కొత్తగా ఉద్యోగంలోకి వచ్చే వారికి అన్ని అంశాలపై పట్టు ఉండాల్సిందే. ఒక్క తెలంగాణ ఉద్యమమే కాదు.. దాంతోపాటు జాతీయ, అంతర్జాతీయ అంశాలపైనా అవగాహన పెంపొందించుకోవాలి. ముఖ్యంగా దేశంలో, రాష్ట్రంలో సాంఘిక పరిస్థితులు, సామాజిక సమస్యలు, ఇతర అంశాలపై పట్టు సాధించాలి. కొత్త రాష్ట్రంలో ఉద్యోగాలు అనగానే.. ఇప్పుడు అంతా ఒక్క తెలంగాణ ఉద్యమం, రాష్ట్ర ఆవిర్భావం అంశాలపైనే చర్చిస్తున్నారు. కానీ పోటీ పరీక్షల్లో అదొక్కటే కాదు. అది ఒక భాగం మాత్రమే. మిగతా సబ్జెక్టులు ఉన్నాయి.
  
  పోటీ పరీక్షలో అన్ని సబ్జెక్టులకు సమాన ప్రాధాన్యం ఉంటుంది. కాబట్టి అభ్యర్థులు సిలబస్‌లోని అంశాలను ప్రణాళిక ప్రకారం విభజించుకొని, వాటికి అవసరమైన పుస్తకాలు తీసుకొని, నోట్స్ సిద్ధం చేసుకొని ముందుకు సాగాలి. ప్రస్తుతం వివిధ ఉద్యోగాల భర్తీకి నోటిఫికేషన్లు జారీ అవుతున్న నేపథ్యంలో అభ్యర్థులు ఎలా సిద్ధం కావాలన్న వివిధ అంశాలపై తెలంగాణ ఉన్నత విద్యా మండలి వైస్ చైర్మన్, టీఎస్‌పీఎస్సీ సిలబస్ కమిటీ సభ్యుడు ప్రొఫెసర్ ఎస్.మల్లేశ్ ‘సాక్షి’కి  ఇచ్చిన ఇంటర్వ్యూ విశేషాలు...
 - సాక్షి, హైదరాబాద్
  
 పరీక్షల్లో ‘తెలంగాణ’తోపాటు అన్ని సబ్జెక్టులకు సమాన ప్రాధాన్యం
 జాతీయ, అంతర్జాతీయ అంశాలపైనా అవగాహన పెంచుకోవాలి
 దేశం, రాష్ట్రంలో సామాజిక అంశాలపై పట్టు సాధించాలి
 ప్రభుత్వాల విధానాలపై అధ్యయనం చేయాలి
  పాయింట్ల వారీగా నోట్స్ తయారు చేసుకుని ప్రిపేర్ కావాలి
  ఈ ప్రణాళిక అన్ని గ్రూప్స్ పరీక్షలకు ఉపయోగపడుతుంది
  గ్రూప్-2కు ఆబ్జెక్టివ్ విధానంలో చదువుకుంటే లాభం ఉండదు
  ‘సాక్షి’తో టీఎస్‌పీఎస్సీ సిలబస్ కమిటీ సభ్యుడు ప్రొఫెసర్ మల్లేశ్
  
 స్కోరింగ్ పేపర్లు మరో ఐదున్నాయి..
 గ్రూప్-1లో తెలంగాణకు సంబంధించిన విషయాలే కాదు.. స్కోరింగ్ పేపర్లు మరో ఐదు ఉన్నాయి. అన్నింటికీ సమాన విభజనతో మార్కులున్నాయి. తెలంగాణపై 150 మార్కుల పేపరు ఉంది. మిగతా 5 పేపర్లలో ఒక్కో దానికి 150 మార్కులు ఉంటాయి. తెలంగాణకు సంబంధించిన అన్ని కోణాల్లో అవగాహన ఉంటే సరిపోతుంది. మొన్నటి ఏఈఈ జనరల్ స్టడీస్ పేపరు చూస్తే తెలిసిపోతుంది. సకల జనుల సమ్మె ఎప్పుడు జరిగింది? దాంతో సంబంధం ఉన్న అన్ని అంశాలపై అవగాహన తెచ్చుకోవాలి. ఇక గ్రూప్-1లోని ఆరు పేపర్లలో జనరల్ ఎస్సే కూడా ఒకటి. అందులో పూర్తిగా తెలంగాణకు సంబంధించినవే ఉండవు. అంతర్జాతీయ, జాతీయ, రాష్ట్ర అంశాలు ఉంటాయి. ఇతర పోటీ పరీక్షల జనరల్ స్టడీస్‌లోనూ అన్ని అంశాలపై ప్రశ్నలు ఉంటాయి.
  
  పాయింట్ల వారీగా జవాబులు రాసుకోవాలి
  సమకాలీన సామాజిక అంశాలు, సాంఘిక సమస్యలపై గ్రూప్-1లో ప్రత్యేకంగా పేపరు ఉంది. దీనికి సంబంధించి పుస్తకం ఎవరు రాసినా, అందులోని అంశాలను తీసుకొని పాయింట్ల వారీగా నోట్స్ తయారు చేసుకొని చదువాలి. అన్ని సబ్జెక్టుల్లోనూ అలాగే చేయాలి. ఉదాహరణకు సెక్యులరిజం తీసుకుంటే.. సెక్యులరిజం అంటే ఏంటి? ఆ పదం ఎక్కడ్నుంచి వచ్చింది, దానిపై చర్చ ఎందుకు వచ్చింది? రాజ్యాంగపరంగా సెక్యులర్ స్టేట్‌గా తీసుకురావడానికి కారణాలు ఏంటి? సెక్యులర్ స్టేట్‌కు ఉండాల్సిన లక్షణాలు ఏంటి? అనేది పాయింట్ల వారీగా అంశాలపై జవాబులు రాసుకోవాలి.
  
  దానివల్ల ప్రత్యేకంగా డిస్క్రిప్టివ్‌కు, ఆబ్జెక్టివ్‌కు వేర్వేరుగా ప్రిపేర్ కావాల్సిన అవసరం లేదు. రెండింటికి ఉపయోగపడతాయి. ఈ పద్ధతిలో సిద్ధమైతే గ్రూప్-1, గ్రూప్-2, గ్రూప్-3 అన్నింటికీ ఉపయోగంగా ఉంటుంది. సోషల్ ఇష్యూస్ తీసుకుంటే మతాలు, సామాజిక వర్గాలు, గిరిజన సమస్యలు, ప్రాంతీయ సమస్యలు ఉన్నాయి. వాటిపై చాలా పుస్తకాలు ఉన్నాయి. కానీ ప్రత్యేకంగా గతంలో జరిగిన విషయాలు, ప్రస్తుత సమస్యలు తీసుకోవాలి. వాటన్నింటిపై అవగాహన పెంపొందించుకోవాలి. కులం అనగానే.. ఎన్ని కులాలు ఉన్నాయని కాదు.. వాటి పుట్టుక, పెరుగుదల, కులం చుట్టూ ఉన్న రాజకీయ సమస్యలు, కులంతో మత సంబంధాలు, కులం అంటరానితనం, కులం సామాజిక సమస్య, మహిళలపై హింస వంటి అంశాలపై సంపూర్ణ అవగాహన తెచ్చుకోవాలి.
  
  జాతీయ స్థాయిలో విధానాలపై దృష్టి...
  జాతీయ స్థాయిలో, రాష్ట్ర స్థాయిలో సామాజిక సమస్యలు, వాటిపై ప్రభుత్వాలు చేసిన విధానాలపై కచ్చితంగా ప్రశ్నలు అడిగే అవకాశం ఉంటుంది. ప్రభుత్వ విధానాలపై ప్రభుత్వ డాక్యుమెంట్లు ఉన్నాయి. వీటిపై కచ్చితంగా అవగాహ న పెంపొందించుకోవాలి. ఇందులో మహిళ సాధికారత వంటివి ముఖ్యమైనవి. మహిళల సాధికారత కోసం జాతీయస్థాయిలో రకరకాల పథకాలు తెచ్చారు. మైనారిటీ, వెనుకబడిన తరగతులు, గిరిజన సంక్షేమం కోసం విధానాలు తెచ్చారు. పర్యావరణం తీసుకుంటే  జాతీయ స్థాయిలో ఇందుకు ప్రత్యేక శాఖనే ఉంది. పాలసీల్లో వస్తున్న మార్పులను తెలుసుకోవాలి.
  
  ఉదాహరణకు జాతీయ స్థాయిలో రాజీవ్ గాంధీ హయాంలో నూతన విద్యావిధానం తీసుకువచ్చారు. ప్రస్తుతం కేంద్ర ప్రభుత్వం నూతన విద్యా విధానం తెచ్చేందుకు చర్యలు చేపడుతోంది. ఈ పరిస్థితుల్లో గతంలో వచ్చిన నూతన విద్యా విధానం లక్ష్యాలు ఏంటి? దాని ఉద్దేశం ఏంటి? ఫలితాలు ఏంటి? వైఫల్యాలు ఏంటి? అనేది తెలిసి ఉండాలి. ఇక ప్రస్తుత కేంద్ర ప్రభుత్వం తీసుకురాబోతున్న నూతన విద్యా విధానం ఉద్దేశం ఏంటి? అందులో ప్రధానాంశాలు ఏంటి? దాని లక్ష్యాలు ఏంటి? అన్నది తెలిసి ఉండాలి.
  
  ఇంగ్లిషు పుస్తకాలు అని ఆందోళన వద్దు
  ఇంగ్లిషులో ఉందని ఆందోళన పడొద్దు. మొదట ఇంగ్లిషులో ఉన్నా చదవాలి. విషయం అర్థం అవుతుంది. ఆ తర్వాత తెలుగులో అంశాలను చూసుకున్నప్పుడు తేడాలు అర్థమైపోతాయి. మొండిగా నాకు ఇంగ్లిషు అర్థం కాదని అనుకోవద్దు. ఇలాంటి స్టాండర్డ్ పుస్తకాలు కచ్చితంగా చదవాలి. యూనివర్సిటీలు, యూనివర్సిటీల ప్రొఫెసర్లు, డిగ్రీ లెక్చరర్లు రాసినవి, ప్రచురించినవి చదవాలి. వారిని అడిగినా గైడ్ చేస్తారు. విషయాలపై అవగాహన ఉంటే గ్రూప్-1, గ్రూప్-2, గ్రూప్-3 వేరుగా సిద్ధం కావాల్సిన అవసరం లేదు. గ్రూప్-1 స్థాయిలో ప్రిపేర్ అయితే గ్రూప్-2, గ్రూప్-3లో విజయం సాధించడం సులభం అవుతుంది. అన్ని పేపర్లకు సమాన సమయం కేటాయించి, నోట్స్ సిద్ధం చేసుకొని చదవాలి.
  
  ప్రిపరేషన్‌లో జాగ్రత్తలివీ..
  ఒక అంశాన్ని చదువుతున్నప్పుడు వివిధ కోణాల్లో చూడాలి. ఒక అంశాన్ని తీసుకుంటే అది ఎందుకు వచ్చింది. దాని ప్రభావం ఏంటి? దానివల్ల ఏయే మార్పులు వస్తాయన్న కోణంలో అవగాహన తెచ్చుకోవాలి. అప్పుడే గ్రూప్-1 వంటి పరీక్షలో డిస్క్రిప్టివ్‌లో సమాధానం రాయగలుగుతారు. గ్రూప్-2, గ్రూప్-3లో ఆబ్జెక్టివ్‌లోనూ రాయగలుగుతారు. గ్రూప్-2 పరీక్షకు సిద్ధం కావడంలో ఇంకా ఆబ్జెక్టివ్ విధానంలోనే చదవాలన్న ఆలోచనల్లో ఉన్నారు. విషయాలను అవగాహన చేసుకోవడమే ముఖ్యం. సోషియో కల్చరల్ హిస్టరీ ఆఫ్ ఇండియా గురించి అడిగితే వాటిపై బిట్స్ బ్యాంకులను చదువద్దు. మొత్తంగా చదివేతే ఏ కోణంలో ప్రశ్న అడిగినా జవాబు రాయగలుగుతారు. గ్రూప్-3లోనూ అంతే.  
  
  ప్రణాళికే ప్రధానం
  విద్యార్థులు భయాందోళనలో ఉన్నారు. సిలబస్ మారిందన్న గందరగోళంలో ఉన్నారు. ముందుగా గందరగోళం నుంచి బ యటకు రండి. సిలబస్‌లో మార్పులు స్వల్పమే. తెలంగాణకు సంబంధించిన అంశాలు మినహా జాతీయ, అం తర్జాతీయ అంశాలు ఇదివరకు ఉన్నట్లుగానే ఉంటాయి. ఆందోళన అక్కర్లేదు. పరీక్షల కోసం మార్కెట్‌లోకి వేల పుస్తకాలు వచ్చాయి. పుస్తకాలు తీసుకునేప్పుడు జాగ్రత్తగా ఎంచుకోవాలి. ఆబ్జెక్టివ్ టైప్ పుస్తకాలకు వెళ్లవద్దు. 90% షూర్ అంటూ అమ్ముతుంటా యి. వాటిల్లో 4 రకాల ప్రమాదం ఉం టుంది. ప్రశ్న ఇవ్వడమే తప్పుగా ఉండొచ్చు. జవాబులు తప్పుగా ఉండొచ్చు. ప్రశ్నకు ఇచ్చిన జవాబుల్లో రెండూ ఉండొచ్చు. లేదా జవాబు ఉండకపోవచ్చు. అలాంటి వాటి జోలికి వెళ్లవద్దు. వర్సిటీలు ప్రచురిం చినవో, ప్రొఫెసర్లు రాసినవో, తెలుగు అకాడమీ ముద్రిం చినవో తీసుకొని చదువుకోవాలి. ప్రణాళికే ప్రధానం. అది సరిగ్గా ఉంటే పరీక్షకు 50% సిద్ధం అయిపోయినట్లే.
  
  కోచింగ్ సెంటర్లను నమ్మొద్దు
  గ్రూప్-2కు ఆబ్జెక్టివ్‌లో చదువుకుంటే నష్టపోతారు. విషయంపై సంపూర్ణ అవగాహన లేకపోతే ఆబ్జెక్టివ్‌లో వచ్చే ప్రశ్నలకు సమాధానాలు ఇవ్వలేరు. కోచింగ్ కేంద్రాలు చెబుతున్నట్లుగా కాకుండా సొంతంగా ప్రణాళిక సిద్ధం చేసుకొని చదువుకోవాలి. స్టాండర్డ్ టెక్స్ట్ బుక్స్ చదవాలి. ఏ పోటీ పరీక్షకు సిద్ధమవుతున్నా ఎకనామిక్ అండ్ పొలిటికల్ వీక్లీ కచ్చితంగా చదవాలి.
  
  పాలసీల్లో ఏముందో అదే రాయాలి..
  కొత్తగా ఏర్పడిన తెలంగాణలో ప్రభుత్వం తీసుకువస్తున్న విధానాలపై  అవగాహన ఉండాలి. పాలసీ అనగానే తెలంగాణ ఉద్యమం డిమాండ్లు ఏంటి? ఎందుకు తెలంగాణను కోరుకున్నారు? డిమాండ్లలో ప్రధాన అంశాలైన నీళ్లు, నిధులు, నియామకాలు వంటి అంశాలపై ఎలాంటి విధానాలు తెచ్చారన్నది తెలుసుకోవాలి. తెలంగాణ పాలసీపై అవగాహన ఉండాలంటే ఉద్యమ సమయంలో చేసిన డిమాండ్లు ఏంటి? ప్రస్తుతం వాటిపై ప్రభుత్వం తీసుకువచ్చిన విధానాలు ఏంటన్నది తెలుసుకోవాలి. డిస్క్రిప్టివ్‌లో రాసేప్పుడు కొన్ని జాగ్రత్తలు తీసుకోవాలి. అభ్యర్థి తాను ఏం అనుకుంటున్నాడో రాయొద్దు. పాలసీల్లో ఏముందన్నది మాత్రమే రాయాలి. ఇక మహిళా సాధికారత విషయానికి వస్తే రాష్ట్రంలో దాదాపు అన్ని పథకాలు మహిళల కేంద్రంగానే తెచ్చారు. దళితులకు భూపంపిణీ, రేషన్ షాపులు వంటివన్నీ మహిళల పేరునే ఇస్తామన్నారు. వెనుకబడిన తరగతులు, మైనారిటీలు, గిరిజనులకు సంబంధించిన విధానాలపై ఏ పథకాలు తెచ్చారో తెలుసుకోవాలి. పర్యావరణంపై తెలంగాణకు హరిత హారం పాలసీ తెచ్చారు. ఇక రాష్ట్రంలో ఉన్నత విద్యలో పాలసీలు చూస్తే ఇంటర్‌ను ఉచిత విద్యగా మార్చారు. ప్రభుత్వ కాలేజీల్లో చేరే విద్యార్థి నుంచి పైసా వసూలు చేయడానికి వీల్లేదు. ఇదీ పాలసీలో భాగమే. అంతేకాదు ఫీజు రీయింబర్స్ కూడా పాలసీలో భాగమే.  
  
  గ్రూప్-1, గ్రూప్-2 అభ్యర్థులు కచ్చితంగా చదవాల్సిన కొన్ని పుస్తకాలు
   ప్రిన్సిపుల్స్ ఆఫ్ సోషియాలజీ-సీఎన్ శంకర్‌రావు
   ఇంట్రడక్టరీ సోషియాలజీ-ఎన్. జయరామ్
   ఇండియన్ సోషల్ స్ట్రక్చర్-ఎం.ఎన్. శ్రీనివాసన్
   ఇండియన్ సొసైటీ-ఎస్‌సీ దూబే
   ఇన్‌ఈక్వాలిటీ అండ్ ఇట్స్ పర్సెప్షియేషన్-విక్టర్ ఎస్ డిసౌజా
   ఇండియన్ సోషల్ చేంజెస్-యోగిందర్‌సింగ్
   ఎకనామిక్ డెవలప్‌మెంట్ అండ్ ప్లానింగ్-ఎస్‌కే మిశ్రా, వీకే పురి
   రూరల్ సోషియాలజీ-ఏఆర్ దేశాయ్
   సోషల్ మూవ్‌మెంట్స్ ఇన్ ఇండియా-ఘన్‌శ్యామ్
   పాలిటిక్స్ ఇన్ ఇండియా-రజని కొఠారీ
   ఇండియన్ గవర్నమెంట్ అండ్ పాలిటిక్స్-కే ఆర్ ఆచార్య
   పొలిటికల్ ఐడియాస్ ఇన్ యాన్షియెంట్ ఇండియా-ఆర్‌ఎస్ శర్మ
   తెలంగాణ విమోచనోద్యమం,
      సాహిత్యం-డాక్టర్ ఎస్వీ సత్యనారాయణ
   తెలుగు అకాడమీ పుస్తకాలు
   త్వరలో రాబోతున్న డిగ్రీ పుస్తకాలు