న్యూఢిల్లీ: కరిష్మా ఢిల్లీలోని ప్రభుత్వ పాఠశాలలో ఎనిమిదో తరగతి చదువుతోంది. ఆమె పాఠశాలలో శనివారం పేరెంట్స్‌-టీచర్స్‌ సమావేశం జరిగింది. ఈ సమావేశంలో మీ బిడ్డ చదువుల్లో వెనుకబడిందని ఉపాధ్యాయులు చెప్పడం.. దాంతో తల్లి తిట్టడంతో మనస్తాపం చెందిన కరిష్మా ఫ్యాన్‌కు ఉరి వేసుకొని ఆత్మహత్య చేసుకుంది. దేశ రాజధాని ఢిల్లీలో శనివారం ఈ ఘటన జరిగింది.    
 
 పాఠశాలలో పేరెంట్స్‌-టీచర్స్‌ మీటింగ్ తర్వాత ఇంటికి వచ్చిన కరిష్మా శనివారం మధ్యాహ్నం ఫ్యాన్‌కు ఉరి వేసుకొని ఆత్మహత్య చేసుకుందని పోలీసులు తెలిపారు. కరిష్మా పేద కుటుంబానికి చెందినది. ఆమె తండ్రి దినసరి వేతన కూలి. తన బిడ్డ కోసం బాగు కోసం తల్లి షాజాహనా తిట్టిందన్న చిన్న కారణంతో కరిష్మా ఆత్మహత్య చేసుకోవడం ఆ పేదకుటుంబంలో విషాదం నింపింది. ఈ ఘటనపై కేసు నమోదుచేసుకొని విచారణ చేపడుతున్నట్టు పోలీసులు తెలిపారు.