న్యూఢిల్లీ: కశ్మీర్‌ వేర్పాటువాది షబీర్‌షాపై మనీ ల్యాండరింగ్‌ కేసులో హవాలా డీలర్‌ మహమ్మద్‌ అస్లాం వనీ(36)ని ఎన్‌ఫోర్స్‌మెంట్‌ డైరెక్టరేట్‌ (ఈడీ) ఆదివారం శ్రీనగర్‌లో అరెస్టు చేసింది. అస్లాం విచారణకు సహకరించడంలేదంటూ ఈడీ విన్నవించిన నేపథ్యంలో ఢిల్లీ కోర్టు అతడిపై నాన్‌బెయిలబుల్‌ వారెంట్‌ జారీ చేసింది. అరెస్టు చేసి, ఢిల్లీ చీఫ్‌ మెట్రోపాలిటన్‌ మేజిస్ట్రేట్‌ ముందు అతన్ని హాజరుపర్చారు.
 ఈ కేసులో మరిన్ని వివరాలు రాబట్టేందుకు ప్రధాన నిందితుడు షబీర్‌షాతో కలిపి అస్లాంను విచారించాల్సి ఉందని ఈడీ విన్నవించింది. ఈ మేరకు ఈ నెల 14 వరకు అస్లాంను ఈడీ కస్టడీకి అప్పగిస్తూ మేజిస్ట్రేట్‌ ఆదేశాలిచ్చినట్టు దర్యాప్తు సంస్థ అధికారి ఒకరు తెలిపారు. 2005 కేసులో షాకు రూ.2.25 కోట్లు చేరవేసినందుకు అస్లాంను ఢిల్లీ పోలీసులు అరెస్టు చేశారు. 2010లో ఢిల్లీ కోర్టు... అతడిపైనున్న ఉగ్రవాదులకు నిధుల సరఫరా ఆరోపణలను కొట్టివేసింది. అయితే ఆయుధాల చట్టం కింద శిక్ష విధించింది.


 న్యూఢిల్లీ: నల్లధనాన్ని వెలికితెచ్చే విషయమై ఏర్పాటైన ప్రత్యేక దర్యాప్తు బృందం (సిట్) మంగళవారం సమావేశమైంది. పన్ను ఎగవేత, మనీ ల్యాండరింగ్ కేసులను సమీక్షించింది. ప్రపంచవ్యాప్తంగా సంచలనం రేపిన ‘పనామా పేపర్స్’పై ప్రధానంగా చర్చించింది. సిట్ చైర్మన్ జస్టిస్ (రిటైర్డ్) ఎంబీ షా నేతృత్వంలో జరిగిన భేటీలో ‘పనామా పేపర్స్’పై ఆదాయ పన్ను శాఖ, ఫైనాన్షియల్ ఇంటెలిజెన్స్ యూనిట్ (ఎఫ్‌ఐయూ), ఎన్‌ఫోర్స్‌మెంట్ డెరైక్టరేట్ (ఈడీ) సమర్పించిన నివేదికలపై సమీక్ష నిర్వహించారని అధికారులు తెలిపారు.
 
 పనామా పేపర్స్, రూ. 6 వేల కోట్ల బ్యాంక్ ఆఫ్ బరోడా (ఢిల్లీ బ్రాంచ్) స్కాం కేసుల రికార్డులు, స్థాయీ నివేదిక సమర్పించిన దర్యాప్తు సంస్థలు.. తాము తక్షణమే చర్యలు తీసుకోవాలని నిర్ణయం తీసుకున్నట్లు తెలిపాయి. దాదాపు 500 మంది భారతీయుల పేర్లున్న పనామా పేపర్స్ జాబితా లీకేజీ నేపథ్యంలో ఇంటర్నేషనల్ కన్సోర్షియమ్ ఆఫ్ ఇన్వెస్టిగేటివ్ జర్నలిస్ట్స్, ఓ జాతీయ దినపత్రిక  వెలువరించిన  సమాచారం ఆధారంగా దర్యాప్తు చేయాలని పలు  దర్యాప్తు సంస్థలను సిట్ ఆదేశించిన విషయం తెలిసిందే.