విజయనగరం: ఆంధ్ర, ముంబై జట్ల మధ్య ఇక్కడ జరుగుతున్న మ్యాచ్‌కు వర్షం, వెలుతురు లేమితో అంతరాయం కలిగింది. శుక్రవారం కేవలం 26 ఓవర్ల ఆట మాత్రమే సాధ్యమైంది. 170/2 పరుగుల ఓవర్‌నైట్ స్కోరుతో ఇన్నింగ్స్ కొనసాగించిన ఆంధ్ర రెండో ఆట ముగిసే సరికి 4 వికెట్లకు 213 పరుగులు చేసింది. సెంచరీ పూర్తి చేసుకున్న రికీ భుయ్ (103)తో పాటు ప్రదీప్ (0) వెనుదిరగ్గా...కెప్టెన్ కైఫ్ (311 బంతుల్లో 89 బ్యాటింగ్; 12 ఫోర్లు, 1 సిక్స్), అశ్విన్ (8 బ్యాటింగ్) క్రీజ్‌లో ఉన్నారు.
 
  హైదరాబాద్ 325/9 డిక్లేర్డ్: మరో వైపు గోవాలో జరుగుతున్న మ్యాచ్‌లో హైదరాబాద్ తమ తొలి ఇన్నింగ్స్‌ను 9 వికెట్ల నష్టానికి 325 పరుగుల వద్ద డిక్లేర్ చేసింది. రెండో రోజు మెహదీ హసన్ (38) మినహా ఇతర బ్యాట్స్‌మెన్ రాణించలేదు. అనంతరం గోవా వికెట్ కోల్పోయి 47 పరుగులు చేసింది.
  
  


 భారత్ ‘ఎ' 475/9 డిక్లేర్డ్  ఆస్ట్రేలియా ‘ఎ' 126/6
 బ్రిస్బేన్: నమన్ ఓజా (250 బంతుల్లో 219 నాటౌట్; 29 ఫోర్లు, 8 సిక్సర్లు) ద్విశతకంతో చెలరేగడంతో పాటు బౌలర్లు నిలకడగా రాణించడంతో... ఆస్ట్రేలియా ‘ఎ’తో జరుగుతున్న తొలి అనధికారిక టెస్టు మ్యాచ్‌లో భారత్ ‘ఎ' పట్టు బిగించింది. మ్యాచ్ రెండో రోజు సోమవారం భారత్ ‘ఎ' తమ తొలి ఇన్నింగ్స్‌ను 9 వికెట్ల నష్టానికి 475 పరుగుల వద్ద డిక్లేర్ చేసింది.
 
 అనంతరం ఆట ముగిసే సమయానికి ఆస్ట్రేలియా ‘ఎ’ తమ తొలి ఇన్నింగ్స్‌లో 6 వికెట్లకు 126 పరుగులు మాత్రమే చేసి కష్టాల్లో పడింది. ఫిల్ హ్యూస్ (34)దే అత్యధిక స్కోరు. భారత బౌలర్లలో జస్‌ప్రీత్ బుమ్రా 42 పరుగులిచ్చి 3 వికెట్లు పడగొట్టాడు. ప్రస్తుతం ఆసీస్ మరో 349 పరుగులు వెనుకబడి ఉంది.
  
 ఓజా దూకుడు...
 ఓవర్‌నైట్ స్కోరు 304/6తో రెండో రోజు ఆట ప్రారంభించిన భారత్ ఇన్నింగ్స్‌ను ఓజా నడిపించాడు. సోమవారం భారత్ స్కోరుకు మరో 171 పరుగులు చేరితే... అందులో ఓజా ఒక్కడే 137 పరుగులు సాధించాడు. ఇన్నింగ్స్ ఆసాంతం భారీ షాట్లు ఆడిన ఈ మధ్యప్రదేశ్ క్రికెటర్ సెంచరీ, డబుల్ సెంచరీలను సిక్సర్లతోనే పూర్తి చేసుకోవడం విశేషం.