పారిస్‌: మూడో రౌండ్‌లో మ్యాచ్‌ పాయింట్‌ కాపాడుకొని ఊపిరి పీల్చుకున్న జర్మనీ టెన్నిస్‌ యువతార అలెగ్జాండర్‌ జ్వెరెవ్‌ ప్రిక్వార్టర్‌ ఫైనల్లోనూ పోరాడి గట్టెక్కాడు. ఈ క్రమంలో తన కెరీర్‌లో తొలిసారి ఓ గ్రాండ్‌స్లామ్‌ టోర్నమెంట్‌లో క్వార్టర్‌ ఫైనల్‌ దశకు అర్హత సాధించాడు. టెన్నిస్‌ సీజన్‌ రెండో గ్రాండ్‌స్లామ్‌ టోర్నమెంట్‌ ఫ్రెంచ్‌ ఓపెన్‌లో ఆదివారం జరిగిన పురుషుల సింగిల్స్‌ ప్రిక్వార్టర్‌ ఫైనల్లో రెండో సీడ్‌ అలెగ్జాండర్‌ జ్వెరెవ్‌ (జర్మనీ) 4–6, 7–6 (7/4), 2–6, 6–3, 6–3తో కరెన్‌ ఖచనోవ్‌ (రష్యా)పై విజయం సాధించాడు. 3 గంటల 29 నిమిషాలపాటు జరిగిన ఈ మ్యాచ్‌లో జ్వెరెవ్‌ ఏకంగా 17 ఏస్‌లు సంధించాడు. నాలుగు డబుల్‌ ఫాల్ట్‌లతోపాటు 51 అవనసర తప్పిదాలు కూడా చేశాడు. ఒకదశలో 1–2 సెట్‌లతో వెనుకబడిన 21 ఏళ్ల జ్వెరెవ్‌ చివరి రెండు సెట్‌లను వరుసగా గెల్చుకొన్ని విజయాన్ని ఖాయం చేసుకున్నాడు. ‘నేనింకా యువకుడినే. ఇంకొంత సమయం కోర్టులో గడిపి మీ అందరికీ వినోదం అందిస్తాను’ అని మ్యాచ్‌ అనంతరం జ్వెరెవ్‌ సరదాగా వ్యాఖ్యానించాడు. ‘నేను, నా సోదరుడు మిషా జ్వెరెవ్‌ రోజుకు నాలుగైదు గంటలు జిమ్‌లో గడుపుతాం. ట్రెడ్‌మిల్‌పై సాధన చేస్తాం. ఆ శ్రమ ఈ రోజు ఫలితాన్నిచ్చింది’ అని జ్వెరెవ్‌ అన్నాడు. క్వార్టర్‌ ఫైనల్లో ఏడో సీడ్‌ డొమినిక్‌ థీమ్‌ (ఆస్ట్రియా)తో జ్వెరెవ్‌ తలపడతాడు. మరో ప్రిక్వార్టర్‌ ఫైనల్లో థీమ్‌ 6–2, 6–0, 5–7, 6–4తో 19వ సీడ్‌ నిషికోరి (జపాన్‌)పై గెలిచి వరుసగా ఈ టోర్నీలో మూడోసారి క్వార్టర్‌ ఫైనల్‌కు చేరాడు. మరో ప్రిక్వార్టర్‌ ఫైనల్లో మాజీ చాంపియన్‌ నొవాక్‌ జొకోవిచ్‌ (సెర్బియా) 6–3, 6–4, 6–2తో ఫెర్నాండో వెర్డాస్కో (స్పెయిన్‌)పై గెలుపొందగా... అన్‌సీడెడ్‌ మార్కో సెచినాటో (ఇటలీ) 7–5, 4–6, 6–0, 6–3తో ఎనిమిదో సీడ్‌ డేవిడ్‌ గాఫిన్‌ (బెల్జియం)ను బోల్తా కొట్టించి జొకోవిచ్‌తో క్వార్టర్‌ ఫైనల్‌ పోరుకు సిద్ధమయ్యాడు. స్లోన్‌ స్టీఫెన్స్‌ జోరు... మహిళల సింగిల్స్‌ విభాగంలో అమెరికా యువ తారలు పదో సీడ్‌ స్లోన్‌ స్టీఫెన్స్, 13వ సీడ్‌ మాడిసన్‌ కీస్‌ క్వార్టర్‌ ఫైనల్లోకి దూసుకెళ్లారు. ప్రిక్వార్టర్‌ ఫైనల్స్‌లో స్లోన్‌ స్టీఫెన్స్‌ 6–2, 6–0తో కొంటావీట్‌ (ఎస్తోనియా)పై... కీస్‌ 6–1, 6–4తో బుజర్‌నెస్కూ (రొమేనియా)పై గెలుపొందారు. మరో ప్రిక్వార్టర్‌ ఫైనల్లో 26వ సీడ్‌ బార్బరా స్ట్రికోవా (చెక్‌ రిపబ్లిక్‌) 4–6, 3–6తో యూలియా పుతింత్‌సెవా (కజకిస్తాన్‌) చేతిలో పరాజయం పాలైంది. 


 ∙ తొలి గ్రాండ్‌స్లామ్‌ ఫైనల్లో కీస్, స్టీఫెన్స్‌
 ∙ సెమీస్‌లో ఓడిన వీనస్, వాండవె
 
 యూఎస్‌ ఓపెన్‌ మహిళల సింగిల్స్‌లో  కొత్త చాంపియన్‌ వచ్చేందుకు రంగం సిద్ధమైంది. సెమీస్‌లో సత్తా చాటిన అన్‌సీడెడ్‌ స్లోన్‌ స్టీఫెన్స్, 15వసీడ్‌ మాడిసన్‌ కీస్‌ తొలిసారి గ్రాండ్‌స్లామ్‌ తుదిపోరుకు అర్హత సాధించారు. అద్భుతమైన పోరాటపటిమతో స్టీఫెన్స్‌ తొమ్మిదో సీడ్‌ వీనస్‌ను కంగు తినిపించగా... వాండవెపై కీస్‌ అలవోక విజయం సాధించింది. 15 ఏళ్ల తర్వాత ఇద్దరు అమెరికన్ల మధ్య టైటిల్‌ పోరు జరగనుండటం విశేషం.
 
 న్యూయార్క్‌: యూఎస్‌ ఓపెన్‌ గ్రాండ్‌స్లామ్‌ టెన్నిస్‌ చాంపియన్‌షిప్‌ మహిళల సింగిల్స్‌ విభాగంలో అమెరికాకు చెందిన మాడిసన్‌ కీస్, స్లోన్‌ స్టీఫెన్స్‌ టైటిల్‌ పోరుకు అర్హత సంపాదించారు. శుక్రవారం జరిగిన నలుగురు అమెరికన్‌ మహిళల సింగిల్స్‌ సెమీఫైనల్స్‌ మ్యాచ్‌లలో ఏడు గ్రాండ్‌స్లామ్‌ టైటిళ్ల విజేత, 9వ సీడ్‌ వీనస్‌ విలియమ్స్, మరో అమెరికన్‌ కోకో వాండవె ఓటమి పాలయ్యారు. స్టీఫెన్స్‌ 6–1, 0–6, 7–5తో వీనస్‌ను కంగుతినిపించగా... కీస్‌ 6–1, 6–2తో కోకో వాండవెపై అలవోక విజయం సాధించింది. 2002 తర్వాత ఇద్దరు అమెరికా క్రీడాకారిణిల మధ్య టైటిల్‌ పోరుకు రంగం సిద్ధమైంది. 15 ఏళ్ల క్రితం జరిగిన ఆ తుదిపోరులో సెరెనా విలియమ్స్‌... తన సోదరి వీనస్‌ను ఓడించి విజేతగా నిలిచింది. స్టీఫెన్స్‌తో జరిగిన సెమీస్‌ మ్యాచ్‌లో వీనస్‌ 3 ఏస్‌లను సంధించి, 6 డబుల్‌ ఫాల్ట్‌లు చేసింది. అయితే ఏకంగా 51 అనవసర తప్పిదాలతో మూల్యం చెల్లించుకుంది. మరోవైపు స్టీఫెన్‌ 2 ఏస్‌లు సంధించి 17 విన్నర్లు కొట్టింది. 27 అనవసర తప్పిదాలు చేసినా చివరకు టైటిల్‌ పోరుకు దూసుకెళ్లింది.  
 
 స్టీఫెన్స్‌ పోరాడిందిలా...: వీనస్‌ విలియమ్స్‌తో జరిగిన సెమీస్‌లో స్లోన్‌ విజయం కోసం సర్వశక్తులూ ఒడ్డింది. తొలి గేమ్‌ను గెలుచుకొని శుభారంభం చేసింది. ఇదే జోరులో 24 నిమిషాల్లోనే తొలి సెట్‌ను 6–1తో ముగించింది. అయితే రెండో సెట్‌లో వీనస్‌ తన అనుభవాన్నంత రంగరించి ప్రత్యర్థిని మట్టికరిపించింది. గంటకు 100 మైళ్ల వేగంతో దూసుకొచ్చే సర్వ్‌లకు స్టీఫెన్స్‌ చేతులెత్తేసింది. దీంతో ఒక్కగేమైనా గెలవకుండానే 0–6తో సెట్‌ను చేజార్చుకుంది. 30 నిమిషాల్లో వీనస్‌ ఈ సెట్‌ గెలిచింది. ఇక నిర్ణాయక మూడో సెట్‌లో ఇద్దరు హోరాహోరీగా తలపడ్డారు. గంట 13 నిమిషాల పాటు ఈ సెట్‌ సాగింది. తొలి గేమ్‌లో వీనస్‌ సర్వీస్‌ను బ్రేక్‌ చేసిన స్టీఫెన్స్, తర్వాతి గేమ్‌లో తన సర్వీస్‌ను నిలబెట్టుకుంది. దీంతో 2–0తో ఆధిక్యంలోకి వెళ్లింది. అనంతరం మూడో గేమ్‌ సర్వీస్‌కు దిగిన వీనస్‌ అనవసర తప్పిదాలతో పాయింట్లను కోల్పోయింది.
 
 అయితే తర్వాత మూడు గేమ్‌ పాయింట్లను సాధించి తొలిసారిగా పైచేయి సాధించింది వీనస్‌. ఫోర్‌ హ్యాండ్‌ షాట్లతో విరుచుకుపడిన వెటరన్‌ స్టార్‌ ప్రత్యర్థిపై ఆధిపత్యాన్ని చాటింది. అనంతరం తన సర్వీస్‌ను నిలబెట్టుకోవడంతో సెట్‌లో 3–2తో జోరు పెంచింది. వెంటనే తేరుకున్న 24 ఏళ్ల స్టీఫెన్స్‌ వరుసగా 6, 7 గేములను గెలుచుకుంది. దీటుగా బదులిచ్చిన వీనస్‌ 8, 9 గేమ్‌లను కైవసం చేసుకోవడంతో ఆధిక్యం చేతులు మారింది. కానీ తర్వాత వరుసగా మూడు గేముల్లో స్టీఫెన్స్‌ అద్భుతంగా పోరాడింది. రెండు సార్లు తన సర్వీస్‌ను కాపాడుకున్న ఆమె ఒక బ్రేక్‌ పాయింట్‌తో విజయాన్ని ఖాయం చేసుకుంది.
 
 అలవోకగా ముగించిన కీస్‌: మరో సెమీఫైనల్లో 15వ సీడ్‌ మాడిసన్‌ కీస్‌ ప్రత్యర్థికేమాత్రం అవకాశమివ్వకుండా ఏస్‌లతో చెలరేగింది. 6–1తో తొలి సెట్‌ను 23 నిమిషాల్లోనే ముగించింది. తర్వాత సెట్‌లో వాండవె కాస్త పోరాడే ప్రయత్నం చేసినా కీస్‌ తన ఆధిపత్యాన్ని కొనసాగించింది. 43 నిమిషాల్లో 6–2తో రెండో సెట్‌తో పాటు మ్యాచ్‌ను కైవసం చేసుకుంది. ఈ మ్యాచ్‌లో కీస్‌ 5 ఏస్‌లను సంధించి, 25 విన్నర్స్‌ కొట్టింది. ఒకసారి మాత్రమే డబుల్‌ ఫాల్ట్‌ చేసింది. మరో వైపు 22 అనవసర తప్పిదాలు చేసిన వాండవె కేవలం తొమ్మిదే విన్నర్స్‌ కొట్టింది.
 
 సానియా కథ ముగిసింది
 మహిళల డబుల్స్‌ సెమీఫైనల్లో నాలుగో సీడ్‌ సానియా మీర్జా–షుయ్‌ పెంగ్‌ (చైనా) జోడి 4–6, 4–6తో రెండో సీడ్‌ మార్టినా హింగిస్‌ (స్విట్జర్లాండ్‌)– యంగ్‌ జన్‌ చాన్‌ (చైనీస్‌ తైపీ) జంట చేతిలో పరాజయం చవిచూసింది.