సిద్దిపేటరూరల్‌ : విద్యార్థులకు గురుకుల పాఠశాలలో సమ్మర్‌ క్లాసుల్లో భాగంగా సేంద్రియ వ్యవసాయంపై అవగాహన కార్యక్రమాలు నిర్వహించడం చాలా బాగుందని రాష్ట్ర ఎస్సీ, ఎస్టీ కమీషన్‌ చైర్మన్‌ ఎర్రోళ్ల శ్రీనివాస్, కమీషన్‌ సభ్యులు అన్నారు. బుధవారం అర్బన్‌ మండల పరిధిలోని మిట్టపల్లి గ్రామంలోని సాంఘీక సంక్షేమ గురుకుల బాలికల పాఠశాలను రాష్ట్ర ఎస్సీ, ఎస్టీ కమీషన్‌ చైర్మన్‌ ఎర్రోళ్ల శ్రీనివాస్‌తో పాటుగా కమీషన్‌ సభ్యులు సందర్శించారు. ఈ సందర్భంగా వారు మాట్లాడుతూ విద్యార్థులకు సేంద్రియ వ్యవసాయంపై అవగాహన కల్పించాలన్నా ఆలోచన చాలా గొప్పదని, దీనిని విద్యార్థులు ఉత్సాహంతో నేర్చుకోవడం చాలా మంచి విషయం అన్నారు. అదే విధంగా పచ్చని పర్యావరణంలో పిల్లలకు అన్ని రకాల అవగాహన సదస్సులు నిర్వహించడం చాలా అభినందనీయమన్నారు. సేంద్రియ వ్యవసాయం గురించి విద్యార్థులు చాలా బాగా వివరించారని వారిని అభినందించారు. విద్యార్థులకు డిజిటల్‌ క్లాస్‌రూంలు, మిర్రర్‌ ప్రాజెక్టులు నిర్వహించడం పై ఉపాధ్యాయ బృందాన్ని అభినందించారు. కార్యక్రమంలో గ్రామ సర్పంచ్‌ శ్రీనివాస్, నాయకులు, ఉపాధ్యాయ బృందం, తదితరులు పాల్గొన్నారు.


 
 భీమవరం: ఇంజినీరింగ్‌ విద్యార్థులు విమానాలు, విద్యుత్‌ కేంద్రాల్లో టర్బైన్ల వినియోగం, ఆధునిక గ్యాస్‌ టర్బైన్ల వాడకం వంటి అంశాల్లో సాంకేతిక మార్పులను అవగాహన చేసుకోవాలని చెన్నై ఐఐటీ ఫ్రొఫెసర్‌ డాక్టర్‌ బీవీఎస్‌ఎస్‌ఎస్‌ ప్రసాద్‌ అన్నారు. భీమవరం శ్రీవిష్ణు మహిళా ఇంజినీరింగ్‌ కళాశాలలో గురువారం మెకానికల్‌ ఇంజినీరింగ్‌ విభాగం ఆధ్వర్యంలో ‘రీసెంట్‌ ట్రెండ్స్‌ ఇన్‌ థర్మల్‌ ఇంజినీరింగ్‌’ అంశంపై మూడు రోజుల శిక్షణ కార్యక్రమాన్ని ఆయన ప్రారంభించారు. కళాశాల ప్రిన్సిపాల్‌ డాక్టర్‌ జి.శ్రీనివాసరావు మాట్లాడుతూ మూడు రోజుల శిక్షణ   కార్యక్రమంలో విశాఖ, విజయవాడకు చెందిన ఇంజినీరింగ్‌ కళాశాల ప్రొఫెసర్లు పాల్గొంటారని చెప్పారు. వైస్‌ ప్రిన్సిపాల్‌ డాక్టర్‌ పి.శ్రీనివాసరాజు, వర్క్‌షాప్‌ సమన్వయ కర్తలు జి.శ్రీనివాసరావు, జీవీ సుభాష్, వివిధ కళాశాలల అధ్యాపకులు, విద్యార్థులు పాల్గొన్నారు.