సాక్షి, బొమ్మనహళ్లి (మంగళూరు): ఎవరికి ఎవరితో ముడిపడి ఉంటుందో, ఎవరితో రుణానుబంధమో ఎవ్వరూ చెప్పలేరు. ప్రతి ఒక్కరికి జోడీ ముందే కుదిర్చే ఉంటుందని పెద్దలు అంటూ ఉంటారు. అలాంటిదే ఈ చూడచక్కని జంట కథ. కాఫీ నగరంగా పేరు పొందిన చిక్కమగళూరు జిల్లాలో అరుదైన పెళ్లి జరిగింది. అక్కడికి సమీపంలోని కళసాపురం అనే గ్రామంలో పునీత్‌ (24), లావణ్య (22) అనే జంట ఆదివారం మూడుముళ్లు, ఏడడుగులతో ఒక్కటైంది. ఇందులో విశేషమేముంది? అనుకోకండి. వీరిద్దరూ మరుగుజ్జులే కాబట్టి ఈ పెళ్లి ప్రత్యేకమే. వధువు, వరుడు ఇద్దరి ఎత్తు కేవలం మూడు అడుగులు మాత్రమే. ఇలా కుదిరింది పునీత్‌ది కళసాపురం కాగా, ఆమెది అయ్యనహళ్లి. రెండు మూడేళ్లుగా పునీత్, లావణ్య కన్నవారు వీరికి తగిన జోడీ కోసం గాలిస్తున్నారు. కానీ ఇద్దరికీ సరిపోయేవారు ఎక్కడా దొరకలేదు. ఇంతలో ఒక పెళ్లిలో పునీత్‌ తల్లిదండ్రులు లావణ్యను చూసి, ఆమె తల్లిదండ్రులతో మాట్లాడారు. ఇద్దరిదీ ఒకటే ఎత్తు కావడంతో ఇరు కుటుంబాల పెద్దలు వీరి పెళ్లికి నిశ్చయించారు. ఆదివారం ఘనంగా ఈ ప్రత్యేక జంట వివాహోత్సవం జరిగింది. బంధువులు,  గ్రామస్తులు పెద్దసంఖ్యలో హాజరయ్యారు. నవ దంపతులు పెళ్లిలో చాలా సంతోషంగా కనిపించారు. ఈడు జోడు సరిగ్గా కుదిరింది అని అతిథులు కొత్త జంటను ఆశీర్వదించారు. 


 ఏడడుగులు వేసిన మరుగుజ్జు జంట
 
 బొబ్బిలి: వారిద్దరూ మరుగుజ్జులే....కలిసి జీవితం పంచుకోవాలని అనుకున్నారు... రాష్ట్రాలు వేరైనా ఆలోచించకుండా మూడుముళ్లబంధంతో ఒక్కటయ్యారు. వివరాలు.... విజయనగరం జిల్లా బొబ్బిలి మండలం మెట్టవలస గ్రామానికి చెందిన అల్లం శివన్నారాయణ(38) గ్రామంలోనే టైలరింగు వృత్తిని చేస్తూ జీవనం సాగిస్తున్నాడు. మూడడుగుల ఎత్తు ఉన్న ఇతను గత పదేళ్లుగా సరిపడే జోడీ గురించి వెతుకులాడుతున్నాడు.
 
 పశ్చిమబెంగాల్ రాష్ర్టంలోని ఖరక్‌పూర్‌లో ఉంటున్న అన్నపూర్ణ అనే మహిళ కూడా మరుగుజ్జే. ఈమెకు వివాహప్రయత్నాలు చేస్తున్నారని తెలుసుకున్న శివన్నారాయణ బంధువుల ద్వారా సంప్రదించాడు. రాష్ర్ట సరిహద్దులు దాటైనా అబ్బాయితో జీవనానికి ఆమె సై అనడంతో బొబ్బిలి మండలం మెట్టవలస గ్రామంలో ఆదివారం రాత్రి శివన్నారాయణ, అన్నపూర్ణల వివాహాన్ని అంగరంగ వైభవంగా జరిపించారు.