→రూ.కోటి విలువైన స్థలం కబ్జాకు యత్నం
 →బోరు తీసి, చురుగ్గా నిర్మాణ పనులు
 →స్థల రక్షణదారుని ఫిర్యాదుతో బాగోతం బట్టబయలు
 →కటకటాల పాలైన భూకబ్జాదారు
 
 పీఎం పాలెం(భీమిలి): సూమారు రూ.కోటి విలువ చేసే భూమిని దర్జాగా కబ్జా చేయడానికి యత్నించి కథ అడ్డం తిరగడంతో ఓ పెద్దమనిషి కటకటాల పాలయ్యాడు. మధురవాడ నార్త్‌ జోన్‌ ఏసీపీ నాగేశ్వరరావు సామవారం సాయంత్రం పీఎంపాలెం పోలీస్‌ స్టేషన్‌లో ఏర్పాటు చేసిన విలేకరుల సమావేశంలో ఇందుకు సంబంధించిన వివరాలు తెలియజేశారు. రిటైర్డ్‌ మెడికల్‌ ఆఫీసర్‌ బండారు మహేశ్వరరావు తన కుమార్తె సుమలతకు పీఎం పాలెం తులసీనగర్‌ సర్వే నంబరు 53/3లో ప్లాట్‌ నంబరు 77లో 340 చదరపు గజాల స్థలం గిఫ్ట్‌డీడ్‌ కింద ఇచ్చారు. ప్రస్తుతం ఆమె భర్తతో పాటు అమెరికాలో ఉంటున్నారు. నగరంలోని పెదవాల్తేరులో నివసిస్తున్న ఆమె మామ చుక్క అప్పలప్రకాశరావు సదరు స్థలం వద్దకు అప్పుడప్పుడూ వస్తూ చూస్తున్నారు.
 
 కబ్జాకు స్కెచ్‌ ఇలా..
 ఇదిలా ఉండగా ఈ భూమిని కొట్టేయడానికి అక్కయ్యపాలెంలో నివసిస్తున్న కృష్ణా జిల్లాకు చెందిన గంధంనేని సూర్యమణిధర్మరాజు కొంతమంది స్థానికుల సహకారంతో పథకం రచించాడు. బండారు మహేశ్వరరావు.. మొయ్యి వాసంతి అనే మహిళకు 99 సంవత్సరాలు లీజుకు ఇచ్చినట్టు అనామతు పత్రం సృష్టించాడు. సుమారు 10 రోజుల కిందట ఆక్రమించిన భూమిలోకి దర్జాగా ప్రవేశించి బోరు తీయించాడు. అంతటితో ఆగకుండా బేస్‌మెంట్‌ నిర్మాణపు పనులు కూడా చేపట్టాడు. విషయం తెలుసుకున్న అప్పల ప్రకాశరావు పోలీసులకు ఫిర్యాదు చేశారు. ఈ మేరకు కేసు నమోదు చేసి సీఐ కె.లక్ష్మణమూర్తి దర్యాప్తు చేపట్టారు. నిందితుడు సూర్యమణిధర్మరాజును కబ్జా స్థలంలోనే సోమవారం అదుపులోకి తీసుకున్నారు. నిందితుడిని రిమాండుకు తరలించామని ఏసీపీ తెలిపారు.


  పీఎంపాలెం : ఇళ్లల్లో దొంగతనాలకు పాల్పడుతున్న దొంగను పీఎం పాలెం పోలీసులు అరెస్టు చేశారు. అతడి వద్ద నుంచి విలువైన వస్తువులను స్వాధీనం చేసుకున్నారు. ఎండాడ ఏసీపీ కార్యాలయంలో ఏసీపీ దాసరి రవిబాబు శనివారం విలేకరులకు వివరాలు వెల్లడించారు. సాలూరు మండలం మామిడిపల్లికి చెందిన చేబ్రోలు విజయకుమార్ ఇళ్లల్లో దొంగతనాలకు పాల్పడి పలుమార్లు జైలు శిక్ష అనుభవించాడు. కొంతకాలం పోలీస్ ఇన్‌ఫార్మర్‌గా కూడా పనిచేశాడు. పీఎం పాలెం ప్రాంతంలో ఇటీవల జరిగిన దొంగతనాల దర్యాప్తులో భాగంగా సీఐ అప్పలరాజు ప్రత్యేక బృందాన్ని నియమించారు. శనివారం ఉదయం కొమ్మాది కూడలి వద్ద అనుమానాస్పదంగా తిరుగుతున్న విజయకుమార్‌ను అదుపులోకి తీసుకున్నారు. విచారణలో పీఎంపాలెం, ఎంవీపీ జోన్, ఆరిలోవ ప్రాంతాల్లో పలు ఇళ్లల్లో దొంగతనాలు చేసినట్టు అంగీకరించాడు. అతని వద్ద నుంచి నాలుగున్నర కిలోల వెండి వస్తువులు, 45 గ్రాముల బంగారు ఆభరణాలు, సెల్‌ఫోన్, కెమెరాను స్వాధీనం చేసుకున్నారు. నేరస్తుడ్ని పట్టుకున్న క్రైమ్ ఎస్‌ఐ రామకృష్ణ, హెచ్‌సీ సత్యనారాయణ, సిబ్బందిని ఏసీపీ అభినందించారు.