సూపర్ ఫార్ములా చాంపియన్‌షిప్
  సుజుకా: ఆరంభంలో కాస్త వెనుకబడ్డా కీలక సమయంలో పుంజుకున్న భారత రేసింగ్ డ్రైవర్ నారాయణ్ కార్తికేయన్... సుజుకా సర్క్యూట్‌లో ఆదివారం జరిగిన సూపర్ ఫార్ములా చాంపియన్‌షిప్‌లో మూడో స్థానంలో నిలిచాడు. 43 ల్యాప్‌ల ఈ రేసులో కార్తికేయన్ 1:14.29 సెకన్ల టైమింగ్‌తో లక్ష్యాన్ని చేరాడు. ఫార్ములావన్ కాకుండా సింగిల్ సీటర్ సిరీస్‌లో పొడియం (టాప్-3) చేరడం భారత డ్రైవర్‌కు ఇదే తొలిసారి.
  
  రెండో గ్రిడ్ నుంచి ప్రధాన రేసును మొదలుపెట్టిన కార్తికేయన్ తొలి ల్యాప్ ముగిసేసరికి మూడు స్థానాలు వెనుకబడ్డాడు. అయితే తర్వాత అద్భుతమైన టైమింగ్‌తో రేసులో దూసుకుపోయాడు. ఆండ్రీ లోటెరర్ 1:14.01 సెకన్లతో అగ్రస్థానంలో నిలువగా, కజుకి నకజిమా 1:14.10 సెకన్లతో రెండో స్థానాన్ని సాధించాడు. ఈ విజయంపై కార్తికేయన్ సంతృప్తిని వ్యక్తం చేశాడు.