న్యూఢిల్లీ: స్పైస్ రిటైల్ కంపెనీ డ్యూయల్ సిమ్‌లను సపోర్ట్ చేసే స్మార్ట్‌వాచ్, స్మార్ట్ పల్స్ ఎం 9010ను మంగళవారం ఆవిష్కరించింది. ఈ నెల 11 (శుక్రవారం) నుంచి హోమ్‌షాప్ 18 ద్వారా అందించనున్న ఈ స్మార్ట్‌వాచ్ ధర రూ.3,999.  ఈ స్మార్ట్‌వాచ్‌లో 4 సెం.మీ, టచ్‌స్క్రీన్ ఉంటుందని స్పైస్ రిటైల్ సీఈవో (డివెసైస్) టి. ఎం. రామకృష్ణన్ పేర్కొన్నారు. ఈ స్మార్ట్‌వాచ్‌తో ఉచితంగా అందించే బ్లూటూత్ హెడ్‌సెట్ ద్వారా కాల్స్ చేయవచ్చని, రిసీవ్ చేసుకోవచ్చని వివరించారు.
 
 ఎస్‌ఎంఎస్‌లను చదవడమే కాకుండా పంపించవచ్చని కూడా పేర్కొన్నారు. అలాగే ఇంటర్‌నెట్ బ్రౌజింగ్ కూడా చేయవచ్చని వివరించారు. ఎఫ్‌ఎం రేడియో, వీడియో ప్లేయర్, వీజీఏ కెమెరా, 8 జీబీ ఎక్స్‌పాండబుల్ మెమరీ, 420 ఎంఏహెచ్ బ్యాటరీ వంటి ప్రత్యేకతలున్నాయని పేర్కొన్నారు. ఏ ఆండ్రాయిడ్ స్మార్ట్‌ఫోన్‌కైనా సెకండరీ డివైస్‌గా పనిచేస్తుందని తెలిపారు. భారత మార్కెట్లో సిమ్‌తో కూడిన ధరించే వస్తువును అందించిన తొలి దేశీయ కంపెనీ తమదేనని, మరిన్ని వినూత్నమైన ఉత్పత్తులను అందించనున్నామని రామకృష్ణన్ పేర్కొన్నారు.