హాలియా : ఎన్నికల హామీల అమలులో రాష్ట్ర ప్రభుత్వం విఫలమైందని సీఎల్పీ నేత కుందూరు జానారెడ్డి విమర్శించారు. ఆదివారం హాలియా ఆర్‌అండ్‌బీ అతిథి గృహంలో ఏర్పాటు చేసిన విలేకరుల సమావేశంలో ఆయన మాట్లాడారు. రైతులకు రుణమాఫీ చేసే విషయంలోనూ, విద్యుత్ సరఫరాలోనూ ఘోరంగా వైఫల్యం చెందిందన్నారు. తెలంగాణ రాష్ట్రం వస్తే గోదావరి నదిపై నాలుగు స్తంభాలేసి ఛత్తీస్‌గఢ్ నుంచి ఒక్క రోజులో  కరెంట్ తెస్తానని ఎన్నికల ముందు చెప్పిన కేసీఆర్ అధికారంలోకి వచ్చి నాలుగు మాసాలైనా ఎందుకు తీసుకురాలేకపోయారని ప్రశ్నించారు. తెలంగాణ రాష్ట్రం వస్తే అభివృద్ధి వేగవంతం అవుతుందనే ఉద్దేశంతో కాంగ్రెస్ పార్టీ అధిష్టానంతో కొట్లాడి ప్రత్యేక రాష్ట్రం తీసుకువచ్చానన్నారు. హైదరాబాద్ అభివృద్ధి అంతా కాంగ్రెస్ హయాంలోనే జరిగిందని తెలిపారు. ఇందిరమ్మ పథకంలో ఎక్కడో ఒకటి రెండు చోట్ల అవకతవకలు జరిగాయని చెప్పి రాష్ట్రంలో ఈ పథకం కింద ఇళ్లు కట్టుకున్న లబ్ధిదారుల బిల్లులు ఆపడం సరికాదన్నారు. సమావేశంలో ఆప్కాబ్ మాజీ చైర్మన్ యడవెల్లి విజయేందర్‌రెడ్డి, జెడ్పీ వైస్ చైర్మన్ కర్నాటిలింగారెడ్డి, అంగోతు లచ్చిరాంనాయక్, మిర్యాలగూడ రైస్ మిల్లర్స్ అసోసియేషన్ అధ్యక్షుడు గార్లపాటి ధనమల్లయ్య తదితరులున్నారు.
  


  అనంతపురం టౌన్ : ‘పరిశ్రమలన్నీ అభివృద్ధి చెందిన జిల్లాలకు తరలిపోతున్నాయి. రాజధాని మొదలుకొని ఐటీ పరిశ్రమల వరకూ విజయవాడ, గుంటూరు తదితర జిల్లాల్లో నెలకొల్పుతున్నారు. కళ్లముందే పరిశ్రమలు తరలిపోతాంటే మీరేం చేస్తున్నా’రని జిల్లా మంత్రులు, ప్రజాప్రతినిధులను అఖిలపక్ష నాయకులు నిలదీశారు. ప్రభుత్వానికి 12 మంది ఎమ్మెల్యేలను అందించిన జిల్లాపై ముఖ్యమంత్రి చంద్రబాబునాయుడికి ఉండే చిత్తశుద్ది ఇదేనా అని ప్రశ్నించారు.
  
  అఖిలపక్షం నాయకులు పిలుపునిచ్చిన నగరం బంద్ కార్యక్రమాన్ని విరమింపజేసేందుకు బుధవారం స్థానిక ఆర్‌అండ్‌బీ గెస్ట్‌హౌస్‌లో సమావేశం నిర్వహించారు. ఈ కార్యక్రమానికి టీడీపీ జిల్లా ఇన్‌చార్జ్ సీఎం రమేష్, మంత్రులు పల్లె రఘునాథరెడ్డి, పరిటాల సునీత, పార్టీ అధ్యక్షులు బీకే పార్థసారథి, ప్రభుత్వ చీఫ్ విప్ కాలవ శ్రీనివాసులు, విప్ యామినిబాల, ఎమ్మెల్సీలు శమంతకమణి, మెట్టు గోవిందరెడ్డి, ఎమ్మెల్యేలు ప్రభాకర్ చౌదరి, వరదాపురం సూరి, ఉన్నం హనుమంతరాయ చౌదరి, మాజీ ఎమ్మెల్యే పయ్యావుల కేశవ్ తదితరులు పాల్గొన్నారు.
  
   ఈ సందర్బంగా సీపీఎం జిల్లా కార్యదర్శి ఓబుళకొండారెడ్డి మాట్లాడుతూ... దేశంలోనే అత్యల్ప వర్షపాతం నమోదయ్యే ఈ జిల్లా అభివృద్ధిపై నోరు మెదకపకపోవడం బాధకరమన్నారు. కేంద్ర ప్రభుత్వం ప్రకటించిన సంస్థలన్నీ కోస్తాంధ్రకు తరలిపోతున్నాయని అన్నారు. ఇప్పటికే పలు పరిశ్రమలు అభివృద్ధి చెందిన జిల్లాలో ఏర్పాటు చేస్తున్నట్లు ఆయా ప్రాంతాల మంత్రులు ప్రకటించారని తెలిపారు. కానీ జిల్లా మంత్రులు మాత్రం ఇంత వరకు ఎందుకు నోరు మెదపడం లేదని ప్రశ్నించారు.
  
   పరిశ్రమలన్నీ తరలిపోయిన తర్వాత ప్రజలకు ఏమని సమాధానం చెబుతారని నిలదీశారు. సీపీఐ జిల్లా కార్యదర్శి జగదీష్ మాట్లాడుతూ... జిల్లాలో హైకోర్టు బెంచ్ ఏర్పాటుతో పాటు ప్రతిష్టాత్మకమైన ఎయిమ్స్‌ను తీసుకురావాలన్నారు. అనంత కాకపోయినా రాయలసీమలో రాజధాని ఏర్పాటు చేసేందుకు చర్యలు తీసుకోవాలన్నారు. కేంద్ర ప్రభుత్వానికి ఆదాయాన్ని సమకూరుస్తున్న గుంతకల్లు డివిజన్‌ను రైల్వే జోన్‌గా ఏర్పాటు చేయాలన్నారు. జిల్లాలో నిరుద్యోగ యువతను దృష్టిలో ఉంచుకొని ఐఐటీ, నిట్, సెంట్రల్ యూనివర్సిటీ లాంటి వాటిని తీసుకురావాలని డిమాండ్ చేశారు. సీపీఐ నాయకులు రమణ మాట్లాడుతూ... జిల్లాకు 100 టీఎంసీల నీటిని తీసుకువస్తే తప్ప ఈ ప్రాంతం అభివృద్ధి చెందదని స్పష్టం చేశారు. నీరు ఉంటేనే పరిశ్రమలు వస్తాయన్నారు. తెలుగుదేశం ప్రభుత్వం చ రిత్రలో ఒక టీఎంసీ కూడా జిల్లా కోసం తీసుకువచ్చిన దాఖలాలు లేవని స్పష్టం చేశారు. ఈ సారైనా ఎంత నీటిని తీసుకొస్తారో స్పష్టం చేయాలన్నారు. హంద్రీనీవాను పూర్తి చేయగలిగితే ఈ ప్రభుత్వానికి మంచి పేరు వస్తుందని సూచించారు. సాగునీటిని తీసుకురావడానికి అధిక ప్రాధాన్యతను ఇవ్వాలని కోరారు. సీపీఐ (ఎంఎల్) జిల్లా కార్యదర్శి పెద్దన్న, అనంత అభివృద్ధి సాధన కమిటీ నాయకులు వీకే రంగారెడ్డి మాట్లాడుతూ... ప్రజల ఆశలకు అనుగుణంగా ఈ ప్రభుత్వం పనిచేయడం లేదన్నారు. ప్రభుత్వంపై రోజురోజుకు నమ్మకం సన్నగిల్లుతోందని విమర్శించారు. అందుకే ప్రజా సంక్షేమం కోసం అఖిలపక్షం ఆధ్వర్యంలో ఆందోళనలకు శ్రీకారం చుడుతున్నామన్నారు. జిల్లా అభివృద్ధిపై స్పష్టమైన ప్రకటన వస్తేనే తాము ఆందోళన విరమిస్తామని తేల్చిచెప్పారు.
  
  సీఎం వరాలు కురిపిస్తారు..
  గురు,శుక్రవారాల్లో జిల్లా పర్యటన సందర్బంగా ముఖ్యమంత్రి ఈ జిల్లాకు వరాలు కురిపిస్తాడని మంత్రులు పల్లెరఘునాథరెడ్డి, పరిటాల సునీత, జిల్లా ఇన్‌చార్జ్ సీఎం రమేష్‌లు పేర్కొన్నారు. ముఖ్యమంత్రి చంద్రబాబునాయుడు రాష్ట్రంలోనే అనంతపురం, పశ్చిమ గోదావరి జిల్లాల అభివృద్ధిపై ప్రత్యేక దృష్టి సారించారన్నారు.
  
   ఈ జిల్లాకు సెంట్రల్ యూనివర్సిటీ, పుట్టపర్తిలో విమాన మరమ్మతుల పరిశ్రమ, జిల్లా కేంద్రంలో సూపర్‌స్పెషాలిటీ ఆసుపత్రి, హంద్రీనీవా సుజల స్రవంతి పథకం రెండో దశ పనులను పూర్తి చేసేందుకు రూ.250 కోట్లు తదితర అభివృద్ధి పనులు మంజూరు చేస్తున్నట్లు ప్రకటిస్తారన్నారు. రాష్ట్రంలో రాజధాని, ఉప రాజధాని, పరిశ్రమల ఏర్పాటు తదితర అంశాల గురించి సీఎం ఎక్కడా ప్రస్తావన చేయలేదన్నారు. జిల్లా అభివృద్ధి కోసం అఖిలపక్షం నేతలతో కలిసి కృషి చేస్తామని హామీ ఇచ్చారు. మంత్రుల హామీలతో సంతృప్తి పొందిన నేతలు గురువారం తలపెట్టిన నగరం బంద్ కార్యక్రమాన్ని వాయిదా వేసినట్లు ప్రకటించారు.
  
   బంద్ కార్యక్రమానికి మద్దతు ప్రకటించిన వైఎస్సార్ కాంగ్రెస్ పార్టీకి కృతజ్ఞతలు తెలియజేస్తున్నామని సీపీ ఐ జిల్లా కార్యదర్శి జగదీష్ అన్నారు. కార్యక్రమంలో సీపీఐ నాయకులు జాఫర్, లింగమయ్య, రాజారెడ్డి, సీపీఐఎంల్ న్యూడెమొుక్రసీ నాయకులు వీరనారప్ప, లోకసత్తా నాయకులు ఇస్మాయిల్, జేఎస్పీ నాయకులు చార్లెస్ చిరంజీవిరెడ్డి, అనంత అభివృద్ధి సాధన కమిటీ నాయకులు  కేవీరమణ, దస్తగిరి, ఎస్‌యూసీఐ నాయకులు అమరనాథ్ పాల్గొన్నారు.