వంట చేసేందుకు కిరోసిన్ స్టౌ ఎయిర్ పంప్ కొడుతుండగా పేలుడు సంభవించి ఒక మహిళ తీవ్ర గాయాలపాలైంది. ఈ ఘటన బుధవారం ఉదయం శ్రీకాకుళం జిల్లా పాతపట్నంలో చోటుచేసుకుంది. పట్టణంలోని రాజీవనగర్‌కు చెందిన మాచర్ల వీరస్వామి భార్య పద్మ(28) ఉదయాన్నే వంట చేసేందుకు కిరోసిన్ స్టవ్ వెలిగించే యత్నంలో ఎయిర్‌పంప్ చేస్తుండగా ప్రమాదవశాత్తు స్టవ్ పేలింది. ఈ ఘటనలో తీవ్రగాయాలపాలైన పద్మను పాతపట్నంలోని ప్రభుత్వ ఆస్పత్రికి తరలించారు. పరిస్థితి విషమంగా ఉండటంతో వైద్యులు శ్రీకాకుళం రిమ్స్‌కు వెళ్లమని సూచించారు.