద వాటాదారు, అతి పెద్ద క్లయింట్‌గాను ఉంది. ఆసియా దేశాల్లో మౌలిక సదుపాయాల అభివృద్ధికి ఆర్థిక వనరులను అందించే బహుళపక్ష డెవలప్‌మెంట్‌ బ్యాంకుగా, బీజింగ్‌ కేంద్రంగా ఏఐఐబీ ఏర్పడింది. ఇందులో చైనాకు అత్యధికంగా 2,97,804 షేర్లు ఉండగా, భారత్‌కు 83,673 షేర్లు ఉన్నాయి.


 హైదరాబాద్, బిజినెస్ బ్యూరో: సొంతింటి కల నెరవేర్చుకోవాలనుకుంటున్న అల్పాదాయ వర్గాల కోసం ప్రైవేటు రంగ యాక్సిస్ బ్యాంక్ కొత్త పథకాన్ని ప్రవేశపెట్టింది. నెలవారి ఆదాయం రూ.8,000 ఉంటే చాలు గృహరుణం ఇస్తానంటోంది. సాధారణంగా పలు బ్యాంకులు నెలాదా యం రూ.25,000 ఉంటే కాని గృహరుణం ఇవ్వడానికి ముందుకు రావడం లేదు. కాని యాక్సిస్ మాత్రం రూ,25,000లోపు ఉన్న వారికి కూడా రుణాలను ఇస్తానంటోంది. కాని వీరిపై మాత్రం కొద్దిగా అధిక వడ్డీరేటును వసూలు చేస్తానంటోంది. ఇలాంటి రుణాలపై 10.75% వడ్డీరేటును వసూలు చేస్తున్నట్లు యాక్సిస్ బ్యాంక్ ప్రతినిధి చెప్పారు. అదే జీతం ఆదాయం కాకుండా స్వయం ఉపాధి పొందుతున్న వారు మాత్రం 11% వడ్డీని చెల్లించాల్సి ఉంటుంది. ప్రస్తుతం సాధారణ గృహరుణాలపై కాలపరిమితిని బట్టి 10.25% నుంచి 11.25% వరకు వడ్డీరేటును వసూలు చేస్తోంది.
 
  ఈ ఏడాది రూ.500 నుంచి రూ.1,000 కోట్ల విలువైన చిన్న గృహరుణాలను ఇవ్వాలని లక్ష్యంగా పెట్టుకున్నట్లు ఆ ప్రతినిధి తెలిపారు. ఇప్పుడు పలు రియల్ ఎస్టేట్ సంస్థలు కూడా అఫర్డబుల్ హౌసింగ్ ప్రాజెక్టులను చేపడుతుండగా, ఈ ఆదాయం పరిధిలోకి సుమారు 2.5 కోట్ల కుటుంబాలు ఉన్నట్లు అంచనా. యాక్సిస్ బ్యాంక్ ఏర్పాటై 20 ఏళ్లు నిండిన సందర్భంగా ఈ పథకాన్ని ప్రవేశపెట్టారు.