న్యూఢిల్లీ: ప్రొ రెజ్లింగ్‌ లీగ్‌–2లో ఢిల్లీ సుల్తాన్స్‌ జట్టు పేలవ ప్రదర్శన కొనసాగుతోంది. హరి యాణా హ్యామర్స్‌ జట్టుతో బుధవారం జరిగిన మ్యాచ్‌లో ఢిల్లీ సుల్తాన్స్‌ 2–5తో పరాజయం పాలైంది. ఈ లీగ్‌లో ఢిల్లీ ఆడిన నాలుగు మ్యాచ్‌ల్లోనూ ఓడిపోవడం గమనార్హం. మరోవైపు హరియాణా హ్యామర్స్‌ జట్టుకిది వరుసగా మూడో విజయం. హరియాణా జట్టులో గడిసోవ్‌ (97 కేజీలు), కుర్బనలీవ్‌ (70 కేజీలు), రజనీశ్‌ (65 కేజీలు), మర్వా అమ్రి (58 కేజీలు), సందీప్‌ తోమర్‌ (57 కేజీలు) విజయం సాధించారు. ఢిల్లీ జట్టు తరఫున స్టడ్‌నిక్‌ (48 కేజీలు), మకైనియా (75 కేజీలు)  నెగ్గారు.


 ► సెమీస్‌లో పంజాబ్‌పై 4-3తో గెలుపు 
 ► ప్రొ రెజ్లింగ్ తుదిపోరులో నేడు ముంబైతో ఢీ
  న్యూఢిల్లీ: నిర్ణయాత్మక బౌట్‌లో రెజ్లర్ లివాన్ లోపెజ్ అజుకి సంచలన ప్రదర్శనతో.... ప్రొ రెజ్లింగ్ లీగ్ (పీడబ్ల్యుఎల్)లో హరియాణా హ్యామర్స్ ఫైనల్లోకి దూసుకెళ్లింది. శనివారం జరిగిన సెమీఫైనల్లో హరియాణా 4-3తో పంజాబ్ రాయల్స్‌ను ఓడించింది. ఆరంభంలో ‘పట్టు’ చూపించడంలో వెనుకబడిన హరియాణా తర్వాతి బౌట్లలో మాత్రం చెలరేగింది. కీలకమైన ఆఖరి బౌట్‌లో లోపెజ్ (హరియాణా) 5-1తో ప్రవీణ్ రాణా (పంజాబ్)పై గెలిచి జట్టుకు తిరుగులేని విజయాన్ని అందించాడు. బౌట్ ఆరంభంలోనే ప్రవీణ్ గాయపడటంతో అతని గెలుపు అవకాశాలను దెబ్బతీసింది.
  
  అంతకుముందు తొలి రెండు బౌట్లలో రజనీష్ (65 కేజీ) 12-2తో విశాల్ రాణాపై; వాసిలిసా మర్జాలిక్ (69 కేజీ) 4-0తో గీతికా జక్కర్‌పై గెలవడంతో పంజాబ్ 2-0 ఆధిక్యంలోకి వెళ్లింది. తర్వాత హరియాణా రెజ్లర్లు అండ్రెట్సి వాలెరి (97 కేజీ) 5-4తో మౌసమ్ ఖత్రిపై; తతన్య కిట్ (53 కేజీ) ప్రియాంక ఫోగట్‌పై గెలిచి స్కోరును 2-2తో సమం చేశారు. ఇక 125 కేజీల బౌట్‌లో చులున్‌బత్ (పంజాబ్) 5-1తో హితేందర్ (హరియాణా)పై గెలిస్తే... ఒక్సానా హర్‌హెల్ (హరియాణా) 4-0తో గీత ఫోగట్‌పై నెగ్గింది. దీంతో స్కోరు 3-3తో సమమైంది. గాయంతో హరియాణా స్టార్ రెజ్లర్ యోగేశ్వర్ దత్ ఈ మ్యాచ్‌కు దూరమయ్యాడు. ఆదివారం జరిగే టైటిల్ పోరులో హరియాణా... పటిష్టమైన ముంబైతో తలపడుతుంది.