చిట్‌చాట్
  
 సిటీలో అష్టాంగ యోగకు ఆదరణ పెరుగుతోంది. యువత నుంచి వస్తున్న డిమాండ్‌తో ఇప్పుడు యోగా గురువులు ఏకంగా అష్టాంగ యోగలోని మెలకువలను నేర్చుకుంటున్నారు. అష్ట్టాంగ యోగ సాధకుడు పట్టాభి జోయిస్ వద్ద శిష్యరికం చేసిన ముంబైకి చెందిన దీపికా మెహతా ‘ఐదు రోజుల అష్టాంగ వర్క్‌షాప్’ కోసం హైదరాబాద్‌కు వచ్చారు. తిరుమలగిరిలోని అనాహత యోగా జోన్‌లో యోగా టీచర్లకు శిక్షణ ఇస్తున్న దీపికా మెహతాతో
 
 ‘సిటీప్లస్’ చిట్‌చాట్.
 
 విద్యార్థుల్లో ఏకాగ్రత, పాజిటివ్ థింకింగ్ పెరగటానికి అష్టాంగ యోగ ఉపయోగపడుతుంది. ఈ యోగాసనాల వల్ల మెదడు చురుగ్గా ఉంటుంది. శారీరకంగా బలం కలుగుతుంది. సూర్యనమస్కారాలతో మొదలయ్యే ఈ యోగాలో యమ, నియమ, ఆసన, ప్రాణాయామ, ప్రత్యాహార, ధారణ, ధ్యాన సమాధి ఉంటాయి. నడుము వంచడం, కాళ్లను, చేతులను విల్లులా ఎటుబడితే అటు తిప్పడం వంటి వ్యాయామాల ద్వారా భౌతికంగా శరీరాన్ని బలోపేతం చేసుకోవడమే కాకుండా అందంగా, ఆరోగ్యంగా ఈ యోగా ద్వారా ఉండవచ్చు. ఆధ్యాత్మిక ధ్యానంవైపు మనస్సును కూడా మరలించవచ్చు.
 
 యోగా అంటే ప్రాణం...
 
 మనస్సుకు ప్రశాంతతనిచ్చే యోగా అంటే తనకు తగని ఇష్టమని అంటోంది దీపికా మెహతా. ఐదేళ్ల వయస్సులో ఉన్నప్పుడే మెడిటేషన్ చేశా. పదేళ్ల నుంచి యోగా చేయడం మొదలెట్టా. నాకు జరిగిన ప్రమాదంతో నేను మళ్లీ తిరిగి ఫిట్‌గా అవుతానన్న ఆశ లేకుండా పోయింది. కేరళ, హృషికేశ్‌లో టీచర్స్ ట్రైనింగ్ చేస్తున్నప్పుడు యోగా పాఠాలు చెప్పడం మొదలెట్టా. లాస్‌ఏంజెలెస్‌లో టీచ్ చేస్తున్నప్పుడు పవర్ యోగా గురించి తెలుసుకున్నా. ఆ తర్వాత ఇండియా చేరుకుని పట్టాభి జోయిస్ వద్ద శిక్షణ తీసుకున్నా. ఇప్పుడు ఇండియాలో పవర్ యోగా పాఠాలు చెప్పే ముగ్గురిలో ఒకరిగా పేరు తెచ్చుకున్నా.
 
 మన సంస్కృతి అంటే మహా ఇష్టం.,...
 
 అమెరికాలో ప్రతిరోజూ మూడు కోట్ల మంది యోగా చేస్తున్నారు. అదే మన ఇండియాలో అలా జరగడం లేదు. అందుకే మన సంస్కృతి, సంప్రదాయాలను ప్రమోట్ చేసేందుకు యోగాను చక్కని వేదికగా వినియోగించుకుంటున్నా. ఇప్పటికే వివిధ రాష్ట్రాల్లో పదులకు పైగానే వర్క్‌షాప్‌లు నిర్వహించా. హైదరాబాద్‌లో అష్టాంగ యోగాలో శిక్షణ ఇస్తుండటం ఎంతో సంతోషాన్నిచ్చింది. స్థానిక యోగా టీచర్ల నుంచి మంచి స్పందన ఉంది.
 
 వాంకె శ్రీనివాస్
  
  


 అప్పటికీ బాగా గుర్తు... అది 1946 డిసెంబర్. మా రాజమండ్రి నుంచి మొట్టమొదటిసారి హైదరాబాద్‌కు వచ్చాం. తీర్థయాత్రల కోసం. సికింద్రాబాద్ రైల్వేస్టేషన్‌లో దిగగానే మా కుటుంబానికి ఓ వింత అనుభవం. పోలీసులు చుట్టుముట్టారు. బ్యాగులు సోదా చేశారు. ఎందుకో... కాసేపటికి కానీ అర్థం కాలేదు... నిజాం రాజ్యానికి వచ్చినందుకే ఈ తనిఖీలని. ఇక మా వద్ద ఉన్న  రూపాయాలను ‘హాలీసిక్కా’లోకి మార్చుకోవాల్సి వచ్చింది. హాలీసిక్కా అంటే నిజాం కరెన్సీ! స్టేషన్ దగ్గర్లోనే కరెన్సీ మార్చుకొని నగర పర్యటనకు బయలుదేరాం. రూపాయిలైతే మారాయి. కానీ, నిజాం కరెన్సీకి... మా రూపాయలకు లెక్క కుదిరేది కాదు. ఎక్కడికెళ్లినా గందరగోళం. ఎన్ని రూపాయలకు ఎన్ని హాలీసిక్కాలు అనేది పెద్ద తికమక. అప్పటికైతే ఎలాగోలా తీర్థయాత్ర అయిపోయింది. కొద్ది రోజుల తరువాత పై చదువుల కోసం హైదరాబాద్‌కు వచ్చా. అయినా... అదే తికమక. కొంతకాలం కరెన్సీ లెక్కలతో కుస్తీ పట్టాల్సి వచ్చింది. కొద్ది రోజుల తరువాత స్వాతంత్య్రం రావడం... పోలీసు చర్య... హైదరాబాద్ భారత్‌లో కలిసిపోవడంతో నా సమస్య పరిష్కారమైంది.
  
 మేడలో ప్రయాణం చేస్తున్నట్లు...
 
  నాడు నగరంలో మరో వింత... డబుల్ డెక్కర్ బస్సు. ఆ బస్సు పైఅంతస్తు ఎక్కితే... మేడలో కూర్చొని వెళుతున్నట్లనిపించేది. సికింద్రా బాద్‌కు వస్తే.. తప్పనిసరిగా డబుల్ డెక్కర్ ఎక్కాల్సిందే. ‘కింది బస్సు సరే... పైన ఉన్న బస్సు ఇంజన్ లేకుండా ఎలా ముందుకెళుతుంది’ అని మా బంధువులు అమాయకంగా అడిగినప్పుడు నవ్వాగేది కాదు. సాయంకాలం వేళ హుస్సేన్‌సాగర్ పైనుంచి డబుల్‌డెక్కర్‌లో వెళ్తుంటే అలలపై నుంచి వచ్చే చల్లటి గాలులు ఆహ్లాదకరమైన అనుభూతినిచ్చేవి. అప్పుడు జట్కాల మీద ప్రయాణం మధురస్మృతిని మిగిల్చేది. ఇప్పుడు అలాంటి జ్ఞాపకాలు ఎక్కడున్నాయి..!
  
 ఛీటేవాలే మౌస్ మధురం...
 
  నగరంలో ఛీటేవాలే మౌస్ (నల్ల చుక్కలున్న అరటిపండ్లు) బాగా దొరికేవి. ఇక్కడకు వచ్చినప్పుడల్లా మా నాన్న వాటిని తినకుండా వెళ్లేవాడు కాదు. 1953, 54, 55 సంవత్సరాల్లో భద్రతపై ఎలాంటి ఆందోళన ఉండేది కాదు. నారాయణగూడ, హిమాయత్‌నగర్ మధ్యలో ఓ ఇంట్లో మేం అద్దెకుండేవాళ్లం. ఎండాకాలంలో ఇంటి బయటే మంచాలు వేసుకొని, తలగడ కింద ఇంటి తాళంచెవులు పెట్టుకొని హాయిగా పడుకునేవాళ్లం. దొంగతనాలు జరిగేవి కావు. ఇప్పుడు... పడుకున్నా లోపలికి దొంగలు చొరబడి  దోచుకుపోయిన సంఘటనలు రోజూ చూస్తూనే ఉన్నాం.
  
 వాంకె శ్రీనివాస్