ఇండిగో ఎయిర్‌లైన్స్‌ పుణె ఫ్లైట్‌లో ప్రయాణిస్తున్న మేజర్‌ సంజయ్‌ కుమార్‌ను ఇండిగో సిబ్బంది సత్కరించారు. కార్గిల్‌ యుద్ధవీరుడు, పరమవీర చక్ర పురస్కార గ్రహీత సంజయ్‌ కుమార్‌ను ప్రయాణికులకు పరిచయం చేసి ఆనాటి యుద్ధంలో ఆయన సాహసాలను గురించి చెప్పారు ఎయిర్‌లైన్స్‌ పైలట్‌. సంజయ్‌ కుమార్‌ని ప్రయాణికులు ప్రశంసల్లో ముంచెత్తారు. దీనితాలూకు దృశ్యాలు నెటిజనులను ఆకట్టుకున్నాయి.


 హైదరాబాద్‌: ఢిల్లీ నుంచి పుణే వెళ్లాల్సిన ఎయిర్‌ ఇండియా విమానాన్ని ఆదివారం శంషాబాద్‌ ఎయిర్‌పోర్టులో అత్యవసరంగా దింపాల్సి వచ్చింది. పుణే విమానాశ్రయంలో వాతావరణ పరిస్థితులు అనుకూలంగా లేకపోవడంతో విమానాన్ని శంషాబాద్‌ ఎయిర్‌పోర్టుకు మళ్లించినట్లు అధికార వర్గాలు తెలిపాయి. కాగా, సాంకేతిక లోపం తలెత్తడంతో హైదరాబాద్‌ నుంచి పుణే వెళ్లే ఎయిర్‌ ఇండియాకు అనుబంధంగా నడిచే అలయన్స్‌ ఎయిర్‌లైన్స్‌ విమానం రద్దయింది.
 
 గోవా నుంచి హైదరాబాద్‌ మీదుగా వెళ్లాల్సిన అలయన్స్‌ ఎయిర్‌లైన్స్‌ విమానంలో శనివారం రాత్రి 10 గంటల సమయంలో బయల్దేరేముందు సాంకేతిక లోపం తలెత్తింది. దీంతో విమానాన్ని రద్దు చేసి ప్రయాణికులకు హోటల్‌లో బస ఏర్పాటు చేశారు. ఇందులో మొత్తం 50మంది ప్రయాణికులున్నారు. వీరిని ఆదివారం ఉదయం మరో ఎయిర్‌లైన్స్ విమానంలో పుణే పంపినట్లు ఎయిర్‌ ఇండియా–అలయన్స్‌ ఎయిర్‌లైన్స్‌ ప్రతినిధులు వివరించారు.