సినిమా: నటి మడోనా సెబాస్టియన్‌కు విక్రమ్‌ప్రభుతో జత కుదిరింది. ఇంకా చెప్పాలంటే ఈ బ్యూటీ లక్కీచాన్స్‌ను కొట్టేసింది. మలయాళ చిత్రం ప్రేమమ్‌ హీరోయిన్లలో ఒకరైన మడోనా సెబాస్టియన్‌ కోలీవుడ్‌లో నటించింది చాలా తక్కువ చిత్రాలే. అప్పుడెప్పుడో నటుడు ధనుష్‌ స్వీయ దర్శకత్వంలో నటించిన పవర్‌పాండి చిత్రంలో ఆయనతో నటించింది. ఆ తరువాత జుంగాలో అతిథిగా మెరిసింది. అయితే ప్రస్తుతం శశికుమార్‌కు జంటగా కొంబువచ్చ సింగం చిత్రంలో నటిస్తోంది. వీటితో పాటు మలయాళం, కన్నడం చిత్రాల్లోనూ నటిస్తున్న మడోనా సెబాస్టియన్‌కు తాజాగా కోలీవుడ్‌లో మరో అవకాశం వచ్చింది. దర్శకుడు మణిరత్నం చిత్రంలో నటించే లక్కీచాన్స్‌ కొట్టేసింది. మణిరత్నం మెడ్రాస్‌ టాకీస్‌పై ఇరువర్, నేరుక్కునేర్, ఉయిరే, అలైప్పాయుదే, రావణన్, కాట్రు వెళియిడై, సెక్క సివంద వానం చిత్రాలను నిర్మించిన విషయం తెలిసిందే. తాజాగా మల్టీస్టారర్‌తో పొన్నియన్‌ సెల్వన్‌ చిత్రాన్ని లైకా సంస్థతో కలిసి తెరకెక్కించడానికి సన్నాహాలు చేస్తున్నారు. ఆయన నిర్మాతగా తన శిష్యుడు ధనా దర్శకత్వంలో చిత్రాన్ని నిర్మిస్తున్నారు. ఇందులో నటుడు విక్రమ్‌ప్రభు క«థానాయకుడిగా నటిస్తున్నారు. ఆయనకు జంటగా నటి మడోనా సెబాస్టియన్‌ నటించనుంది. ఇక విక్రమ్‌కు సోదరిగా నటి ఐశ్వర్యరాజేశ్‌ నటించనుంది. విశేషం ఏమిటంటే ఈ చిత్రానికి కథ, మాటలను మణిరత్నమే సమకూర్చడం. అంతే కాదు ధనాతో కలిసి కథనాన్ని రాశారు. ఈ చిత్రానికి వానం కొట్టట్టుం అనే టైటిల్‌ను నిర్ణయించారు. దీనికి 96 చిత్రం ఫేమ్‌ గోవింద్‌ వసంత్‌ సంగీతాన్ని, ప్రీతా ఛాయాగ్రహణం అందిస్తున్నారు. త్వరలోనే ఈ చిత్రం తెరకెక్కనుందని సమాచారం. ప్రస్తుతం విక్రమ్‌ప్రభు అసురగురు, వాల్టర్‌ చిత్రాల్లో నటిస్తున్నారన్నది గమనార్హం.

తమిళసినిమా: మలయాళ చిత్రం ప్రేమమ్‌తో బహుభాషా నటిగా పేరు తెచుకున్న యువ నటీమణుల్లో మడోనా సెబాస్టియన్‌ ఒకరు. ఇటీవల ఈ అమ్మడు తమిళంలో విజయ్‌సేతుపతితో నటించిన జుంగా చిత్రం మంచి విజయాన్ని అందుకుంది. సక్సెస్‌ఫుల్‌ నటి అనిపించుకున్నా మడోనాసెబాస్టియన్‌  చిత్రాల ఎంపికలో మాత్రం కాస్త ఎక్కువగా ఆలోచిస్తుందని, వచ్చిన అవకాశాలన్నీ అంగీకరించడంలేదనీ ప్రచారం వైరల్‌ అవుతోంది. ఇలాంటి విషయాల గురించి ఈ బ్యూటీ ఏమంటుందో చూద్దాం. అవును నేను చిత్రాల ఎంపికలో కాస్త ఎక్కువగానే ఆలోచిస్తాను. ఎందుకంటే నా వ్యక్తిగత జీవితానికి సమయం అవసరం. కుటుంబం, మనకు నచ్చిన విషయాల కోసం సమయాన్ని వెచ్చించకుండా శ్రమించి ఫలితం ఏమిటీ? ఎలాంటి కథా పాత్రలను ఎంచుకోవాలన్నది నాకు తెలుసు. ప్రస్తుతం కిచ్చా సుదీప్‌కు జంటగా ఒక కన్నడ చిత్రంలో నటిస్తున్నాను. తరువాత ఒక తెలుగు చిత్రంలో నటించనున్నాను. పలు విధాలుగా భావోద్వేగాలను ప్రదర్శించే పాత్రలను కోరుకుంటున్నాను. నాకు జిమ్‌లో వర్కౌట్స్‌ చేయడం అంటే ఇష్టం. అలాగని స్లిమ్‌గా మారడం నచ్చదు. ఆహారం విషయంలో బాగానే లాగించేస్తాను. సమయం దొరికితే కుటుంబ సభ్యులందరం ఇంట్లోనే ఉంటాం. పనిలేకుండా బయటకు వెళ్లడం ఇష్టం ఉండదు. నా స్నేహితుల్లో అధిక మంది సినిమా రంగానికి సంబంధం లేనివారే. సినిమా రంగంలో సన్నిహితుడు విజయ్‌సేతుపతినే. ప్రేమమ్‌ చిత్రంలో నాతో కలిసి నటించిన సాయిపల్లవి, అనుపమ పరమేశ్వరన్‌తో ఇంతకు ముందు టచ్‌లో ఉన్నాను. ప్రస్తుతం ముగ్గురం బిజీగా ఉండటంతో మాట్లాడుకోవడం కుదరడం లేదు. అయితే అనుపమ పరమేశ్వరన్‌తో అప్పుడప్పుడూ టచ్‌లో ఉన్నా. సాయిపల్లవి కూడా బాగుందనే భావిస్తున్నా. మరో విషయం ఏమిటంటే నేను ఆరేళ్ల వయసులోనే గాయనినయ్యాను. అయితే నటిగా బిజీగా ఉండడం వల్ల పాడటానికిప్పుడు  ప్రాముఖ్యత నివ్వడం లేదు. నాకు సంగీత బృందం ఉంది. త్వరలోనే ఒక తమిళ ఆల్బమ్‌ను విడుదల చేస్తాను అని పేర్కొంది ఈ జాన.

టీ.నగర్‌: నటుడు అరుణ్‌పాండియన్‌తో విజయ్‌సేతుపతి కలిసి నిర్మిస్తున్న చిత్రం జుంగా. సాయేషా, మడోనా, సెబాస్టిన్, శరణ్య, సురేష్‌ మేనన్, రాధారవి, యోగిబాబు నటిస్తున్నారు. సిద్ధార్థ్‌ విపిన్‌ సంగీత దర్శకత్వం వహిస్తున్నారు. ఈ చిత్రం గురించి విజయ్‌ సేతుపతి మాట్లాడుతూ దర్శకుడు గోకుల్, తాను మంచి స్నేహితులమని. ఈ చిత్రాన్ని నిర్మించేందుకు తాను నిర్ణయించిన సమయంలో మరో నిర్మాతగా అరుణ్‌పాండియన్‌ను చేరాల్సిం దిగా కోరానన్నారు. తనపై ఉన్న నమ్మకంతో ఆయన అంగీకరించారని, అధిక బడ్జెట్‌లో ఈ చిత్రం రూపొందుతున్నట్లు తెలిపారు. ఆస్ట్రియా వంటి దేశాల్లో చిత్ర షూటింగ్‌ జరిగిందని, ఈ చిత్రం ఈ నెలాఖరులో విడుదలవుతుందన్నారు. దర్శకుడు గోకుల్‌ మా ట్లాడుతూ ఈ చిత్రంలో విజయ్‌సేతుపతి పిసినారి డాన్‌ పాత్రలో నటిస్తున్నట్లు తెలిపారు. లగ్జరీ కారులో వెళ్లాలనుకున్నప్పుడు లిఫ్ట్‌ అడిగి మరీ కారులో వెళతాడన్నారు. ఇందులో సాయేషా, మడోనా హీరోయిన్లుగా నటిస్తున్నట్లు తెలిపారు. 

.. అంటూ మడోనాను వెల్కమ్‌ చేస్తోంది కన్నడ ఇండస్ట్రీ. మనకు ‘ఈగ’ విలన్‌గా ఎప్పటికీ గుర్తుండిపోయే సుదీప్‌ కన్నడంలో పెద్ద స్టార్‌ హీరో. ఆయన లేటెస్ట్‌ మూవీ ‘కోటిగొబ్బ’ని ఇటీవలే అనౌన్స్‌ చేశారు. అప్పటినుంచి సుదీప్‌ పక్కన హీరోయిన్‌గా ఎవరు యాక్ట్‌ చేస్తారని ఆయన అభిమానులు ఆసక్తిగా ఎదురుచూస్తున్నారు. ఇప్పుడా బంపర్‌ ఆఫర్‌ మలయాళ నటి మడోనా సెబాస్టియన్‌కు లభించింది. డెబ్యూ డైరెక్టర్‌ శివ కార్తీక్‌ డైరెక్ట్‌ చేçస్తున్న ఈ సినిమాను సూరప్ప బాబు నిర్మిస్తున్నారు. మలయాళ ‘ప్రేమమ్‌’తో ఇండస్ట్రీకి ఎంట్రీ ఇచ్చిన మడోనా తమిళంలో విజయ్‌ సేతుపతి, తెలుగు ‘ప్రేమమ్‌’లోనూ కనిపించారు. ఇప్పుడు కన్నడంలోకి  కూడా ఎంట్రీ ఇవ్వడంతో కెరీర్‌ ఇనీషియల్‌ స్టేజ్‌లోనే సౌత్‌లో నాలుగు భాషల్లో యాక్ట్‌ చేసిన క్రెడిట్‌ కొట్టేశారీ కేరళ బ్యూటీ.


 ధనుష్‌ను పట్టించుకోకుండా నటి మడోనా ఆయనకు మూడు చెరువుల నీళ్లు తాగిస్తూ మడోనా.. మజాకా..అనిపిస్తోందనే ప్రచారం ప్రస్తుతం నెటిజన్లకు ఫుల్‌మీల్స్‌గా మారింది. ‘కాదలుం కడందుపోగుం’ చిత్రంతో కోలీవుడ్‌కు దిగుమతైన మాలీవుడ్‌ అమ్మడు మడోనా సెబాస్టియన్‌. తొలి చిత్రంతో పాటు ఇటీవల తాను నటించిన ‘కవన్‌’ చిత్రం విజయం సాధించడంతో అమ్మడికి హెడ్‌వెయిట్‌ పెరిగినట్లుందని కోలీవుడ్‌ టాక్‌. అసలు విషయం ఏంటంటే నటుడు ధనుష్‌ తొలిసారిగా మోగాఫోన్‌ పట్టి తెరకెక్కించిన చిత్రం పవర్‌పాండి.
 రాజ్‌కిరణ్‌ ప్రధాన పాత్ర పోషించిన ఈ చిత్రంలో నటి మడోనా అతిథి పాత్రలో మెరవనుంది. అందుకుగాను ఆమె కోరిన పారితోషికాన్ని ముట్ట చెప్పారు. చిత్రం ఈ నెల 14న తెరపైకి రానున్న నేపథ్యంలో చిత్ర ప్రచారంలో పాల్గొనాలని మడోనాకు ముందుగానే షరతు విధించారట. అయితే ఇప్పుడు అందుకు ఆమె నుంచి ఎలాంటి స్పందన రాలేదట. చిత్ర నిర్మాతల తరపున ఫోన్‌ చేయగా తన ఫోన్‌ స్విచ్‌ ఆఫ్‌ వస్తోందని టాక్‌. వాళ్లను తను అస్సలు లెక్క చేయడం లేదట.
 ఇలా పలుమార్లు చేసినా మడోనా స్పందించకపోవడంతో ధనుష్‌ వర్గం ఆమెకు ఘాటుగానే మెసేజ్‌ పంపారట. దీంతో ఈ అమ్మడు ‘మైండ్‌ యువర్‌ వర్డ్స్‌’ అంటూ సింపుల్‌గా రిప్లై ఇచ్చిందట. కాగా మడోనా చ ర్యలకు ఆగ్రహంతో ఊగిపోతున్న ధనుష్‌ వర్గం ఆమెపై నిర్మాతల మండలిలో ఫిర్యాదు చేయాలని నిర్ణయానికి వచ్చినట్లు కోలీవుడ్‌ వర్గాల సమాచారం. ఇటీవలే పదవీ బాధ్యతలు చేపట్టిన తమిళ సినీ నిర్మాతల మండలి కార్యవర్గానికి తొలి ఫిర్యాదు నటి మడోనాదే కానుంది.


 గాయని సుచిత్ర ట్విట్టర్‌ ద్వారా రాసలీలలంటూ పలువురు ప్రముఖ నటీనటుల ఫొటోలు, వీడియోలు కోలీవుడ్‌లో పెను కలకలాన్నే రేకెత్తిస్తున్నాయి. ఇంకా చెప్పాలంటే తమ గురించి కూడా అలాంటి దృశ్యాలు ప్రచారం అవుతాయేమోనని పలువురు తారలకు దడ పుడుతోందంటున్నారు కోలీవుడ్‌ వర్గాలు. అయితే ఇంకా ఎవరెవరి రాసలీలలు ప్రచారం అవుతాయోయని నెటిజన్లు ఆసక్తిగా ఎదురు చూస్తున్నారు. అలా గాయని సుచిత్ర ట్విట్టర్‌ దెబ్బకు నటీనటులు బెంబేలెత్తిపోతుంటే తాజాగా నటి మడోనా సెబాస్టియన్  మరో బాంబు పేల్చింది.
 ఈ ప్రేమమ్‌ బ్యూటీ తన ట్విట్టర్‌ను ఎవరో హ్యాక్‌ చేశారని తెలిపింది. గాయనీ సుచిత్ర కూడా తన ట్విట్టర్‌ను హ్యాక్‌ చేశారనే వరుసగా రోజూ కొందరి ఆంతరంగిక విషయాలను విడుదల చేస్తూ అలజడి పుట్టించిన విషయం తెలిసిందే. తాజాగా మడోనా ట్విట్టర్‌ హ్యాక్‌ టాక్‌ ఎలాంటి కలకలానికి దారి తీస్తుందోనని తెగ ఇదైపోతున్నారు కోలీవుడ్‌ వర్గాలు. నటి మడోనా సెబాస్టియన్  మాత్రం తన ట్విట్టర్‌ ద్వారా ఎలాంటి విషయాలు వెలువడ్డా తనకు సంబంధం లేదని, అందుకు తాను బాధ్యురాలిని కాదని తెలివిగా ఎస్కేప్‌ అయ్యే ప్రయత్నం చేసింది.
 అదే విధంగా తన ట్విట్టర్‌ను హ్యాక్‌ చేసిన వారిపై సైబర్‌ క్రైమ్‌ పోలీసులకు ఫిర్యాదు చేసే విషయమై చర్చిస్తున్నానని మడోనా సెబాస్టియన్  చెప్పుకొచ్చింది. ఇంకా ఇలాంటి ట్విట్టర్‌ హ్యాక్‌ వార్తలను ఎన్ని వినాల్సి వస్తుందో? వాటికి ఎందరు బలి కానున్నారో వేచి చూడాల్సిందే. ప్రస్తుతం మడోనా విజయ్‌సేతుపతికి జంటగా నటించిన కవన్, ధనుష్‌ దర్శకత్వం వహించిన పవర్‌పాండి చిత్రాలు షూటింగ్‌ను పూర్తి చేసుకుని త్వరలో విడుదలకు ముస్తాబవుతున్నాయి. అంతే కాదు ఆ అమ్మడు హ్యూమన్  ఆష్‌ సమ్‌ఒన్  అనే ఆంగ్ల చిత్రంలోనూ నటిస్తోందన్నది గమనార్హం.


 యువ సంగీత దర్శకుడు, నటుడు జీవీ.ప్రకాశ్‌కుమార్‌తో ప్రేమమ్‌ చిత్రం మడోనా సెబాస్టియన్ రొమాన్స్ కు రెడీ అవుతున్నారు. కోలీవుడ్‌లో ప్రామిసింగ్‌ యువ కథానాయకులలో జీవీ.ప్రకాశ్‌కుమార్‌ ఒకరు.అలాగే యమ బిజీగా ఉన్న హీరోల్లో మొదటి స్థానంలో ఉన్నది ఈయనే. ప్రస్తుతం జీవీ చేతిలో అరడజనుకు పైగా చిత్రాలు ఉన్నాయి.అడంగాదే, 4జీ, సర్వం తాళ మాయం, విర్గిన్ మాప్పిళ్‌లై చిత్రాలతో పాటు, రాంబాలా దర్శకత్వంలో ఒక చిత్రం, శశి దర్శకత్వంలో మరో చిత్రం చేయనున్నారు. తాజాగా మరో చిత్రం కమిట్‌ అయ్యారు. ఇంతకు ముందు విజయ్‌సేతుపతి కథానాయకుడిగా ఆరంజ్‌ మిఠాయ్, రెక్క చిత్రాలను నిర్మించిన గణేశ్‌ తన కామ్న పతాకంపై నిర్మించనున్న తాజా చిత్రంలో జీవీ కథానాయకుడిగా నటించనున్నారు.
 ఇందులో ఆయనకు జంటగా ప్రేమమ్‌ చిత్రం ఫేమ్‌ మడోనా సెబాస్టియన్ నటించనున్నట్లు సమాచారం. దీనికి ఇంతకు ముందు ఈటీ వంటి విజయవంతమైన చిత్రాన్ని తెరకెక్కించిన రవిఅరసు దర్శకత్వం వహించనున్నారు.ఈ చిత్రానికి సంబంధించి నూతన సంవత్సరం సందర్భంగా జనవరి ఒకటవ తేదీన జీవీపై ఫొటో షూట్‌ చేశారు. ఆ ఫొటోలు చూసిన జీవీ.ప్రకాశ్‌ కుమార్‌ చాలా బాగున్నాయంటూ దర్శకుడిని అభినందించారట.ఈ చిత్ర టైటిల్, ఫస్ట్‌లుక్‌ పోస్టర్‌ను సంక్రాంతికి విడుదల చేసే అవకాశం ఉన్నట్లు తెలిసింది. మరో విషయం ఏమిటంటే జీవీ.ప్రకాశ్‌ కుమార్‌ నటించిన బ్రూస్‌లీ చిత్రం త్వరలో తెరపైకి రానుంది.