సాక్షి, అమరావతి: లైమ్‌స్టోన్‌ మైనింగ్‌ లీజు పునరుద్ధరణకు అనుమతిస్తూ 2019లో హైకోర్టు సింగిల్‌ జడ్జి ఇచ్చిన తీర్పును సవాల్‌ చేస్తూ నరసాపురం ఎంపీ కె.రఘురామకృష్ణరాజు దాఖలు చేసిన అప్పీల్‌పై సరస్వతి పవర్‌ ఇండస్ట్రీస్‌ అభ్యంతరం వ్యక్తం చేసింది. సింగిల్‌ జడ్జి ముందున్న కేసులో రఘురామకృష్ణరాజు కక్షిదారు కాదని, అలాంటప్పుడు సింగిల్‌ జడ్జి తీర్పుపై అప్పీల్‌ దాఖలు చేసే అర్హత ఆయనకు లేదని సరస్వతి పవర్‌ ఇండస్ట్రీస్‌ తరఫు సీనియర్‌ న్యాయవాది సీవీ మోహన్‌రెడ్డి హైకోర్టుకు నివేదించారు. ఈ అప్పీల్‌ దాఖలు చేసేందుకు అనుమతి కోరుతూ రఘురామకృష్ణరాజు దాఖలు చేసిన అనుబంధ పిటిషన్‌పై తమకు అభ్యంతరాలున్నాయని తెలిపారు. అప్పీల్‌కు అనుమతినివ్వాలా? లేదా? అన్న అంశంపై పూర్తి వివరాలతో కౌంటర్‌ దాఖలు చేస్తామని వివరించారు. 2019లో కోర్టు తీర్పునిస్తే ఇప్పుడు అప్పీల్‌ దాఖలు చేయడంలో ఉద్దేశం ఏమిటని ప్రశ్నించారు. ఈ వాదనతో ఏకీభవించిన హైకోర్టు, అప్పీల్‌లో ప్రతివాదులుగా ఉన్న రాష్ట్ర ప్రభుత్వానికి, సరస్వతి పవర్‌ ఇండస్ట్రీస్‌కు నోటీసులు జారీ చేసింది. రఘురామకృష్ణరాజు లీవ్‌ పిటిషన్‌పై పూర్తి వివరాలతో కౌంటర్‌ దాఖలు చేయాలని ఆదేశించింది. తదుపరి విచారణను మూడు వారాలకు వాయిదా వేసింది. ఈ మేరకు  సీజే జస్టిస్‌ అరూప్‌కుమార్‌ గోస్వామి, న్యాయమూర్తి జస్టిస్‌ నైనాల జయసూర్యతో కూడిన ధర్మాసనం బుధవారం ఉత్తర్వులిచ్చింది. 


 నిలువరించే ప్రయత్నం చేయని పోలీసు యంత్రాంగం
 సాక్షి ప్రతినిధి, గుంటూరు: రాష్ట్రంలో పరిశ్రమల స్థాపనను ప్రోత్సహిస్తామని ముఖ్యమంత్రి చంద్రబాబు పదేపదే చెబుతుండగా... ఆ పార్టీకి చెందిన నేతలు, కార్యకర్తలు మాత్రం అందుకు విరుద్ధంగా వ్యవహరిస్తున్న వైనమిది. వెనుకబడిన పల్నాడు ప్రాంతంలో సిమెంటు ఫ్యాక్టరీ స్థాపించేందుకు ముందుకు వచ్చిన సరస్వతీ పవర్ ఇండస్ట్రీస్‌కు టీడీపీ నేతలు అడుగడుగునా అడ్డంకులు సృష్టిస్తున్నారు. భూములను విక్రయించిన రైతులను రెచ్చగొట్టి వాటిని కబ్జాచేసుకుని సాగు చేసుకోవాలంటూ తప్పుదారి పట్టిస్తున్నారు. సాగును అడ్డుకున్న కంపెనీ సిబ్బందిపై దాడిచేసిన సంఘటన మంగళవారం గుంటూరు జిల్లా మాచవరం మండలం చెన్నాయిపాలెం గ్రామంలో జరిగింది.
  
   సిమెంట్ కంపెనీ స్థాపనకు సరస్వతీ పవర్ ఇండస్ట్రీస్ యాజమాన్యం ఈ ప్రాంతానికి చెందిన రైతుల నుంచి 800 ఎకరాల వరకు భూములను కొనుగోలు చేసింది. కంపెనీ స్థాపనకు టీడీపీ మద్దతుదారులు కొంతకాలంగా అనేక ఆటంకాలు కలిగిస్తున్నారు. ఇందులో భాగంగానే కంపెనీకి చెందిన పొలాల్లో టీడీపీకి చెందిన కొందరు రైతులు పత్తిపంట వేశారు. ఈ విషయం తెలిసిన సిమెంట్స్ కంపెనీకి చెందిన ప్రతినిధులు ట్రాక్టర్ల సహాయంతో ఆ పంటను తొలగించే ప్రయత్నం చేశారు. దీనిని నిలిపి వేసేందుకు టీడీపీకి చెందిన  రైతులు, గ్రామస్తులు పెద్ద సంఖ్యలో అక్కడికి చేరుకుని వారిపై దాడికి దిగారు. కర్రలు, గొడ్డళ్లు, పెట్రోలు సీసాలను తీసుకుని తొలగిస్తున్న వారిపై దాడి చేశారు. యాజమాన్యం ప్రతినిధులపైనా రాళ్లు రువ్వి దాడులకు పాల్పడ్డారు. ఫ్యాక్టరీ నిర్మాణం ఎలా జరుగుతుందో చూస్తామని బెదిరించారు.