* శంషుద్దీన్ ఎమర్జింగ్ ప్యానెల్‌కు
 * అంపైర్లను ఎంపిక చేసిన ఐసీసీ
 న్యూఢిల్లీ: రాబోయే సీజన్‌కు ఐసీసీ అంపైర్లను ఎంపిక చేసింది. అద్భుతమైన ట్రాక్ రికార్డు ఉన్న ఎస్.రవి.. ‘ఎలైట్ ప్యానెల్’లో స్థానాన్ని నిలబెట్టుకోగా, శంషుద్దీన్‌ను ‘ఎమర్జింగ్ ప్యానెల్’కు తీసుకుంది. 2011లో అంపైర్‌గా బాధ్యతలు చేపట్టిన రవి.. ఇప్పటి వరకు 11 టెస్టులు, 26 వన్డేలు, 18 టి20 మ్యాచ్‌ల్లో అంపైరింగ్ చేశారు. మరోవైపు 46 ఏళ్ల శంషుద్దీన్‌కు మరింత ప్రోత్సాహిన్నిస్తూ వన్డే ఎమర్జింగ్ ప్యానెల్‌కు ఎంపిక చేసింది. ఇప్పటికే ఆయన ఏడు వన్డేలు, 10 టి20 మ్యాచ్‌లతో పాటు అండర్-19 ప్రపంచకప్‌లో అంపైరింగ్ బాధ్యతలు నిర్వర్తించారు.


 యంత్రం ధ్వంసం చేసి నగదు లూటీకి విఫలయత్నం
 సెక్యూరిటీ గార్డు అప్రమత్తతో ఉడాయించిన దొంగలు
  
 బెంగళూరు : దుండగలు  ఏటీఎంలోకి చొరబడి నగదు లూటీకి విఫలయత్నం చేసిన ఘటన సదాశివనగర పోలీస్ స్టేషన్ పరిధిలో జరిగింది. వివరాలు..  సదాశివనగరలోని భాష్యం సర్కిల్‌లో కర్ణాటక బ్యాంకు ఉంది. అదే భవనంలోనే ఏటీఎం కేంద్రం ఏర్పాటు చేశారు. ఇక్కడ షంషుద్దీన్ అనే వ్యక్తి సెక్యూరిటీ గార్డుగా పని చేస్తున్నాడు. బుధవారం వేకువ జామున 2.30 గంటల సమయంలో ఆటోలో వచ్చిన ముగ్గురు దుండగులు  ఏటీఎంలోకి చొరబడ్డారు. సీసీ కెమెరాను స్థానభ్రంశం చేసి ఇనుప రాడ్‌తో యంత్రం ధ్వంసం చేశారు.
 
 శబ్ధం కావడంతో లోపల గదిలో నిద్రిస్తున్న సెక్యూరిటీగార్డు అప్రమత్తమై మరో ప్రాంతంలో పనిచేస్తున్న సెక్యూరిటీ గార్డుకు, పోలీసులకు సమాచారం అందజేశాడు. స్నేహితుడు రాగానే ఇద్దరూ కలిసి దుండగులను పట్టుకునేందుకు యత్నించారు. అయితే దుండగులు చాకచక్యంగా తప్పించుకొని ఆటోలో ఉడాయించారు. అనంతరం పోలీసులు అధికారులు సంఘటనా స్థలానికి చేరుకుని పరిశీలించి వివరాలు సేకరించారు. సీసీ కెమెరాలలో నిందితుల భావచిత్రాలు రికార్డు అయ్యాయని, త్వరలో వారిని అరెస్టు చేస్తామని తెలిపారు.
  
  
  


 
     మొదట హతుల పేర్లు తప్పు చెప్పిన నిందితుడు
 
      విచారణలో అసలు విషయం బయటపెట్టిన వైనం
 
  జీడిమెట్ల, న్యూస్‌లైన్: జంట హత్యల కేసు కొత్త మలుపు తిరిగింది. పట్టుబడ్డ నిందితుడు పోలీసులను తప్పుదోవ పట్టించబోయి బోల్తాపడ్డాడు. శనివారం నిందితుడి విచారణ సందర్భంగా అసలు విషయం తెలుసుకున్న పోలీ సులు ఆ కోణంలో దర్యాప్తు ముమ్మరం చేశారు. విశ్వసనీయ సమాచారం మేరకు... ఉత్తర ప్రదేశ్‌కు చెందిన శంషుద్దీన్(30) నగరానికి వలస వచ్చి ఫతేనగర్‌కు చెందిన యువతిని వివాహం చేసుకుని గాజులరామారం చంద్రగిరినగర్‌లోని ఓ ఇంట్లో అద్దెకు దిగాడు.
 
 మూడు నెలల వ్యవధిలోనే (2007) అదే ప్రాంతానికి చెందిన యూసుఫ్ అనే వ్యక్తిని సుఫారీ హత్య చేశాడు. మృతదేహాన్ని గాజులరామారంలోని బాలాజీ పాఠశాల సమీపంలో పడేశాడు. ఈ హత్య మిస్టరీగా మారింది. అనంతరం తాము ఉంటున్న గది పక్కనే ఉండే వరంగల్ జిల్లా జనగాంకు చెందిన కిరణ్ (28) తన భార్యతో అసభ్యంగా ప్రవర్తిస్తున్నాడని శంషుద్దీన్ అతనిపై కక్ష పెంచుకున్నాడు. 2008లో అతడిని చంపేశాడు.  
 
 మృతదేహాన్ని ఇంటి సమీపంలోని సెప్టిక్ ట్యాంక్‌లో పాతిపెట్టారు. కిరణ్ అదృశ్యం అప్పట్లో మిస్టరీగా మారింది.  అనంతరం శంషుద్దీన్ తన భార్యతో సహా మెదక్‌జిల్లా సదాశివపేటకు వెళ్లిపోయాడు. శంషుద్దీన్‌పై అనుమానం వచ్చిన పోలీసులు అప్పటి నుంచి అతని కోసం గాలిస్తున్నారు. పది రోజుల క్రితం అతను టాస్క్‌ఫోర్స్ పోలీసులకు అనూహ్యంగా చిక్కాడు.
 
 రెండు హత్యల విషయాన్ని బయటపెట్టిన నిందితుడు మొదట్లో హతుల పేర్లను తప్పుగా చెప్పి పోలీసులను తప్పుదోవపట్టించేందుకు ప్రయత్నించాడు. అయితే, నిందితుడిని శనివారం మరింత లోతుగా విచారించగా హతుల అసలు పేర్లు బయటపెట్టాడు.  శనివారం సంఘటనా స్థలాన్ని సీఐ సుదర్శన్, ఎస్సైలు నాగరాజు, భూపాల్‌గౌడ్ సందర్శించారు. సెప్టిక్ ట్యాంక్ నుంచి శుక్రవారం స్వాధీనం చేసుకున్న అస్థికలను పరీక్షల నిమిత్తం ఫోరెన్సిక్ నిపుణుడు లక్ష్మణ్‌కు అప్పగించారు. పోలీసులు రావడంతో స్థానికులు ఏమి జరుగుతుందోనని పెద్ద ఎత్తున గుమిగూడారు. అసలు విషయం తెలుసుకుని అవాక్కయ్యారు.