నటి శిల్పా శెట్టి సినిమాలతో దేశవ్యాప్తంగా గుర్తింపు తెచ్చుకుంటే.. సెలబ్రిటీ బిగ్‌ బ్రదర్‌ షో ద్వారా ప్రపంచవ్యాప్తంగా గుర్తింపు తెచ్చుకున్నారు. తన కెరీర్‌లో దాదాపు 40 చిత్రాల్లో నటించారు శిల్పా శెట్టి. ‘17వ ఏట సినిమాల్లో అడుగుపెట్టాను. ప్రపంచం గురించి, జీవితం గురించి నాకు ఏ మాత్రం అవగాహన లేదు. కానీ ధైర్యంగా ముందుకు వెళ్లడం మాత్రమే చేశానం’టూ చెప్పుకొచ్చారు శిల్పా శెట్టి. హ్యూమన్స్‌ ఆఫ్‌ బాంబేకిచ్చిన ఇంటర్వ్యూలో ఆమె పలు ఆసక్తికర వ్యాఖ్యలు చేశారు. ఆమె మాటల్లోనే.. ‘1993లో వచ్చిన బాజీగర్‌ చిత్రం నా జీవితాన్ని మలుపు తిప్పింది. నన్ను టాప్‌ హీరోయిన్‌ని చేసింది. సినిమాల్లో నటించాలని నేను ఎప్పుడు అనుకోలేదు. సరదాగా ఒక ఫ్యాషన్‌ షోలో పాల్గొన్నాను. అప్పుడు ఓ ఫోటోగ్రాఫర్‌ నా ఫోటోలు తీశాడు. అతనేదో ఊరికే అడగుతున్నాడు అనుకున్నాను. కానీ నిజంగానే నా ఫోటోలు తీశాడు.. అది కూడా చాలా అందంగా. దాంతో నాకు మోడలింగ్‌ అవకాశాలు పెరిగాయి. ఈ క్రమంలోనే బాలీవుడ్‌లో చాన్స్‌ రావడం.. ఆ తర్వాత మరి ఇక నేను వెను తిరిగి చూడాల్సిన అవసరం రాలేదు. అలా ఎంతో ముందుకు.. ఎత్తుకు వెళ్లాను’ అంటూ చెప్పుకొచ్చారు. ‘17 ఏళ్ల వయసు అంటే ప్రపంచం గురించే కాదు జీవితం గురించి కూడా సరైన అవగాహన ఉండదు. కానీ అంత చిన్న వయసులోనే ఓ సెలబ్రిటీని కావడం.. సక్సెస్‌ఫుల్‌గా రాణించడం జరిగిపోయాయి. కానీ అప్పటికి నేనింకా వీటికి తయారుగా లేను. ఇక పోతే నాకు హిందీ రాదు. దాంతో కెమరా ముందు నిల్చోవాలంటేనే ఒణుకు వచ్చేద’ని చెప్పుకొచ్చారు. 2007లో వచ్చిన ‘ఆప్నే’ శిల్పా శెట్టి నటించిన చివరి చిత్రం. ఆ తర్వాత ఆమె సినిమాల్లో కనిపంచలేదు. ఈ విషయం గురించి ఆమె ‘ప్రతి ఒక్కరి జీవితంలో ఇలాంటి ఒక సందర్భం వస్తుంది’ అన్నారు. ‘నేను నటించిన సినిమాల్లో కొన్ని మంచి విజయం సాధించాయి. అయినా కూడా నేను ఇంకా వెనకబడి ఉన్నాననే అనుకునేదాన్ని. మరింత కష్టపడాలని భావించేదాన్ని’ అన్నారు. అంతేకాక ‘ఓ చిత్రం విజయం సాధించినప్పుడు సెలబ్రేట్‌ చేసుకోవడం.. మరో చిత్రం ఫెయిల్‌ అయనప్పుడు బాధపడుతూ మర్చి పోవడానికి ప్రయత్నించడం అనే విషయాలు అంత తేలికైనవేం కాద’న్నారు. అంతేకాక ‘కొన్ని సార్లు సరైన కారణం చెప్పకుండానే నిర్మాతలు తమ సినిమాల నుంచి నన్ను తొలగించేవారు. వారి పేర్లు కూడా నాకు గుర్తు ఉన్నాయి. ఇప్పుడు వాటిని బయట పెట్టడం కూడా అనవసరం. అయితే అలా జరగినప్పుడు ప్రకృతి నాకు వ్యతిరేకంగా పని చేస్తుందని అనుకునేదాన్ని.  కానీ ప్రయత్నించడం మాత్రం ఆపలేదు’ అన్నారు. ఇక ప్రముఖ బ్రిటీష్‌ రియాలిటీ షో ‘సెలబ్రిటీ బిగ్‌ బ్రదర్‌ సీజన్‌ 5లో పాల్గొనడం నిజంగా తన అదృష్టం అన్నారు. ‘ఆ షో నా మీద చాలా ప్రభావం చూపించింది. ఎందుకంటే ఈ ప్రొగ్రాంలో నా దేశం మూలంగా నేను బహిరంగ అవమానానికి, వివక్షకు గురయ్యాను. కానీ షోలో గెలిచిన తర్వాత చాలా మంది ‘మమ్మల్ని గర్వపడేలా చేశావం’టూ మెచ్చుకున్నారు. ‘జీవితంలో కొన్ని సార్లు చాలా క్లిష్ట పరిస్థితులు చూశాను.. మరి కొన్ని సార్లు ఎంతో మధుర క్షణాలు చూశాను. కానీ ప్రతి నిమిషాన్ని ఆస్వాదించాను. ఫలితం ఈ రోజు నేనొక బలమైన స్వతంత్ర మహిళగా, యాక్టర్‌గా, భార్యగా, తల్లిగా మీ ముందు ఇలా నిల్చున్నాను’ అంటూ చెప్పుకొచ్చారు. శిల్పా 2009లో వ్యాపారవేత్త రాజ్‌కుంద్రాను వివాహం చేసుకున్నారు. వీరికొక బాబు వియాన్‌.


 రాజకీయాల్లోకి రాకముందు స్మృతి ఇరానీ పాపులర్ టీవీ ఆర్టిస్ట్గా అందరికీ తెలుసు. మరి అంతకన్నా ముందు?  మిస్ ఇండియా కాంపిటీషన్లో పాల్గొని ఫైనలిస్ట్లలో ఒకరిగా నిలిచిన మోడల్.  స్మృతి యుక్త వయస్సులో ఉన్నప్పటి కొన్ని ఫొటోలు సోషల్ మీడియాలో తిరుగుతూ మరోసారి ఆమె గతం మీద ఆసక్తిని రేపుతున్నాయి.
 
 ఇంటి ఆర్థిక పరిస్థితుల కారణంగా స్మృతి 16 ఏళ్ల వయసులోనే ఢిల్లీలో సౌందర్య సాధనాలు మార్కెటింగ్ చేసే ఓ ఉద్యోగం చేసేదట. దూరవిద్యలో చదువు కొనసాగించేది. తన స్నేహితురాలి సలహాతో తన ఫొటోని ఎవరికీ తెలియకుండా మిస్ ఇండియా పోటీలకు పంపింది. మొదటి వడపోతలో ఎంపికైన తర్వాత తదుపరి పోటీల కోసం ముంబై వెళ్లాల్సి వచ్చింది. అప్పు చేసి పంపించారు తల్లిదండ్రులు.
 
 అందరి అంచనాలను తలక్రిందులు చేస్తూ ఫైనల్స్ వరకు చేరుకుంది.  అయితే కిరీటం మాత్రం చేజారింది... కానీ ఆత్మవిశ్వాసం ఆమెతోనే ఉంది. చేసిన అప్పు తీర్చేందుకు తక్షణమే బాంద్రాలోని ఓ రెస్టారెంట్లో ఉద్యోగానికి చేరింది. అక్కడ టేబుళ్లు శుభ్రం చేయడం దగ్గరి నుంచి ఆర్డర్లు సప్లై చేయడం వరకు అన్ని పనులు చేసేది. మరోవైపు మోడలింగ్లో అవకాశాల కోసం స్టూడియోల చుట్టూ తిరుగుతుండేది.
 
 అలా తొలిసారి టీవీలో ఓ చిన్న ప్రకటనలో మెరిసింది.. ఆ తర్వాత ఓ ఆల్బమ్, రెండు టీవీ సిరీస్లలో కనిపించింది.  ఆ కార్యక్రమాలను శోభా కపూర్ చూడటం.. తన కుమార్తె ఏక్తాకు స్మృతి గురించి చెప్పడం జరిగాయి.  ఏక్తా డైలీ సీరియల్ 'క్యోంకీ సాస్ భీ కభీ బహూ థీ' లో తులసి పాత్ర స్మృతి జీవితాన్నే మలుపు తిప్పింది. కట్ చేస్తే...  మిగిలిన కథ అందరికీ తెలిసిందే.
 
 ప్రస్తుతం ఎంపీగా,  చేనేత, జౌళి శాఖ మంత్రిగా పనిచేస్తున్న ఆమె... చిన్నప్పటి నుంచి జీవితాన్ని చాలెంజింగ్ తీసుకుని పోరాడింది.  మోడల్గా ఉన్నప్పటి స్మృతి ఫొటోలు నెట్టింట్లో కనిపించి ఆమె ప్రయాణాన్ని తెలుసుకునేలా చేస్తున్నాయి.