హైకోర్టుకు విన్నవించిన రోణంకి గోపాలకృష్ణ 
  
 సాక్షి, హైదరాబాద్‌: సివిల్‌ సర్వీసెస్‌–2016 పరీక్షల్లో తప్పుడు ఆంగవైకల్య ధ్రువీకరణ పత్రం సమర్పించి వికలాంగుల కోటా ద్వారానే ర్యాంకు సాధించినట్లు తనపై పిటిషనర్‌ చేసిన ఆరోపణల్లో వాస్తవం లేదని రోణంకి గోపాలకృష్ణ ఉమ్మడి హైకోర్టుకు నివేదించారు. తాను నిజంగానే వికలాంగుడినని, 2002లో జరిగిన ఓ ప్రమాదంలో తన కుడి చేయికి తీవ్ర గాయం కావడంతో ‘లోకోమోటర్‌ ఫిజికల్‌ డిజెబిలిటీ’తో బాధపడుతున్నానని వివరించారు.
 
 సివిల్‌ సర్వీసెస్‌ పరీక్షలో తప్పుడు అంగవైకల్య ధ్రువీకరణ పత్రం ద్వారా గోపాలకృష్ణ జాతీయ స్థాయిలో మూడో ర్యాంకు సాధించారని, దీనిపై విచారణకు ఆదేశించాలని కోరుతూ సికింద్రాబాద్‌కు చెందిన న్యాయవాది ఎం.మురళీకృష్ణ హైకోర్టులో ప్రజా ప్రయోజన వ్యాజ్యం (పిల్‌) దాఖలు చేసిన విషయం తెలిసిందే. ఈ వ్యాజ్యంపై విచారణ జరిపిన తాత్కాలిక ప్రధాన న్యాయ మూర్తి (ఏసీజే) జస్టిస్‌ రమేశ్‌ రంగనాథన్‌ నేతృత్వంలోని ధర్మాసనం ఈ వ్యవహారంపై పూర్తి వివరాలతో కౌంటర్‌ దాఖలు చేయాలని గోపాలకృష్ణను ఆదేశించింది. ఈ మేరకు గోపాల కృష్ణ  కౌంటర్‌ దాఖలు చేశారు.
  
 వికలాంగుల కోటాలోనే మొదటి ఉద్యోగం సాధించా
 శ్రీకాకుళం జిల్లా మెడికల్‌ బోర్డు తనను ‘శాశ్వత లోకోమోటర్‌ డిజెబుల్డ్‌ పర్సన్‌’గా ధ్రువీ కరిస్తూ 2002లో సర్టిఫికేట్‌ జారీ చేసిందని గోపాలకృష్ణ తెలిపారు. ‘విశాఖపట్నం కింగ్‌జార్జ్‌ ఆసుపత్రి,  ఉస్మానియా ఆసుపత్రి, శ్రీకాకుళం రిమ్స్‌ ఆసుప్రతులు నా వైకల్యాన్ని ధ్రువీకరించాయి. 2006 డీఎస్‌సీలో అంగవైకల్య కోటా కింద ఎంపికైటీచర్‌గా నియమితులయ్యా. అదే కోటా కింద గ్రూప్‌–1కు ఎంపికయ్యా. 2016లో యూపీఎస్సీ పరీ క్షలో జాతీయ స్థాయిలో మూడో ర్యాంకు సాధించా.  అన్నీ నిర్ధారించుకున్న తరువాతే యూపీఎస్సీ మూడో ర్యాంకు కేటాయించింది.   దీన్ని  సవాలు చేస్తూ దాఖలైన వ్యాజ్యా నికి విచారణార్హతే లేదు. వీటన్నింటినీ పరిగణనలోకి తీసు కుని పిటిషనర్‌కు భారీ జరిమానా విధిస్తూ ఈ వ్యాజ్యాన్ని కొట్టేయండి’ అని గోపాలకృష్ణ  కోర్టును కోరారు.


 సాక్షి, హైదరాబాద్‌: సివిల్‌ సర్వీసెస్‌-2016లో మూడో ర్యాంకు సాధించిన శ్రీకాకుళం జిల్లాకు చెందిన రోణింకి గోపాలకృష్ణకు చిక్కులు ఎదురయ్యాయి. ఆయన తప్పుడు అంగవైకల్య ధ్రువీకరణ పత్రం సమర్పించి రిజర్వేషన్‌ పొందాడని, దీనిపై విచారణ జరపాలంటూ ఉమ్మడి హైకోర్టులో ప్రజాప్రయోజన వ్యాజ్యం(పిల్‌) దాఖలైంది. సివిల్‌ సర్వీసెస్‌-2016 యూనియన్‌ పబ్లిక్‌ సర్వీసెస్‌ కమిషన్‌ (యూపీఎస్‌సీ) నిర్వహించిన పరీక్షలో శ్రీకాకుళం జిల్లాకు చెందిన గోపాలకృష్ణకు మూడో ర్యాంక్‌ సాధించిన విషయం తెలిసిందే.
 
 అయితే, అతడికి ఈ ర్యాంక్‌ను కేటాయించడాన్ని చట్ట విరుద్ధంగా ప్రకటించి, అతను సమర్పించిన అంగవైకల్య ధ్రువీకరణపత్రంపై విచారణ జరిపేలా ఆదేశాలు ఇవ్వాలంటూ ఉమ్మడి హైకోర్టులో సికింద్రాబాద్ ఈస్ట్‌ మారేడ్‌పల్లికి చెందిన న్యాయవాది ఎం.మురళీకృష్ణ పిల్‌ దాఖలు చేశారు. ఇందులో కేంద్ర వ్యక్తిగత శిక్షణశాఖ కార్యదర్శి, యూపీఎస్‌సీ జాయింట్‌ సెక్రటరీ, ఏపీ ప్రభుత్వ ప్రధాన కార్యదర్శి, రోణంకి గోపాలకృష్ణను ప్రతివాదులుగా పేర్కొన్నారు. ఈ వ్యాజ్యంపై మంగళవారం తాత్కాలిక ప్రధాన న్యాయమూర్తి (ఏసీజే) జస్టిస్‌ రమేశ్‌ రంగనాథన్‌ నేతృత్వంలోని ధర్మాసనం విచారణ జరపనుంది.
 
 పిల్‌లో ఆయన ఏం పేర్కొన్నారంటే.. గత ఏడాది జారీ చేసిన నోటిఫికేషన్‌కు అనుగుణంగా నిర్వహించిన సివిల్‌ సర్వీసెస్‌ ఎగ్జామినేషన్‌ -2016 తుది  ఫలితాలను యూపీఎస్‌సీ ఈ ఏడాది మే 31న ప్రకటించింది. ఇందులో గోపాలకృష్ణకు జాతీయ స్థాయిలో మూడో ర్యాంకునిచ్చిందని తెలిపారు. అయితే గోపాలకృష్ణకు ఎటువంటి అంగవైకల్యం లేకున్నా ఆ కోటా కింద తప్పుడు ధ్రువీకరణ పత్రం సమర్పించి పరీక్షకు హాజరయ్యారని వివరించారు. ఓబీసీ అయిన గోపాలకృష్ణ ఆర్థోపెడిక్‌ విభాగంలో 45శాతం మేర అంగవైక్యం ఉన్నట్లు ధ్రువీకరణ పత్రం సమర్పించారన్నారు. ఓబీసీలకు ప్రిలిమినరీ పరీక్షలో అర్హత మార్కులు 110.66 కాగా గోపాలకృష్ణకు 91.34 మార్కులే సాధించాడని, వికలాంగ కోటా కింద అర్హత మార్కులు 75.34తో అతను మెయిన్‌ పరీక్షకు అర్హత సాధించారని తెలిపారు.
 
 ఓబీసీ కేటగిరిలో వచ్చిన మార్కుల ఆధారంగా మెయిన్స్‌కు అర్హత సాధించలేదని, వికలాంగుల కోటా కింద మాత్రమే అర్హత సాధించారని పేర్కొన్నారు. మెయిన్స్‌లో సాధారణ అభ్యర్థులకు పరీక్షా సమయం 3గంటలు కాగా, వికలాంగ అభ్యర్థులకు 4 గంటలని, దీని ద్వారా కూడా గోపాలకృష్ణ లబ్ది పొందారన్నారు. వాస్తవానికి గోపాలకృష్ణకు పెద్ద వైకల్యమేదీ లేదని పిటిషనర్‌ వివరించారు. అతడు చెబుతున్న వైకల్యంపై అనేక సందేహాలు వ్యక్తం చేస్తూ పత్రికల్లో కథనాలు కూడా వచ్చాయన్నారు. వీటన్నింటినీ పరిగణనలోకి తీసుకుంటూ గోపాలకృష్ణ అంగవైకల్యంపై విచారణ జరిపేలా ఆదేశాలు ఇవ్వాలని కోర్టును కోరారు. అంతేకాక అతనికి ఐఏఎస్‌ సర్వీసు కేటాయించకుండా మధ్యంతర ఉత్తర్వులు జారీ చేయాలన్నారు.