‘పోటుగాడు’ ఫేమ్‌ సాక్షీ చౌదరి ప్రధాన పాత్రలో, పర్వీన్‌ రాజ్, పోసాని కృష్ణ మురళి ముఖ్య తారలుగా రూపొందిన సినిమా ‘యేంటి రాజా యూత్‌ ఇలా ఉంది’. ఆది శేషసాయి రెడ్డి దర్శకత్వంలో లార్డ్‌ శివ క్రియేషన్స్‌ పతాకంపై ఎమ్వీఎస్‌ సాయి క్రిష్ణారెడ్డి నిర్మించారు. కిషన్‌ స్వరపరచిన ఈ చిత్రం పాటలను హైదరాబాద్‌లో విడుదల చేశారు. దర్శకులు సముద్ర, దేవీప్రసాద్, నిర్మాత ‘సింధూరపువ్వు’ కృష్ణారెడ్డి ముఖ్య అతిథులుగా హాజరయ్యారు. సాక్షీ చౌదరి మాట్లాడుతూ– ‘‘ప్రస్తుతం చాలామంది తల్లిదండ్రులు సంపాదన కోసం పరుగులు తీస్తూ పిల్లల పెంపకాన్ని నిర్లక్ష్యం చేస్తున్నారు. తల్లిదండ్రుల ఆదరణ కరువైన పిల్లలు ఎలా చెడు దారి పట్టే అవకాశాలు ఉన్నాయో మా చిత్రంలో చూపిస్తున్నాం’’ అన్నారు. ‘‘ఇదొక యూత్‌ఫుల్‌ ఎంటర్‌టైనర్‌. ఈ చిత్రం ద్వారా సొసైటీకి మూడు సందేశాలు ఇస్తున్నా. అవేంటి అన్నది తెరపై చూడాలి’’ అన్నారు ఆది శేషసాయి రెడ్డి. ‘‘సెన్సార్‌ పనులు పూర్తయ్యాయి. ఫస్ట్‌ కాపీ సిద్ధంగా ఉంది. త్వరలోనే విడుదల చేస్తాం’’ అని చిత్ర సమర్పకులు నర్రా సుబ్బయ్య అన్నారు.

‘మా ఆఫీసులో ఓ కత్తిలాంటి ఫిగరుంది’.. అంటూ ప్రారంభమయ్యే ‘యేంటి రాజా యూత్‌  ఇలా ఉంది’ టీజర్‌ అలరిస్తోంది. ‘పోటుగాడు’ ఫేమ్‌ సాక్షీ చౌదరి ప్రధాన పాత్రలో ఆది శేషసాయిరెడ్డి దర్శకత్వంలో లార్డ్‌ శివ క్రియేషన్స్‌ పతాకంపై ఎమ్వీఎస్‌. సాయి కృష్ణారెడ్డి నిర్మించారు. పర్వీన్‌ రాజ్, పోసాని కృష్ణమురళి ముఖ్య పాత్రల్లో నటించిన ఈ సినిమా టీజర్‌ని ‘నిర్మాత ‘దిల్‌’ రాజు రిలీజ్‌ చేశారు. శేష సాయిరెడ్డి మాట్లాడుతూ– ‘‘ఇదొక యూత్‌ఫుల్‌ ఎంటర్‌టైనర్‌. నేటి సమాజంలో యువత ఆలోచనా ధోరణిని ప్రతిబింబిస్తుంది.  అబ్బాయిలైనా, అమ్మాయిలైనా  జీవితాంతం ఒకరి తోడుగానే ఉండాలనే సందేశం ఇచ్చాం.  ఈ నెలాఖరున సినిమాను విడుదల చేసేందుకు సన్నాహాలు చేస్తున్నాం’’ అన్నారు. నాగ రాకేష్, ఇంద్ర, సంతోష్, తదితరులు నటిస్తున్న ఈ చిత్రానికి కెమెరా: శంకర్, సంగీతం: కిషన్‌.


 వైవిధ్యమైన కథాంశంతో థ్రిల్లర్‌గా రూపొందిన చిత్రం ‘ప్లేయర్’. పర్వీన్‌రాజ్ హీరోగా జ్ఞానసాగర్ దర్శకత్వంలో యమున కిషోర్, జగదీశ్ కుమార్ కల్లూరి ఈ చిత్రాన్ని నిర్మించారు. ఈ సినిమా ప్రచార చిత్రాన్ని దర్శకుడు త్రివిక్రమ్ ఇటీవల హైదరాబాద్‌లో ఆవిష్కరించారు. ‘‘ట్రైలర్ చూస్తున్నప్పుడు చాలా ఎగ్జయిటింగ్‌గా అనిపించింది. సినిమా కూడా అలాగే ఉంటుందని భావిస్తున్నా’’ అని త్రివిక్రమ్ అన్నారు. నిర్మాతలు మాట్లాడుతూ -‘‘బ్యాంకాక్, హాంగ్‌కాంగ్ నేపథ్యంలో సాగే ఓ థ్రిల్లర్ మూవీ ఇది. కొత్త పంథాలో ఈ చిత్రాన్ని తెరకెక్కించాం. ఈ నెల 30న ఈ చిత్రాన్ని విడుదల చేయనున్నాం’’ అని తెలిపారు.