న్యూఢిల్లీ: టెన్నిస్‌లో ఇండో-పాక్‌ ఎక్స్‌ప్రెస్‌గా ఖ్యాతి గడించిన భారత టెన్నిస్‌ ఆటగాడు రోహన్‌ బోపన్న, పాకిస్థాన్‌ క్రీడాకారుడు ఐసమ్‌ ఉల్‌ హక్‌ ఖురేషీల జోడీ మళ్లీ జతకట్టనుంది.  వీరిద్దరి జోడీ ఏడేళ్ల తరువాత మెక్సికన్‌ ఓపెన్‌ టోర్నీ బరిలో దిగనుంది.  వీరి‍ద్దరి జోడీ చివరిసారిగా 2014 షెన్‌జన్‌ టోర్నీలో పాల్గొంది. ఆ టోర్నీలో వీరు క్వార్టర్స్‌లో నిష్క్రమించారు. ఆతరువాత వివిధ కారణాల వల్ల వీరు విడిపోయారు. వీరి జోడీ గతంలో ఐదు టైటిళ్లను సాధించి విజయంతమైన జోడీగా కొనసాగింది.  2010 వింబుల్డన్‌ క్వార్టర్‌ ఫైనల్‌కు చేరిన వీరు, అదే ఏడాది జరిగిన యూఎస్‌ ఓపెన్‌ టోర్నీలో రన్నరప్‌గా నిలిచారు. వీరి జోడీ 2011 పారిస్‌ మాస్టర్స్‌ టోర్నీ నెగ్గడంతో ఏటీపీ దబుల్స్‌ ర్యాంకింగ్స్‌లో తొలిసారిగా టాప్‌-10లోకి చేరుకున్నారు. డబుల్స్‌ ర్యాంకింగ్స్‌లో ప్రస్తుతం బోపన్న 40వ స్థానంలో, ఖురేషీ 49వ ర్యాంకులో కొనసాగుతున్నారు.  కాగా, అకాపుల్కో వేదికగా జరుగనున్న ఈ ఏటీపీ 500 టోర్నీ ఈనెల 15న ప్రారంభంకానుంది.


 సిడ్నీ: అపియా ఇంటర్నేషనల్ ఓపెన్ టెన్నిస్ టోర్నమెంట్‌లో రోహన్ బోపన్న (భారత్) -ఐజామ్ ఖురేషీ (పాకిస్థాన్) ద్వయం సెమీఫైనల్లోకి దూసుకెళ్లింది. బుధవారం జరిగిన పురుషుల డబుల్స్ క్వార్టర్ ఫైనల్లో బోపన్న-ఖురేషీ 6-7 (3/7), 7-6 (7/5), 10-3తో ట్రాట్ హుయ్ (ఫిలిప్పీన్స్)-డొమినిక్ ఇంగ్లోట్ (బ్రిటన్) జోడిపై విజయం సాధించింది. గంటా 32 నిమిషాలపాటు జరిగిన ఈ మ్యాచ్‌లో రెండు జోడిలు ఒక్క బ్రేక్ పాయింట్ కూడా సాధించకపోవడం విశేషం. మరోవైపు ఇదే టోర్నీలో రెండో సీడ్ లియాండర్ పేస్ (భారత్)-రాడెక్ స్టెపానెక్ (చెక్ రిపబ్లిక్) జోడికి తొలి రౌండ్‌లోనే చుక్కెదురైంది. బెనెట్యూ-వాసెలిన్ (ఫ్రాన్స్) జంట 6-4, 6-4తో పేస్-స్టెపానెక్‌లను ఓడించింది. కొత్త సీజన్ పేస్‌కు కలిసిరావడంలేదు. చెన్నై ఓపెన్‌లో అతని భాగస్వామి ఫాబియో ఫాగ్‌నిని గాయం కారణంగా తప్పుకోవడంతో పేస్‌కు ఆడే అవకాశం రాలేదు. ఈ టోర్నీలో తొలి రౌండ్‌లోనే ఓటమి ఎదురైంది.